Oisterwijk

Condt sij eenen ijegelijcken, alsoe in voirleden tijden sekere questien, differentien, ende gescillen opgestaen ende geresen waren geweest, tusschen de gemeyn ingeseten der heerlickheyt ǁ van Boextele ter eenre, ende de gemeyn ingeseten der vryheyt van Oisterwyck, ter andere sijden, ter causen vander heyden ende gemeynten, tusschen Boextel ende Oisterwyck ǁ voirs. ende hen respective toebehoerende, gelegen, om d'welck, ende besundere de grote sware processen, die welcke dair uut ende nae souden moghen ende gescapen ǁ waren geweest te volghen, te verhueden, ende voirtaen minne, peijs, ende eendrectichheyt tusschen hen luden te maken, te vueden, ende te houden, soo fijn inden ijersten ǁ de selve partyen met malcanderen overcomen ende veraccordeert, als dat sy luijden van beyde syden, tot diverse stonden, sijn geweest opte plaitse contentiens ǁ te weten van weghen dier.. van Boextele, de edele ende wel geboren heere, heer Johan van Hoirne, baroen van Boextele, heere van Baucignijs etcetera ende met hem ǁ Peeter Henrick Hessels, ende Henrick Geritss als scepenen, Marten Wouterss, ende Gerit Elijass, als gesworen, Jan Driess, ende Jan Janss, als naegebueren van ǁ Boextel voirs., Ende van weghen der voirs. vryheyt van Oisterwyck, Godevaert Bogaerts schouteth Thomas Timmermans, Wouter Kolst, Jan de Bungher, ǁ ende Peeter Peynenborchs, als scepenen, Gerit van den Wiel ende Cornelis Embertss, als borgemeesteren der vryheyt van Oisterwyck, Ende hebben aldair malcanderen, ende ǁ deen den anderen henne palen ende limiten gedesigneert, henne previlegien, charten, brieven, ende andere schriftelijcke bescheet getoont ende geostendeert, ǁ oeck lecture dair aff ghedaen, t'vercleren van oude mannen ghehoirt, ende van als wel breet ende int langhe gecommuniceert, daer nae elck wederom ǁ nae huys vertrocken, ende hennen anderen scepenen ende raet van als rappoort gedaen, ende hen advijs daer op gehoirt ende genomen, Alsoe dat die voirs. partijen ǁ finalyck syn veraccordeert ende minnel(ijk) verleken, in vueghen , formen, ende manieren hier nae volghende, te weten dat sij luijden respective bevijnden, dat achtervolgende ǁ henne voirs. previlegien, carten, brieven, ende immemoriale duechdelycke possesie henne voirs. gemeynten van allen ouden tijden syn geweest, ende van nu voirtaen ten ǁ eeuwighen daghen, sullen sijn, ende blyven gescheyden, ende gesepareert mette palen ende limiten hier nae volgende, te weten den eersten paell, reen ende sceyden, ǁ een plaitse genoempt de Santvoirt, d'welck is een steechsken, lopende vander Belverscher straten suytwaert, op naeden stroom genoempt de Aa, ǁ accorderende op een wersen busken, staende opten cant vanden selven stroom, inden hoeck van eenen stuck beempts genoempt den Larenbeempt, daer die ǁ scauwe van Boextele gewoenlijck wordt aengeveert, wesende omtrent eenen worp weechs hoogher, dan dair den roosop loop, ende de voirs. Aa t'samen ǁ vergaderen, ende vander selver plaitsen lopende suytwairt lancx eenen langhen gracht van eenen heyvelt, ende vanden hoeck vanden selven heyvelt ǁ lopende linie recht, tot opten noortwesten hoeck naer Oisterwyck, vanden gracht van eenen heijcamp, genoempt de Crekelshoeve, ende soe voert ǁ lancx oft beneven den gracht, oft wall vande selve Crekelshoeve, totten suijtwesten hoeck vande selve Crekelshoeve, ende van daer linie ǁ recht, tot opten hoeck vanden gracht te Baelsvoirt, soe ende sulcx gelijck dat nu met vier distincte houte staken is affgetekent, ende zoe ǁ voirts lancx den wall oft gracht, streckende ende corresponderende tot opten pael, staende boven de brugge van Balsvoert, op conditie ǁ nochtans dat die van Boextel voirs., nyet en sullen moghen scutten, tusschen de voirs. Crekelshoeve, ende den heyvelt, noortwaert dair tegen over ǁ liggende, inde brende vande selve Crekelshoeve, groot wesende omtrent vier buenderen, Behoudelijk oeck, in soe verre men bevonde in toecomende ǁ tyden, dat die van Oisterwijck voirs., over die voirs. distincte Enighe gemeynte vercocht hebben gehadt, dat de selve vercocht ende betailt zullen ǁ syn ende blijven sonder becroenen oft opspraicke van ijemanden, Behoudelijck oeck onsen genedighen heere den hertoghe van Brabant sijns rechts ǁ gereserveert, Ende opdat alle poincten boven verhailt, van nu voirtaen ten eeuwighen daghen , vast, gestedich, ende van weerden moghen sijn ende blijven, ǁ gelijck partyen voirs. malcanderen gelooft hebben, ende geloven midts desen, Soe hebben wij Johan van Hoirne, baroen van Boextel voirs., onsen propren segele ǁ ende wij scepenen, gesworen , kerckmeesteren, ende heyligeestmeesteren etc: van Boextel, ons scependoms gemeynen seghele, Ende wij scepenen, borgemeesteren ǁ raidtsmannen, kerckmeesteren, ende heyligeestmeesteren der vrijheyt van Oisterwyck, onser voirs. vreyheijt gemeynen seghele, bij onser alder consent ende wel ǁ wetentheyt, desen brieve aen doen hanghen, Gegeven acht daghen, in octobri, int jaer ons heeren duijsent vyffhondert drye ende ǁ tsestich N:        

Dorsale aantekening:

Accord tusschen Boextel ende Oisterwijck ǁ P