Oisterwijk

Margariet weduwe wilner Aert Goeswiins metten momber der selve Margarieten van hoeren toe ghewesen ǁ ende haer vanden richte ghegeven alsoe als recht is alsulken recht ende recht van tochten als sii besittende is ǁ in onderhalf mudde rogghen iaerlics ende erfelics pachte allen iaer erfelic op onsen lieve Vrouwen Dach purificatie ǁ te gelden ende te betalen uut ende van enen huiise ende hove met siine gronde ende toebehoerten ghelegen inder ǁ prochien van Oesterwiick in een stede gheheiiten Carcoven tusschen de erfenisse Henrics van Uden op beiiden ǁ siiden hem aenliggende streckende vande erfenisse der erfghenaemen Aert Goeswiins totten ghemeiinde straeten ǁ toe alder alsoe ziide ende welc onderhalf mudde rogghen erfspachts voirs. der voirs. Margarieten met ǁ recht van versterve toecomende is van wilner Henric vanden Amervoirt hoeren oom alsoe sii zeede heeft ǁ sii wittelic ende erfelic overghegeven ende opghedraegen Goeswiinen ende Henricken ghebrueders Adriaen ǁ Heyen soen wilner Ghiisbrecht Heyen als wittighe man ende momber Hyllegont siins wiifs Andries soen ǁ van Wiitmans weduwaer wilner Liisbetten siins wiifs ende Ian Stempels soen wilner Ian Stempels ǁ als wittighe man ende momber Margarieten siins wiifs den kynderen wilner Aert Goeswiins met afgaen ǁ ende verbinden als daer toe behoirelic is, Ende heeft gheloeft Margariet met hoeren momber voirs. als een principael ǁ sculders in goeden trouwen nummermeer totter voirs. tochten wederom te comen met gheenderhand recht gheeste ǁ lic off werlic, dwelck gheschiet soe siin ghestaen voir scepenen hier onder ghescreven, Goeswiin ende ǁ Henric ghebrueders soenen wilner Aert Goeswiins voirs. Adriaen Heiien soen wilner Ghiisbrecht Heyen als wittige ǁ man ende momber Hyllegont siins wiifs dochter wilner Aert Goeswiins voirs. Andries soen Ian Wiitmans ǁ weduwer wilner Lysbetten siins wiifs dochter wilner Aert Goeswiins voirs. dwelc gheloeft heeft voir hen ǁ selven ende voir die onmondighe kiinderen die die selve Andries bii Liisbetten siinen ghetrude wiive ghewonnen ǁ ende ghecreghen hadde doen sii loofde dat hii inbrenghen sal tot houfs mondighen daghen ende daerop verbinden op ǁ desen pacht vanden onderhalven mudde rogghen voirs. ende Ian Stempels soen wilner Ian Stempels als wittige ǁ man ende momber Margarieten siins wiifs voirs. dochter wilner Aert Goeswiins voirs. onderhalf mudde rogghen ǁ iaerlics ende erfelics pachts tot hen behorende allen ende oeniieghelic erfelic te vergelden op onsen lieven Vrouwen ǁ Dach purificatio uut ende van desen onderpanden voirs. hebben sii wittelic ende erfelic overghegeven ende ǁ opghedraeghen Ian Boyen soen wilner Henric Boyen tot behoef siine selves ende tot behoef Elysabet siinre ǁ zuster te samen met allen scepenen lettren ende voirwaerden die daer af siin metter maken ende ghewach doen met afgaen ǁ ende verbinden als daer toe behoerlic is, Ende hebben gheloeft Goeswiin ende Henric gebrueders voirs. Adriaen Andries ǁ ende Ian voirs. als principael sculderen ghesamenderhant ende onverscheyden op hen ende op allen hoer gronden ǁ die sii nu hebben ende naemaels hebben ende vercrighen moeghen dit overgheven opdraeghen afgaen ende verbinden voirs. ǁ den voirs. Ian Boyen ende Liisbetten siinre zuster voirs. ewelic ghestendich ende vast te houden ende in hennen naem ǁ de desen houden stendich ennoch wederseggen ende allen commer ende calangie van hoeren tweghen hier in wesende ǁ alte male af te doen den selven orconden hebben hier overgheweest scepenen in Oesterwiick ǁ Govaert van Hulsen ende Embrecht Henric Embrecht soen van Ryele die hoer zeghelen in ghetuige ǁ nisse hier aen hebben doen hanghen int iaer ons heeren dusent vierhondert tsesticht ende ǁ neghen drieentwinticht daghe in februario

Dorsale aantekening:

vanden erfenisse ende ǁ twee huijskens liggende ǁ tussen mijne erfenisse ǁ van mijn hoeve tot ǁ Carchoven ǁ iiiii

bii Cartharina dochter Ians ǁ Peter Melis [***] ǁ 29 maij anno 1565 ǁ vercoft in [***]