Brussel (B)

Philips byder gratien gods Coninck van Castillen van Leon van Arragon van Ingelant ende Vrancrycke Eertshertoge ǁ van Oistenryck hertoge van Bourgoingnen van Lotryck van Brabant etcetera Den iersten van onsen deurweerderen oft boden macht hebbende t'exploicteren bynnen onsen lande van ǁ Brabant hierop versocht saluyt Wij hebben ontfangen die supplicatie van burgmeesteren scepenen ende gezwoeren der vryheyt van Oisterwijck representerende ǁ de gemeinte aldaer inhoudende/ hoe dat hen supplianten tot prouffite ende oirboir van der voirs. gemeynten voer tyden by den hertoge van Brabant is verleent geweest ǁ zeker octroy ende consent naedemael by onsen heere ende vadere den Keyser geconfirmeert ende geapprobeert Om uuyt crachte van dien te moegen vercoopen ende t'erffve ǁ uuytegeven zekere quantiteyt van heure gemeynten Om die gemeyn lasten van der voirs. vryheyt daermede te vervallen Soe hebben de supplianten ontrent acht ǁ oft negen maenden geleden ombegrepen uuyt crachte ende naevolgende den inhoudt van den voirs. octroye ende confirmatie voirs. Geprocedeert by voergaende ǁ proclamatien ende subhastatien tot vercoopinge van ontrent negen bunderen uuyter voirs. gemeynten die welcke zy hebben aen verscheyden persoenen vercocht ǁ ende t'erffve uuytgegeven gehadt mits den voirs. hertoge op elck bundere gereserveert eenen ouden grooten cheys tot eeuwigen dage te betalen naer inhoudt ǁ van den voirs. octroye ende confirmatie daer af zynde Welcke voirs. negen bunderen alzoo in [punicie] van onse rentmeestere int quartier van den Bossche ǁ ende leenmannen zyn afgepaelt ende uuytgegeven geweest Ende hebben die coopers daernae geweest ende behoirden te blyven in peysibelycke ende ǁ vredelycke possessie van den selven erven Behalven dat ontrent XV oft XVIe dagen geleden eenige quaetwillige hen hebben secretelycken by nachte ende ǁ ontyde gevoirdert die grachten van den selven erffven af te worpen ende ruymeren ende die boomen daerop staende uuyt te royen ende ontstucken ǁ te slaen ende anders syne die palen by onsen voirs. rentmeestere aldaer gestelt te violeren d'welck nyet alleene en tendeert tot groeten achterdeele ǁ ende prejudicie van den supplianten die voerdaen als hen van noode ware eenige quantiteyt van gemeynten uuytegeven oft te vercoopen de selve nyet ǁ geveugelyck aen souden cunnen vercoopen emmers en souden tot zulcken pryse nyet gepennewaert worden Maer is oick grotelycx tenderende ǁ tot vilipendentie van onse hoocheyt ende in vercortinge van onsen cheysen Ende noch meer zyn soude en worde den supplianten hierinne nyet ǁ versien met onse behoirlycke provisie inder saken dienende alzoo zy seggen Ons van de selve oitmoedelyck baddende Waeromme soe eest ǁ dat wy des saecken voirscreven overgemerckt ende hierop gehadt t'advis van onsen voirs. rentmeestere int quartier van den Bossche, ende van onsen procureur ǁ general in Brabant u ontbieden ende committeren by desen Dat ghy van onsen weghen by openbaren edicte ende publicatie zeer scerpelyck interdiceert ǁ ende verbiedt eenen yegelycken van wat state oft qualiteit hy zy dat zy hen verdragen eenige grachten lymiten oft paelen van de voirs. oft ǁ eenige andere uuyt gegeven erven eenichssins meer te rueren om uuyt oft neder te worden in secreet oft openbaer op de pene van arbitraerlyck ǁ gecorrigeert te worden nae gelegentheyt ende exigence van den feyte ende delicte maer soe verre zy hen totten voirs. erffven enich recht ǁ oft actie pretenderen te competeren oft anderssins by de voirs. uuytgevinge gegraveert oft vercort te zyne dat zy dien aengaende ǁ hen actie intenteren daer ende alsoe dat behoiren sal Ende soe verre u dit doende gebeure eenige oppositie Soe daecht den opponent ǁ oft opponenten te compareren t'eenen zekeren gelegende dage voer onsen zeer lieven ende getrouwen die cancellier ende luyden van onse Rade ǁ geordonneert in Brabant Om aldaer te seggen de redenen van heure oppositien Ende van des te doene geven wy u volcommen macht ǁ ende zonderlingh bevel by desen Gegeven in onse stadt van Brussele den XXIXe dach meerte int jaer ons Heeren duysent ǁ vyfhondert [zessenvyftich] voer paesschen Van onsen rijcke van Spaengien ende Sicillien [***] lande van Ingelant ende Vrancryck

By den coninck ǁ In zynen rade ǁ J. de Perre secretaris

Rechts:

X Stuyvers

Dorsale aantekening:

Mandement van de ǁ instotinge van den ǁ Gagelrys ǁ Numero [***]