Brussel (B)

Albert ende Isabel Clara Eugenia Infante van Spaignien ǁ bijder gratien Godts, Eertshertoghen van Oistenrijck, hertogen ǁ van Bourgoignen, van Lotrijck, van Brabant, van Lijmborch, van ǁ Luxemborch ende van Gelre, Graven van Habsborch, van ǁ Vlaenderen, van Arthois, van Bourgoignien, van Thirol ǁ Palsgraven ende van Henegouwe, van Hollant, van Zeelant, van ǁ Namen, ende van Zutphen, Marckgraven des heijlichs Rijcx ǁ van Roome, heere ende vrouwe van Vrieslant, van Salins ǁ van Mechelen, vande stadt, steden ende landen van Utrecht, ǁ Overijssel ende Groeninghen, Allen den genen die dese ǁ jegenwoirdige sullen sien ende hooren lesen, Salut, Doen te ǁ weten dat op heden datum der selver voor ende ten over staen ǁ van onsen seer lieven ende getrouwen Stadthoudere van onsen ǁ souvereijnen leenhove geordonneert in Brabant, heer Charles ǁ van Bourgoignen heere van Bredam etc. Edelman ordinaris ǁ van onsen monde, ende inde presentie vande leenmannen onderges. ǁ met namen Jan Michiels onsen getrouwen secretaris ǁ ende Greffier van selven onsen Leenhove, Willem de ǁ Goor, Joos van Ruinen ende Henrick Laurentij Marceelz. ǁ Compareerde Charles le Flameng de Jonge procureur postie ǁ lerende in onsen Raede van Brabant ende in onsen v(oorschreven) leenhove ǁ als procureur speciael ende irrevocabel ter saken ǁ naerbescreven behoorelijcken geconstitueert bij onsen ǁ lieven ende geminden Augustijn Raeps, commissaris vande

vivres van onsen legere in onse landen van herrewaerts ǁ overe soo voor sij selven, als inden naem ende gebruijckende ǁ de procuratie bij Adriana Willems sijne huijsvrouwe den xvii ǁ dach der maent van Decembri lestleden, voorden Greffie ǁ van onsen hove van Gelderlant tot dijen effecte op hem ǁ gepasseert, alles achtervolgende den bescheede van procuratie ǁ bij den voors. Augustijn Raeps hem comparant gegeven, ge ǁ passeert voor Borgermeesteren, Schepenen, ende Raedt onser Stadt ǁ van Antwerpen op den xxvi der voorleden maent van februario ǁ geteeckent A de la Faille, ende bezegelt metten segel ad causes ǁ der selver Stadt in groenen wasse, daertoe noch versien ǁ van onse behoorelijcke brieven van Octroij dienende tot validiteijt ǁ der selver sijne procuratie verworven in onsen voors.Raede ǁ ende onder onsen grooten zegel van Brabant opden lesten ǁ der voors. maent februarij geteeckent A. Baudewijns ǁ Alles aldus gethoont ende gebleken in origineel, de welcke comparant ǁ inde voornoemde qualiteijt heeft gekent ende geleden, dat ǁ tusschen sijnen voors. constituant ende Nicolaes van Ophoven ǁ als last hebbende van oijck onse geminde Henrick Pieterss ǁ van Offel ende Henrick vanden Berghe op den voors. XXVI ǁ februarij aengegaen ende gesloten is seker accordt ende minnelijcke ǁ conventie daer van den teneur hier naer volght ende luijdt ǁ aldus, Wij Jan van Brecht ende Cornelis de Wijse schepenen

van Antwerpen, maeken condt dat voor ons quamen Nicolaes ǁ van Ophoven coopman alhier, inden naem ende als om t'gene des ǁ naerbescreven wort te moghen doene, volcomentlijck gemech ǁ ticht van Henrick Pieterssen van Offel ende Henrick vanden ǁ Berghe woonende respective tot Venlo ende Ruijsborch ǁ apprehendanten, volgende de procuratie den sevenentwintichsten ǁ dach der maent Octobris lestleden voor Zeger vander ǁ Dort als notaris alhier ten bij sijne van sekere getuijgen ǁ gepasseert, ende in dijer qualiteijt ter eenre, ende ǁ Augustijn Raeps comissaris vande vivres geapprehendeerde ǁ ter andere sijden, ende bekenden ende verlijden t'samen over ǁ comende ende veraccordeert te sijn inder vuegen ende ǁ manieren naervolgende, Te weten dat de voors. Augustijn ǁ Raeps soe voor hem selven als inden naem ende gemechticht ǁ van Adriana Willems sijne huijsvrouwe bij procuratie gepasseert ǁ den XVII dach Decembris lestleden voorden Greffier ǁ vande Hove van Gelderlant, welcke voorscreven twee ǁ procuratien ten desen originelijck sijn gethoont, sal ǁ passeren transport ende onwederoepelijcke procuratie ǁ om t'selve transport inden Leenhove van Brabant            ǁ te vernijeuwen, tot behoeve vande voorgenoemden Henrick ǁ Pieterssen van Offel ende Henrick vanden Berghe ǁ vande drij hondert carolus guldenen erffelijck quijtbaer

den penninck sesthien met allen den ombetaelden ǁ achterstelle daer aff verschenen, die Christiaen ǁ Laureijssen van Ravensteijn den xxvi dach Octobris ǁ inden jaere xvic ende twelffve comparerende inde ǁ Souvereijnen Leenhove van Brabant vercocht ende gehy ǁ poteceert heeft tot behoeve vande voorgenoemden ǁ Augustijn Raeps ende sijne huijsvrouwe, op diversche panden ǁ ende parceelen van landen gelegen tot ende onder Oisterwijck, ǁ met sulcken conditie nochtans, ingevalle de voorgenoemde ǁ Augustijn Raeps aende voors. Pieterssen ende vanden Berghe binnen ǁ eenen jaere naest comende opleeght ende betaelt in ǁ contanten gelde de somme van vierduijsent ende een hondert ǁ guldenen metten interest daer aff rentsche wijse dat ǁ sij lieden gehouden sullen sijn hem Raeps ende sijne huijsvrouwe ǁ retransport te doen der voors. rente mette verloopen, ǁ oft cassatie te verleenen ende te passeren vanden ǁ selven transporte, ende laten corten t'gene bij hun vande ǁ verloopen der voorscreven Rente middelertijt sal ǁ sijn ontfanghen, ende hier mede sal doot ende te nijet te wesen ǁ ende blijven de gewillige condemnatie bij den voors. Augustijn ǁ Raeps den xxii dach Junij lestleden tot behoeve vande ǁ voorgen. Henrick Pieterssen ende Henrick vanden Berghe

voor den voors. Hove van Gelderlant gepasseert, mitsga ǁ ders de drij acten van taxatien van costen bijden selven ǁ Hove gewesen in Augusto oijck lestleden, ende bedra ǁ gende t'samen hondert tweentachentich Rinsghulden, twee ǁ en eenen halven stuijvers eens, en oijck die procedure ǁ metten costen ter saken vande voors. apprehensie alhier ǁ geresen, met allen t'gene int regard van d'een ende dandere ǁ der voors. partijen daeruuijt is geschiet ende gepasseert, ǁ mede compareerde Jan Hesius comissaris ordinaris ǁ van de vivres ende leger van hunne Hoochenden ende heeft ǁ gelooft ende is borge gebleven, gelijck hij gelooffde ende ǁ bleeff borge mits desen voorden voors. Augustijn ǁ Raeps, van dat de voors. rente van drij hondert Rinsghulden ǁ erffelijck aen nijemanden verbonden oft voor date deser, ǁ getransporteert en is, Verbindende daer voor sijn ǁ persoon ende alle ende ijegelijcke sijne goeden roerende ende ǁ onroerende hoedanich die wesen moghen, die hij nu heeft ǁ ende noch vercrijgen sal, ende mits desen soe geloeffde ǁ de voors. Niclaes van Ophoven den voorgenoempden ǁ Augustijn Raeps vrij ende buijten hachten te laten, soe ǁ haest als de vernijeuwinge vande constitutie der voors. ǁ rente inden Leenhove sal wesen gepasseert, Sonder ǁ argelist, in kennisse van dese brieven ende bezegelt met

onse segelen, Gegeven int jaer ons heeren alsmen screeff ǁ duijsent ses hondert ende negenthien sessentwintich dagen ǁ in februario, Onderteeckent A. Roose, ende besegelt met ǁ twee segels daerop gedruct in groenen wasse, Ende ǁ begeerende hij Comparant naer vermogen sijnder voors. ǁ procuratie tot voldoeninge ende achtervolgende den boven ǁ gescreven ende hier geinsereerden accorde, ten behoeve ǁ der voorgenoemde Henrick Pieterssen van Offel, ende ǁ Henrick vanden Berghe, onwederoepelijck overtegeven cederen ǁ ende transporteren, de voors. rente van drij hondert Rinsghulden ǁ t'sjaers mette verloopen van dijen, vallende altijt halff ǁ den iersten dach der maent van April ende halff den iersten ǁ Octobris, te quijten den penninck sestiene, geconsti ǁ tueert bij Christiaen sone wijlen Laureijs van Ravesteijn ǁ ende besedt ierst op sekere sijn goet geheeten den Wouwen ǁ broeck d'welck nu eenen beempt is gelegen onder ǁ Oisterwijck, metter visscherije streckende vanden ǁ Oisterwijckschen dijck totten watermolen toe Roeloffs ǁ van Donghen, item op drij beempden daertoe behoirende, ǁ den eenen genoempt den Vloet off den leegenbeempt, met ǁ een cleijn beempdeken geheeten den Steert, ende den derden ǁ beempt geheeten den Hoogenbeempt, item op een cleijn beemp ǁ deken geheeten Scheijnen beemdeken gelegen insgelijcx ǁ inde vrijheijt ende prochie van Oisterwijck westwaerts

aende gemeijnte van Oisterwijck, ende noortwaerts aende ǁ voors. visscherije, item op eenen acker zaijlants groot ǁ ontrent vier loopensaet gelegen rontsomme inde voors. beempden ǁ ende metten eenen eijnde aende voors. gemeijnte van Oisterwijck, t'eenen ǁ vollen leene, item noch op sekere hoeve geheeten t'goet ǁ ter Borcht, metter wooninghen molenen, landen cheijnsen, ǁ broecken ende allen anderen heuren toebehoirten oijck gelegen ǁ tot Oisterwijck voors. ten anderen leene, naer breeder ǁ uuijtwijsen der constitutie brieven daervan sijnde gepasseert ǁ in onsen voors. Leenhove opden xxvi Octobris des ǁ jaers xvic ende twelffve onderthekent Asbroeck, heeft hij ǁ Comparant in dijer qualiteijt onsen voors. Stadthoudere inde ǁ plaetse van ons gebeden, dat hij de voors. vercoopinghe ǁ ende opdracht soude willen aggreeren ende voor goet aenemen, ǁ ende consenteren inde onterffenisse ende goedenisse ǁ daer uuijt ende naer te volgen, daer over manende eenen ǁ onser voors. mannen van leen, om te weten hoes ende in ǁ wat manieren allen t'selve behoorelijck soude kunnen ǁ geschieden tot versekerheijt der voors. Henrick Peetersse ǁ van Offel ende Henrick vanden Berghe naer stijl ende ǁ coustume van onsen voors. Leenhove, Sulcx dat ǁ onsen voors. Stadthoudere van onsen twegen sijn consent ǁ ende wille daertoe dragende, eenen der voors. onse mannen ǁ van leen eens vonnisse daerop maende, de welcke hem

dijen aengaende beraden hebbende mette andere mannen ǁ van leene sijne medegenooten, brocht onsen voorscreven ǁ Stadthoudere wederomme over, wijsende voor een vonnisse ǁ met gemeijnen consent ende gevolghe van alle d'andere, dat de ǁ voors. comparant uuijt crachte sijnder voors. procuratie ǁ in handen ons voors. Stadthouders als inden onsen, de ǁ voors. rente van drij hondert Rinsghulden t'sjaers, te quijten ende ǁ gehijpoteceert als boven, ten behoeve des voors. Henrick

Pieterssen van Offel ende Henrick vanden Berge, opde ǁ conditien hier vore geinsereert, met eenen halm ǁ soude opdragen ende transporteren, ende voorts daer over ǁ worpen ende vertijen naer ons voors. Leenhoffs maniere, ǁ vercleeren sijnen voors. constituant off oijck sijne ǁ huijsvrouwe aende selve rente geen recht actie off ǁ gesach meer te competeren in eeniger manieren ǁ behoudelijck alleen de voors. faculteijt van lossinge ǁ binnen den tijde, ende opde conditien inde voor geinsereerden ǁ contracte naerder geruert, Alle d’welck de voors. ǁ Comparant gelijck onse voors. mannen van leen ǁ hadden geseght ende gewesen volcomentlijck ende al dede, ǁ hebbende tot dijen belooft inden naem sijnre voors. constitu ǁ anten de voors. rente te waerne jaer ende dach jegens

alle de gene die souden willen te rechte commen, ende te claerne ǁ tallen dagen los vrij ende quijte van allen commeren ende calaingien ǁ onder obligatie van hunne respective persoonen ende goeden ǁ roerende ende onroerende jegenwordighe ende toecomende, ǁ Desen aldus gedaen sijnde, heeft onsen voors. Stadt ǁ houdere inde plaetse van ons, t'sijnder manisse ende ǁ bij wijsdomme der leenmannen hier voor genoempt ǁ de voors. rente van drij hondert Rinsghulden t'sjaers opden ǁ last der voorscreven lossinghe, over gegeven ten behoeve ǁ der voors. Henrick Pieterssen van Offel ende Henrick ǁ vanden Berge, de selve daer inne gichtende ende goedende ten eeu ǁ wighen ende erffel(ijcken) rechte bij traditie vanden halm voor hun hunne ǁ hoirs ende naercomelinghen, aenden persoen van voors. Henrick ǁ vanden Berge, de welcke daer present sijnde ende t'gene ǁ voors. is alsoo accepterende voor hem ende den voors. ǁ Henrick Pieterssen van Offel ten gemeijnen behoeve ǁ indinis, heeft de voors. rente als sterffman van ons als ǁ hertoghe van Brabant aen onsen voors. Stadthoudere ǁ behoorelijck te leen ontfangen, doende ons dijen aengaende ǁ in handen des selffs ons Stadthouders hulde ende eedt ǁ van trouwen met alle andere devuoiren in sulcken cas gere ǁ quireert ende van oudts geploghen, ende onsen voors. Stadthouderen ǁ ontsinck hem alsoe in onse manschap, behoudelijck ons ǁ in desen ende in allen anderen dingen, onse hoocheijt Souvereijnitijt

Ende rechten, ende eenen ijegelijcken des sijns, Ende waeren hier ǁ inne geschiet alle poincten ende ar(tice)len van rechte die ǁ naer ons voors. Leenhoffs coustuijme daer inne hebben ǁ behoiren eenichssints geobserveert te worden, nijet ǁ daervan vergeten noch uuijt gescheijden, Alles sonder arch oft ǁ list, des toirconden hebben wij onsen voors. grooten segel ǁ van Brabant aen dese brieven doen aenhangen ende voorts bevelen ǁ onse mannen van leene dat zij hunne segels daer ingelijcx ǁ souden aenhangen bij den onsen, d'welck wij Jan Michiels, ǁ Willem de Goor, Joos vande Ruinen, ende Henrick Laurentij ǁ Marceels bovengen., als leenmannen hunder voors. hoocheiden ǁ onse genadichste heeren ende princen in desen hunnen Lande ǁ ende hertochdomme van Brabant present geweest sijnde ǁ daer t'gene voors. staet aldus gepasseert is, door het ǁ bevel der selver haere hoocheiden, ende tot meerdere ver ǁ sterckinghe der waerheijt geerne gedaen hebben, Gegeven ǁ bij ons Eertshertoghen binnen onse Stadt van Brussele ǁ opden sessentwintichsten dach der maent van Meerte ǁ des jaers van gratien xvic ende negenthiene

Byde Eertshertoghen ter ǁ relatien vande Stadthoudere

1619 ǁ J. Michiels

Secretaris Henrick van den Berghe voor ǁ dese brieve ende het rest vande sege ǁ linghe soo aengaende den grooten zegel ǁ van Brabant als anderssints ǁ XXIIII £ VII stuijvers

Dorsale aantekening:

Transport van leenrente ten ǁ behoeve van Henrick Pieterssen ǁ van Offel en Henrick vanden Berge ǁ dry hondert rinsguldens ǁ t'sjaers beset op seker goet ǁ geheeten den Wouwenbroeck ǁ onder Oisterwijck