's-Hertogenbosch

Jan sone Willem Peeter Jonckers woonende tot Haren onder Oisterwijck als wittiche ǁ man ende momboir van jenneken sijne huijsvrouwe dochtere Gijsberts Henricx Heesters, heeft ǁ wittelick ende erffelick vercoft Johanna Somers dochtere wijlen Jans Somers Wouterss. tot behoeff van ǁ Anna van Hees haere moedere wedue Jans Somers voornoemd, eenen jaerlicken ende erffelicken chijns van ǁ twintich carolus gulden, tot twintich stuijvers goets gancbaers gelts elcken gulden gereeckent, te ǁ betaelen alle jaer erffelick opten sevenentwintichsten dach der maent van jnauario ende voorden iersten ǁ termijn van betaelinge opten sevenentwintichsten januarij anno xvic drijenveertich, ende binnen dese stadt ǁ vrij van alle beeden, exactien, subuentien, tiende, twintichste, honderste, meerder ende mindere penningen ǁ commeren, scattingen ende lasten gewoonlijcke ongewoonlijcke, ingestelt ende naemaels ingestelt te ǁ worden egeene lasten uutgescheijden te leveren ende te vergelden, van ende uut eenen ackerlants genaemt ǁ den cleijnen acker, vier loopensaten oft daeromtrent begrijpende, gelegen inde heerlicheijt van Helvoirt, ǁ tussen erve des heere van Helvoirt, ende Jennekens wedue Adriaens de Groot aen d’een zijde, ende ǁ tussen erve Cornelis Willems aen d’ander zijde, streckende metten eenen eijnde aen erve der ǁ kijnderen Adriaentkens dochtere Gijsbert Henricx hiertegens affgedeijlt, ende metten anderen ǁ eijnde aende gemeijne straete, ende alnoch van ende vuijt, de helfte van eenen hoijbeempt vier ǁ lopensaten lants oft daeromtrent int geheel begrijpende, gelegen inde voors. parochie van Haren ǁ ter plaetse genoemt int Oirtbroeck, neffen erve Neelkens wedue Adriaens Peeter Coppens ǁ aen d’een zijde, streckende metten eenen eijnde op erve Jennekens wedue Adriaens de ǁ Groot ende metten anderen eijnde op erve Christine wedue Henricx Schellekens, mitsgaders ǁ alnoch van ende uut huijs, hoff bogart ende erfenisse dienaenliggende, drije loopensaeten ǁ lants oft daeromtrent begrijpende, gelegen tot Haren voors. neffens de gemeijne straete aen ǁ deen zijde, ende neffen erve Jans Gijsberts Henricx ende Andries Gijsberts Henricx eenen ǁ gemeijnen waterlaet tussen beijde loop ende aen d’ander zijde, streckende mitten eenen eijnde ǁ op erve Neelkens wedue Adriaens Peeter Coppens ende metten anderen eijnde opde gemeijnte ǁ aldaer, soo hij verclaerde, vander selver Anna van Hees metten erffrecht te hebben ende ǁ te besitten, ende heeft die voorn. vercooper den voors. chijns der voorn. Johanna Somers tot behoeff ǁ ende voors. Anna haere moeder opgedragen met helmelinge vertijdenis inne maniren indien ǁ gewoonlijck zijnde, geloevende die voors. vercooper als sculdenaer principael op verbant van sijnen persoon ǁ ende alle zijne goederen present ende toecomende, dat hij der voorn. Anna vande voors. chijns sculdige ende ǁ gerechte sal doen warantscap, ende dat hij allen anderen commer, calangie ende aentael inde voors. ǁ onderpanden wesende oft comende der voorn. Anna aff zal doen geheelicken, uut genomen eenen erffelijcken ǁ chijns van vijff ende eenen halven stuijvers aen heer Goijaert Willems. altarist tot Oisterwijck ǁ vande alnoch eenen erffelicken chijns van seven ende eenen halven stuijvers aendan heere van Helvoirt ǁ ierst jaerlicx van rechts wegen daeruut te vergelden staende, soo hij seeghde, ende dat hij oijck ǁ de voors. onderpanden voorde betaelinge des voors. chijns der voorn. Anna jaerlicx daerwt als voors. ǁ staet te vergelden altijt goet genoech ende welduegende sal maecken ende houden mit conditien in ǁ desen toegedaen dat die voors. vercooper bij voorn. chijns sal mogen lossen ende quijten tot allen ǁ tijden teffens ende tegeenemaele met de somme van vierhonderd carolus gulden tot twintich st[uivers] ǁ goets gelts den gulden gereeckent, inspecie van rijcxdalders tot twee gulden thien stuijvers t’stuck ǁ ende metten loopenden jaerchijns ende achterstellen ten tijd der aflossinge vanden voors. chijns t'achter ǁ ende ombetaelt staende behoudelijck dat men den voors. los sculdich ende verbonden sal wezen een ǁ halff jaer te voorens uuttelick en te vercondigen ende op te seggen, getuijgen waeren hier ǁ over scepenen in Hertogenbossche Gijsbracht Kuijsten ende Johan Pelgrom, gegeven ǁ den sevenentwintichsten dach der maent januarij int jaer ons heeren duijsent sesshondert ǁ tweenveertich ǁ L.C. van Kessel ǁ

Littera Annae [***]

Dorsale aantekening:

No. 4 Helvoirt ǁ Constitutie van XX gulden ǁ AA