Oisterwijk

Peter soen Lauwreys Emmen heeft geloeft als een principael sculder te gelden ende te betaelen ǁ Henricke soen wilner Willem Emmen eenen jaerlijcken ende erffelijcken chijns van tweyntich ǁ stuveren in paeymente gelijck then termijnen vander betaelingen inder stadt vanden Bosch ǁ gemeynlijck ter boersen gaen zall. Allen jaer erffelijck op Sinte Mertens dach byschop inden ǁ wynter uut ende vander helft in eenen heyvelt gelegen op Wippenhout neven erffenissen Anschem ǁ Wouters deen zijde ende neven erffenissen Kaerle Cleynaerts optie ander zyde streckende vanden ǁ erffenissen Embrechs Henrick Emmen soen totter gemeynten toe. Item noch uut ende van allen end ǁ eenen yegelijcken zijnen anderen erffelijcken gueden soe waer ende tussen wijen die gelegen zyn ǁ ende men die ergent in zijnen naem bevijnden sall mogen rest in haerden in weeken in diepen ǁ oft in droegen als hij sede. Ende heeft geloeft die voers. Peter als een principael sculder ǁ op hem ende op allen zijnen gueden die hij nu heeft ende naemaels hebben ende vercrygen mach ǁ dese tweyntich stuvers erfchijns voers. te waeren als men erfchijns sculdich is te waeren. Ende ǁ dese voers. onderpanden voer die betaelinge des voers. erfchijns daer jaerlijcks uut te ǁ vergelden als voers. is altijt goet genoch waeldogende te maecken ende zeker genoch. Orconden ǁ hebben hier oever geweest scepenen in Oesterwijck Joost die Beer ende Jan Andriesz. ǁ Lambrechssen die huere segelen in getuygenissen hier aen hebben gehangen int jaer ons ǁ Heeren duysent vyfhondert ende vyfthien seventhien daegen in novembrij