Oisterwijk

Henrick geheyten van Ethen zoen wilnen Gyeliis van Ethen een stuck lands een zestersaet lands of dair omtrent begriipende ǁ totten voirs. Henricke behorende gelegen inden prochyen van Oesterwiick ter stede geheyten in die hukelems ackeren ǁ tusschen der erfenissen Ambrosius geheyten Broes Ians soens vander Steghen op beyden ziiden aenliggenden strec ǁ kende metten enen eynde noertwaert aen erfenis Aleyten Katers ende hoire kiinder ende metten anderen eynde suytwaert ǁ aen erfenisse Henricke van Ethen voirs. ende Ians siins natuerael soens Ende in alder groette dat dit voirs. stuck ǁ lants aldair gelegen is ende totten voirs. Henricke van ethen behorende is als hy seyde heeft hy witteliic ende erfeliic ǁ vercoft Ambrosius geheyten Broes zoen wilner Ians vander stegen vanden selven copen in een erfrecht te hebben ǁ ende te besitten heeft overghegheven ende opgedragen met afgaen ende vertyen als dair toe behoirliic is Ende ǁ hebben geloeft Henrick vercoper ende Ian siin natuerael soen voirs. als sculdene principael gesamenderhant ende ǁ ongesceyden op hen ende op allen hoir goede die sii nu hebben ende namaels hebben ende vercrigen moghen dit voirs. ǁ stuck lants den voerghenoemde Ambrosio geheyten Broes copen te warnen tot euwigen daghen vry ende los alsmen erve dat ǁ en ghenen commer en dreeght sculdich is te warnen ende allen commer ende calangie dair in wesende altemael afte ǁ doen den selven orconden hebben hier overgeweest Scepenen in Oesterwiick Ian vander Elst ende Mathiis die Gruyter ǁ die hoir zeghelen in getugenisse hier aen hebben gehanghen int Iaer ons heren dusent vyer hondertveertich ende negen ǁ des anderes daghs na den heyligen Ascensi dach ons heren drie ende twentich daghe in meye

Dorsale aantekening:

Brief Ians soen vanden stegen ǁ dit is [***] brief van ǁ [***] Ians soen ..stege ǁ [***] Henric ǁ van Ethen