Oisterwijk

Kennelijck sy eenen yegelycken wandt Dierick sone wylen Geraert Diericxssen vande Wiel ǁ naegelaten weduwe wylen Cristina syne huysvrouwe die wylen Aert Jacop Swaen, Syn tocht ǁ ende recht van tochten hem als hy sede toebehoirende in een stuck weyvelts vier lopensaet oft ǁ daeromtrent begrypende gelegen inder vryheyt van Oisterwyck ter plaetsen genoempt ǁ Cleyn Heye tussen erffenis Jan Wouterssen van Buerden aen deen syde ende tussen een gemeyn steghe ǁ aen dander syde streckende metten eenen eynde aen den gemeyn strate oft steghe ende metten ǁ anderen eynde aen een cleyn gemeyntken aldaer, als hy sede, wettelyck opgedragen ende ǁ overgegeven hadde Geraerden vande Wiele synen ende der voirs. Cristynens sone om daerop ǁ rentsgewyse te furneren ende te vesten een somme van vyfftich karolus gulden van twintich ǁ stuivers tstuck, gelyck dat in schepenen letteren van Oisterwyck daerop gemaeckt volcomelyck ǁ begrepen staet Soe is gestaen voir schepenen ondergescreven die voirs. Geraert sone ǁ Diericx vande Wyel ende wylen Cristynen voirg(enoemp)t, ende heeft wettelyck ende erffelyck vercocht ǁ Willemen sone Adriaen Cornelissen van Buerden eenen jaerlycken ende erffelycken chyns van ǁ drye karolus gulden van twintich stuivers tstuck oft de werde daervoir in anderen goeden gelde ǁ te vergelden ende te betalen allen jaer erffelyck int hoochtyt van alderheyligen waeraff ǁ den iersten betaeldach wesen sall int hoochtyt van alderheyligen nu yerstcomende van ende ǁ uuyt den stuck weyvelts hier boven genoempt om den voirs. chyns byden voirs. Willemen ǁ copere in eenen erffrecht te hebben ende te besitten Gelovende die voirs. Geraert vercopere ǁ als schulder principael op hem ende op alle syne goeden hebbende ende vercrygende den voirs. chyns ǁ van drye karolus gulden den voirs. copere te waren als men erffchyns schuldich is te waren, ende ǁ tvoirs. onderpandt vande jaerlicxe betalinge vande voirs. chyns altyt goet selvergenoech ende ǁ weldogende te houden ende te maken, ende allen anderen commer, calangie ende aentael ǁ daer inne wesende den selven aff te doen gehelycken uuytgenomen eenen stuiver erfchyns ǁ inden gebuerchyns van Oisterwyck, noch twelff karolus gulden tstucs staende te loss met ǁ twee hondert karolus gulden Aleyda Thomas beyde yerst van rechtswegen daer uuyt te ǁ vergelden met conditien hier inne toegedaen dat die voirs. vercopere den voirs. chyns ǁ van drye karolus gulden sal moghen lossen ende quyten altyt alst hem gelieven sal smaels ǁ ende eens mette somme van vyfftich gelycke karolus gulden metten jaerchyns ende metten afterstel ǁ ten thyde vande lossinge ten achteren ende ombetaelt staende Behoudelyck dat hy gehouden sal ǁ wesen den loss een halff jaer te voorens wettelyck op te seggen. Getuygen waren hierover ǁ schepenen in Oisterwyck Dierick Geraertssen vande Wiel ende Jan Wouterssen van Buerden die ǁ huere zegelen in getuygenisse hieraen hebben gehangen op ten vierentwintichsten dach van ǁ december int jaer ons Heeren duysent sesshondert ende tweeendertich

B. van Loevel [***]

duplicetur ǁ Littera empt……

Dorsale aantekening:

Ick ondergeschrevenen kenne ende lijde midts desen dese renthe ǁ op tandere sijde begrepen staende aen mijnen handen gelost ende gequeten ǁ te sijn door Wouter Gossen Peijneborchs opten 10e mert 1648 met ǁ de somme van L gulden capitaels ende XVI gulden XIIII stuivers voor het verloop ǁ vanden intrest ende sal van VIIen jaer ende sal hier omme toonende ǁ dese ten prothocolle mogen gedoodt weerden oirconde hebbe dit ǁ onderteeckent actum ten dage in jare als boven

Adriaen van Scholl

Willem van Buerden ǁ III gulden tsiers IX

Geraert Diercx zoen ǁ vande Wiel tot Oysterwyck