Oisterwijk

Jan Andries Lambrechts soen ende Anthonis Wangen als meesteren ende provisoeren der fabrycken der kercken van Oisterwyck ǁ met consent v[anden] persoen ende scepenen van Oisterwyck hebben geloeft opte verbyntenisse van allen den gueden der ǁ voers. fabrycken hebbende ende vercrygende Marien dochter wilneer Henrix Toeyts. Dat die kerckmeesters ten tyde wesende ǁ naeder doot van Marien voers. sullen voer vyff ryns gulden erfchyns die dese Marie huyden des daigs voer scepenen van ǁ Oisterwyck tot behoeff der voers. fabrycken overgegeven heeft ende noch voer negen ende dertich ryns gulden van twintich ǁ stuveren t stuck die zy den selven oick huyden in gereden penningen betaelt ende getelt heeft ten ewigen daigen doen ǁ celebreren voer haer Henricken Toeyt ende Agnesen haer vader ende moeder een jaergetyde opten lesten saterdaige ǁ van meye ende doen singen vigilie van negen lessen metter missen. Ende sullen daer voer geven den pastoer van ǁ Oisterwyck twee stuvers elcken vanden altaristen residerende tot Oisterwyck eenen stuver den scoelmeester voer ǁ hem ende zyn jongeren twee stuver. Den coster van huyden eenen stuver. Ende sullen die persoen mitten altaristen ende ǁ scoelmeester met zynen kynderen naeder missen gaen ten grave van haer ende haeren ouders singende Libera me Domine ǁ ende lesen opten graft ten comondatie soemen dat gewoenlycken is te doene ende soe wyt int jaergetyde nyet ǁ tegenwordich en coempt die en sal nyet hebben. Ende sullen die kerckmeesters oick setten optie baer vier wassen ǁ kerssen bornende duerende den tyt vander vigilien ende missen voers. noch sullen zy ten ewigen daigen op elcken ǁ onser liever vrouwen daich diemen tot Oisterwyck vierrende is wetende optie seven hoichtyde van onser ǁ liever vrouwen doen celebreren een misse op onser liever vrouwen altaer tot Oisterwyck ende noch ǁ alle jaer opten heiligen korsdaich ten ewigen daigen doen celebreren vyff missen voer haer ende haere ouders ǁ zielen salicheyt ende hier in by gestaen heer Anthonis van Nuwenhuys persoen tot Oisterwyck ende heeft ǁ dit jaergetyde voer hem ende voer zyn nacomelingen geconsenteert orconden hebben hier over geweest scepenen ǁ in Oisterwyck Jacop Buckincks Aerts zoen ende Willem vanden Dyck Willems soen die heur segelen in getuych ǁ enissen hier aen hebben gehangen int jaer ons heerren duysent vyffhondert ende derthien inden hoochtyde ǁ van sinte mathys apostel

Dorsale aantekening:

[***] fabrice ecclesie de oesterwijck