's-Hertogenbosch

Goijaert Gijsberts van Elderen wonende tot Moergestel wettich ǁ naergelaeten weduwnaer van Goijaerden sijne huijsvrouwe, weduwe Jans Bernhards, gemechticht tot sgeens ǁ naervolgende is, door crachte vande testamente lesten ende uijtersten wille bij hem mette voors. ǁ sijne huijsvrouwe tsaemenderhant gemaeckt, ende voor Schepenen tot Moergestel gepasseert, ǁ wesende vander date den ciie octobris cvic eenen tsestich, ende uijt cracht der macht hem als langhstlevende ǁ daer bij soo blijckende was gegeven ende verleent, heeft midts desen wettelijck ende erffelijck ǁ vercocht Wernharden Janssen van Berlicom, eenen jaerlijcken, ende erffelijcken chijns van ǁ vijff carolus guldens tot twintich stuijvers goets ganckbaers gelts elcken gulden gereeckent ǁ te betaelen alle jaer erffelijck opden tienden dach der maent Aprilis, ende voor den eersten ǁ termijn van betaelinge opden tienden Aprilis CVIC negen en tsestich ende binnen deser stadt ǁ vrij van alle lasten egeene lasten uijtgescheijden te leveren, van ende uijt een stuck ǁ teulants ontrent vijff thalff loopensen groot sijnde, gelegen tot Moergestel voors. ǁ aen t Stock eijndt neffens erve Paulis den Brouwer aen d'een zijde, ende neffens ǁ erve Marcelis Adriaensen de Bresser aen d'andere zijde, streckende van de heerbaen ǁ tot op erve Jans Paulis Rijcken, vanden selven coopere metten erffrecht te hebben, ende ǁ te besitten, ende heeft die voors. vercoopere de voors. chijns aenden voorn. coopere ǁ opgedraegen met helmelinge verthijdenisse inne manieren inne dijen gewoonlijcken sijnde ǁ Gelovende die voors. vercoopere als schuldenaer principael op verbant van sijnen persoon ǁ ende allen sijne goederen present ende toecomende dat hij den voors. coopere van den ǁ voors. Chijns schuldige ende gerechte sal doen warandscappe, ende dat hij allen anderen ǁ commer, calangie, ende aentael inden voors. onderpande wesende oft comende den ǁ voors. coopere aff sal doen ges[***] uijtgenomen eenen stuijver twelff penningen ǁ grontchijns, aenden heer van Moergestel [***] eerst jaerlijcx ende van Rechtswegen daer uijt ǁ te vergelden staende gelijck hij seijde, ende dat hij oock de voors. onderpanden voor ǁ de betaelinge des voors. chijns aen den voors. coopere jaerlijcx als voor daer uijt te ǁ vergelden, altijdt goet genoch, ende weldeugende sal maecken ende houden, met conditien inne ǁ desen toegedaen, dat de voors. vercoopere den voors. chijns van vijff guldens tot allen ǁ tijden sal mogen lossen ende quijten [tussens] ende teenemael mette somme van een hondert ǁ carolus guldens tot twintich stuijvers goets permissie gelts elcken gulden gereeckent ǁ et metten loopenden jaerchijns ende achterstellen alsdan daer van ten achteren ende onbetaelt ǁ staende, behoudelijck dat men schuldich ende verbonden sal sijn den voorn. losch een halff ǁ jaer te vorens wettelijck [aen te con]digen ende op te seggen, Getuijgen waeren hier ǁ over Schepenen inne sHertogenbosche Aernaut van Tienen, ende Geraert Tielemans ǁ van Breuge[l]e Gegeven den tienden dach der maent Aprilis int jaer ons heeren duijsent ǁ ses hondert acht ende sesstich

[***] Litera caftini? [**]

Linkermarge:

Ruijss ǁ 4 ǁ 1668

Dorsale aantekening:

Moergestel ǁ constitutie V gulden ǁ uijt onderpanden aldaer