Alphen

Anthonius Tsgrooten Bij den gedoighe Goids Abdt ende tghemeijne Convent de goidshuijs van onser Liever Vrouwen van Tongherloe, der ordenen van ǁ premonstreijt ende des bijsdoms van Camerijcke, Allen den ghenen die dese onse teghewoordighe opene brieven sullen sien oft hooren lesen, Saluijt, met ǁ kennissen der waerheijt, doen wij te wetene, hoe dat onse medebrueder, Brueder Wouter van Halen, priester ende religioes geprosessijt binnen onsen Goidshuijse ǁ van Tongherloe voers., persoen ende pastoor van onser kercken tot Ghestele bij Oesterwijck des bijsdoms van Luijdicke, in voerledene tijden (sonder ende buijten ǁ onsen consente ende oirloff) teghen ende van diversen persoenen, naer inhoudt van diversen scepenen brieven vander stadt van tsHerttoghenbossche, ghecoft ende vercreghen ǁ heeft, acht ende een halff mudden rogghen erffpachts ende jaerlijckscher renten, der maten van Woenssele, te heffenen ende te buerene, op ende uut zekeren huijsinghen, ǁ hoven, gronden, landen, ende erven, gelegen inder prochien van Woenssele, ter plaetssen geheeten op Verreacht, alsoe die scepenen brieven daeraff gemaeckt ǁ sijnde dat breeder inhouden ende begrijpen, welcke voers. VIII1/2 mudden rogghen erffpachts, naer desselfs Brueder Wouters begheertten, ende meijninghen, souden bij ǁ lanckheijt van tijden, comen ende devolveren totter Tafelen vanden Heijlighen Gheeste inder vors. onser kercken van Ghestele, op zeker lasten van aelmoessen die hij ǁ daer voere, begheerde jaerlijcks den armen menschen aldaer, gegeven ende uutghereijckt te wordden, tot diversen tijdeen ende stonden, naer inhoudt ende uutwijsen van ǁ desen scepenen brieven van tsHerttoghenbossche, daer dese onse teghewoirdighe brieven doorghesteken ende gheseghelt sijn, ende want egheenen religiose oft gheeste ǁ lijcke persoone gheoirlooft en is oft oick en behoirt, sonder consente ende oirloff van zijne prelate ende overste, aldus danighen voerscreven saken oft dinghen te ǁ attempteren, te doene, ende voets te keeren, ghemerckt dat overmidts den redenen voers., deselve saken ende dinghen nul ende van onweerden sijn, ende egheene stadt ǁ grijpen en moghen, ten ware bij alzoe, dat sijn prelaet ende overste, daer in consenteerde, ende expressen oirloff toe gave, Soe eest, dat wij ter oetmoe ǁ digher supplicatien ende beeden van Brueder Wouteren voers., ende ter jarnstigher begheertten, ende versuecke, van Jannen Peeter Ansems., ende van Willem Mathijs ǁ Roosen, als momboers ende provisoers vander voers. Tafelen vanden Heijlighen Gheest tot Ghestele voergenoemt, metten anderen ghemeijnen inghesetenen ende naegebueren aldaer, ǁ midts oick zekeren anderen merckelijcken redene, ons daer toe porrende ende moverende, Aenmerckende oick dat dese sake tendeert ter duecht ende ter charitaten ǁ ende laeffenisse der armer menschen, hebben daeromme denselven Brueder Wouteren, gheoorlooft ende gheconsenteert, niet te min oick hem belast ende bevolen, dat ǁ hij voer die scepenen ende wethouderen vander stadt van tsHerttoghenbossche, de voers. VIII1/2 mudden rogghen erffpachts, soude opdraghen, transporteeren ende overgheven, ǁ Ende der op eeuwelijcken ende erffelijcken renuntieeren ende vertijden tot des Heijlighen Gheeste van Ghestele, behoeff, oirbare ende profijte, dwelcke deselve Brueder ǁ Wouter, alsoe , opten neghensten dach in Meerte lestleden, naer inhoudt deser brieven vanden Bossche voers., in behoirlijcker formen ghedaen, ende volbracht heeft, ǁ welcke voerscreven opdracht, transpoort, ende overgheven, remonstratie, ende vertijdinghe, bij den vors. Brueder Wouteren gedaen, achtervolgende den tenure ende dat ǁ inhouden van desen selven scepenen brieven van tsHerttoghenbossche, wij Abdt ende tghemeijne Convent van Tongherloe voers., landeren, ratificeren ende approberen, ǁ ende overmidts der goeder affectien, gonsten ende begheertten, die wij totten Heijlighen Gheeste, ende totter laeffenissen vanden armen menschen, draghende zijn, ende ǁ oick dat wij begheeren, desen voers. wercke van charicaten deelachtich te wesene, Soe transporteren wij tghenen overe, ende draghen oppe, ende midts desen onsen opene ǁ bezeghelden brieven, renuntieren ende vertijden, eeuwelijcken ende erffelijcken voer ons, ende voer onsen naecomelinghen ten euwighen daghen, tot des voers. Heijlighen ǁ Gheeste van Ghestelle, behoeff, oirbaere ende profijte, op die voers. VIII1/2 mudden rogghen erffpachts, ende op alle alsulcken recht, acht, ende toesegghen, als wij, oft ons Goidshuijs ǁ van Tongherloe, oft oick Brueder Wouter voers., in enigher manieren hebben, gehadt hebben, oft enichsins moghen hebben, jae als ons soude moghen competeren ende aengaen ǁ aen dese voergenoemde VIII1/2 mudde rogghen erffpachts, ende gheloven oick voer ons, ende voer onsen naecomelinghen, ten euwighen daghen, den Heijlighen Gheeste van Ghestele vors., ǁ dese VIII1/2 mudde rogghen erffpachts, rustelijck ende vredelijck, van onsen weghen te laten heffen, hebben ende euwelijcken ende erffelijcken te laten ghebruijcken, sonder ǁ enichsins ter causen van desen, den Heijligheeste voers., iet meer in toecomenden tijden, te heijsschen oft te begheeren, met allen renuntiatien ende solempniteijten van ǁ rechte die hier toe dienen, behoiren, ende notelijcken sijn te ghescieden, Behoudelijcken, ende hier in voersien, dat die Heijlighegheestmeesters van Ghestele nu sijnde ǁ ende naemaels wesende, sculdich ende verbonden sullen sijn, jaerlijcks tot allen tijden, die aelmoessene den armen menschen te ghevene, te deijlene, ende uut te reijckene, ǁ ghelijckerwijs ende in alder manieren, Alsoe die scepenen brieven van tsHerttoghenbossche, daer dese onse brieven doorghehangen sijn, dat inhouden ende ǁ begrijpen, sonder fraude ende arghelist, ende ter corroboratien in kennissen ende toirconden van allen tghene des voerscreven staet, soe hebben wij Abdt ende tghemeijne ǁ Convent van Tongherloe voerghenoemt, dese onse teghewoordighe brieven met onsen ghemeijnen seghele ten zaken doen bezeghelen. Gegeven in onsen huijse van ǁ Nijeuweleijnde. inder prochien van Alphen, opten tweetsten dach in Meije, inden jaer onss Heeren duijsent vijffhondert ende sevenendetwijntich.

Dorsale aantekening:

Approbatie en transport ǁ vande Abdij van Tongerlo ǁ dato 12 Meij 1527 ǁ No. 6 en 7