Oisterwijk

Marij dochter wilner Lauwreys Vrancken met haeren momboir daer toe van haer gecomen ende haer ǁ vanden richter als recht is gegeven heeft geloeft als een principael sculdersse Jannen zoen wilner ǁ Lauwreys Vrancken haeren brueder tot behoeff zijns ende tot behoeff van Geertruyen zynen zuster ǁ Anthonyse ende engelen onmondige kijnderen wilner Dirck zyns brueders ende tot behoeff van Elysabet ǁ ende Anne onmondige kijnderen wilner Elyzabetten zijnen zuster vercregen bij Marcken Ghijssels dat ǁ zij den selven gelden ende betaelen sal eenen jaerlijcken ende erffelijcken chijns van sesthien ǁ stuvers in paeymente als then termynen vander betalinge inder stadt vanden bosch gemeynlick ǁ ter boersen gaen sal alle jaer erffelijck op onser liever vrouwen dach purificatie waer aff ǁ den ijersten betaeldach wesen sal van onser liever vrouwen dach purificatie int naestcoemende ǁ oever een jaer vuyt ende van eenen huyze ende hoeve met zijnen gronde ende toebehoerten ǁ gelegen inder vryheit van Oesterwijck indie kerckstraet aldaer tussen erffenisse der kijnderen ǁ wilner Embrechs den greve optie een zyde ende tussen erfenisse Jueten weduwe wilner Willem ǁ Huysmans optie ander zyde streckende vander Kerckstraeten voers. totter erffenisse des ǁ persoens van Oesterwijck als zy sede Ende Marij met haeren momboir voers. heeft geloeft als ǁ een principael sculdersse op haer ende op allen haere gueden hebbende ende vercrijgende desen erfchijns te waeren ǁ alsmen erfchijns met recht sculdich is te waeren Ende dit onderpant voer die betaelinge vanden voers. erfchijns ǁ daer jaerlycx vuijt te vergelden als voers. is altijt goetgenoch waeldoegende te maecken ende zeker genoch ǁ met voirwaerden toegedaen dat Marij dese voers. erfchijns altijt sal moegen lossen ende quyten tot hoeren ǁ scoensten met sesthien rijnsguldenen van twintich stuveren t stuck in paeymente nu gevalueert zijnde ǁ metten jaerchijns ende metten achterstelle daer aff ofter dan eenigen onbetaelt stonde Orconden ǁ hebben hier oever geweest scepenen in Oesterwyck Wouter Thomaes Woutersse ende Wouter Jacop ǁ Stynen zoen die huer zegelen in getuygenisse hier aen hebben gehangen int jaer ons Heeren duysent ǁ vijfhondert ende neghentien op sinte Pauwels dach conversio ǁ [***]

Dorsale aantekening:

Marij dochter wilner Lauwrijs Vrancken ǁ verschijnende lichtmisse [***]