Moergestel

Wij Jan Gerit Diercxse ende Jan Henrichs Cremer scepenen in Gestele bij Oisterwijck tuijghen onder ǁ o[ns]en gemeijnen segele dat voor ons comen is Gerit Jan Gerit Diercxe heeft wittelijck ende erffelijcke ǁ geloeft te gelden ende te betaelen Adriaen Adriaen Bernaerts een jaerlijcke ende erffelijcke pacht van een mudde ǁ roggen der maeten van Ghestele allen jaer verschijnende op onser lieve vrouwen dach lich tmisse waer aff ǁ den iersten verschijndach sall sijn op onser lieve vrouwendach licht misse int jaer toecomende aldernaest ǁ ende dat van ende uuijt een stuck lants eckerlants genoempt aent cruijs groot wesende ǁ ontrent twee lopensaet metten een eijnde aende gemeijnen vaerwech ende mette de andere ǁ eijnde mette ander sijde aen erffenisse Aelbert Jacobse van Dooren en dander sijde aen erffenisse ǁ Mathijs Wijns van ende uuijt noch een stuck eckerslants genoempt dye strepe groot ǁ ontrent twee lopensaet inde voirs. prochien inder molen eckeren metten eenen eijnde ǁ aende gemenen vaerwech dander eijnde aen erffenisse Hanrick Jan Geritsen deen sijde Jan ǁ van Doeren dander sijde aende erffenisse der weduwe Jan Gooesens Verachtert met ǁ hare kijnderen Ende Gerit voirs. heeft voorts geloeft gelijck dije manieren is op hem ǁ ende op alle sijne goeden hebbende ende vercrijghende dese erffve te weren ende altijt goet seker ǁ ende waeldoghen te maecken als voor dit mudde roggen tsiaers erf pachts voirs. Gegeven ǁ int jaer ons heeren geboorte duijsent vijffhondert drie ende tsestich den vijffsten februarij