Oisterwijk

Arnt van Uden als man ende mombair van Dircxken sijnder huijsvrouwen dochter wilner Jans van ǁ Thijenrode een stuck ackerlants een lopensaet ende seventhien roeden off daer omtrent begrijpende ǁ gelegen inder prochie van Oesterwijck ter stede geheijten Huecelum voir d'Broeck aldaer ǁ tussen die gemeijne straet nae Tilborch gaende aen deen sijde ende tussen den erve Wouter Cornelisz. ǁ aen dander sijde welck stuck lants voirs. Arnden als man ende mombaer van Dircxken sijnder ǁ huijsvrouwen voirs. overmidts der doot wilner Jans van Thijenrode ende wilner Mechtelden sijnre ǁ huijsvrouwen moeder Dircxken voirs. metten recht van versterve erffelijck aencomen is ende ǁ in eender erfdeijlinge metten heeren vanden lande gedaen te deele gevallen is gelijck in ǁ scepenen brieven vanden Bosch daer op gemaeckt volcomelijck is begrepen heeft hij wittelijck ǁ ende erffelijck opgedragen ende overgegeven Jannen soen wilner Andries van Gilse ǁ metten voirs. brieven ende mett allen den recht hem daerinne enichsins toebehorende met ǁ afgaen ende verthijen als dat gewoenlijck is. Ende heeft geloeft Arnt voirs. als sculdenaer ǁ principael op hem ende alle sijne gueden die hij nu heeft ende namaels hebben ende ǁ vercrijgen sall mogen dit voirs. stuck lants den voirs. Jannen te waeren als men erffenisse ǁ schuldich is te waeren ende allen commer ende calaengie daer inne wesende alte mael afte doenen ǁ oirconden hebben hier over geweest scepenen in Oesterwijck Wouter Roelof Peijnenborch ǁ ende Claes Jan Tijmermanss. die hen segelen in gethuijchgenisse hier aen hebben ǁ gehangen. Int jaer Ons Heeren duijsent vijfhondert vijf ende dartich den achtsten dach januarij

Dorsale aantekening:

Jan van Gilze