Oisterwijk

Mary dochter [wil]ner Lauwreys Vrancken met haeren momboir daer toe van haer gecomen ǁ ende haer vanden Richter als recht is gegeven Een huys ende hoff met zynen gronde ǁ ende toebehoerten haer als zy sede toebehoerende gelegen inder vryheit van Oesterwyck ǁ inder Kerkstraet aldaer tussen erffenisse der kynderen wilner Embrechts die Greve opten ǁ een zyde, ende tussen erfenisse Jueten weduwe wilner Willem Huysmans optie ander ǁ zyde streckende vander Kerckstraeten voerss. totter erffenisse des persoens van Oesterwyck ǁ van welcken huyse ende hoeve voerss. Mary voerss. die vier vijfte gedeelten tegen ǁ haere mede erfgenaemen met overgeven erffelijcken vercregen hadde gelyck als dat ǁ in scepenen letteren van Oesterwijck daer op gemaect volcomelycker begrepen is. Ende ǁ dat vyfte vijfte gedeelte daer aff der selver Marien nader doot wilner Lauwreys haers ǁ vaders voerss. in Recht van successie ende versterve aencoemen ende verstorven is als ǁ zy sede heeft zy wittelycken ende erffelycken overgegeven ende opgedraegen meester Jannen ǁ Lombaerts tot behoeff vanden heyligen sacramente voer die een helft ende der fabrycken ǁ der kercken van Oesterwyck voer die ander helft tsamen met allen scepenen letteren ende vorwaerden ǁ daer aff mentie maeckende ende gewach doende. Ende met allen den rechte haer daer inne eenich ǁ sins toebehoerende met afgaen ende verthyen als daer toe behoerlycken is Ende Mary ǁ met haeren momboir voerss. heeft geloeft als een principael sculdersse op haer ende op allen ǁ haer gueden hebbende ende vercrygende dese opdracht den heyligen sacramente ende der ǁ kercken voerss. altijt vast ende stentich te houden sonder eenich wederseggen Ende allen commer ǁ ende calaengie van haeren wegen daer inne wesende altemael aff te doen den selven Or ǁ conden hebben hier overgeweest scepenen in Oesterwyck Gysbrecht Loenyss. van Megen ǁ ende Claes Jan Timmermanss. die hueren zegelen in getuygenisse hier aen hebben gehangen ǁ int jaer ons heeren duysent vyfhondert vier ende tweyntich acht daeghe inde merte

Dorsale aantekening:

24 ǁ Die bruederscap vanden heyligh sacrament [*** er]wijck ǁ n 12