Oisterwijk

Henrick soone wijlen Lambert Janssen als man ende momboir Josyna zyne huijsvrouwe dochtere wijlen Peter Jan Lam ǁ berts heeft wettelyck ende erffelyck vercocht heeren Goyaerden Henrixen van Gorchom presbiter ende altarist inder kercken van Oisterwijck ǁ Eenen jaerlycken ende erffelycken chijns van seventien carolus gulden tien stuijvers, den carolus gulden tot twintich stuijvers 't stuck gerekent off die werde ǁ daer voor in anderen goeden, gepermitteerden gelde Te vergelden ende te betaelen allen jaer erffelijck op Sinte Gertruijden ǁ dach, waer aft den jiersten betaeldach wesen sal, op Sinte Gertruijden dach nu jierstcomende van ende ut een huijs hoff ende ǁ gront, ende erffe daer aen liggende ende daer toebehoorende, drije lopens oft daer omtrent begrijpende, gelegen inde prochie van Haren ǁ inde Belversestraete, tussen erffe der kijnderen Dominicus Diericx aen deen syde, ende tussen de gemeyn straet aen dander ǁ zyde, streckende metten eenen eijnde aen erffe Gerit Peterss, ende metten anderen eynde aen erffe Jans soons Peter Jan Lamberts ǁ Ende nogh van ende uut een stuxken ackerlants twee lopens oft daer omtrent begrijpende gelegen ter plaetse voors., tussen erffe ǁ der kynderen Dominicus voors. aen deen syde, ende tussen erffe Gerits voors. aen dander syde, streckende metten eenen eynde aen ǁ eenen waterlaet aldaer ende metten anderen eynde aen erffe Henrickssone Henrick Lenart Heesters, als hij seede, omden voors. ǁ chijns bij den voors. heeren copere in eenen erffrecht te hebben ende te besitten, Gelovende die voors. copere in een erffrecht te ǁ hebben ende te besitten, Gelovende die voors. vercopere op hem ende op alle syne goeden hebbende ende vercrijgende, den voors. chijns van ǁ seventien tien stuijvers den voors. heere copere te waren alsmen erffchijns schuldich is te waren, ende de voors. onderpanden ǁ voor de jaerlycxe betaelingen vande voors. chijns altijt goet seker genoech ende weldogende te houden ende te maecken, ende allen ǁ anderen commer ende calangie inde voors. onderpanden wesende den selven aff te doen geheelijcken, uutgenomen vijff ǁ carolus gulden tsiaers aenden voors. heere vercopere jierst van rechts wegen daer uut te vergelden staen, Getuijgen waeren hier ǁ over schepenen in Oisterwyck Jan Janss Timmermans ende Adam Martens van Hees, die hunne segelen in getuijgeniss ǁ hier aen hebben gehangen, Opten dertienden dach martij int jaer ons heeren duysent ses hondert sevenendeveertich

J Peijnenburch 

Dorsale aantekening:

R

VII gulden op Henrick ǁ Lamberts tot Haren

f. 17 - 10 ǁ op Goijaert van ǁ Gorcum priester ǁ en altarist te ǁ Oisterwijk ǁ 13 Maart 1647