Oisterwijk

Jan Geritssoen van Laerhoeven heeft geloeft als een principael sculder te gelden ende te betaelen Kathelijnen ǁ dochter wilner Aerts van den Eijnde eenen jaerlijcken ende erffelijcken chijns van dordalven Rijnsche ǁ guldenen twentich stuvers voer elcken Rijnsgulden voers. gerekent in paeymente als then termijnen ǁ vander betaelinge inder stadt vanden Bosch gemeijnlijck ter boersen gaen sall te vergelden alle jaer ǁ erffelijcken op sinte Peters dach ad cathedram waer aff den yersten betaeldach wesen sal. van sinte ǁ Peters dach ad cathedram nu naestcoemende oever een jaer uut ende van eenen huijze ende hoeve ǁ met zijnen gronde ende toebehoerten ende unter erffenisse daer aen liggende ende daer toehehoerende een ǁ mudsaet lants oft daeromtrent begrijpende gelegen inder [parochie] van Haeren ter plaetsen geheijten ǁ tot Belveren aenden Nuwenhuijs tussen erfenisse Gerits voers. ende der kijnderen wilner Wouter ǁ Priems optie een zijde ende tussen erffenisse behoerende totter hoeven geheyten ter Meer ende der ǁ weduwe wilner meester Aelbrechs van Vlierden met haeren kijnderen optie ander zijde streckende ǁ vander gemeynder straeten totter erffenisse Aert Belmijs, Item noch uut eenen stuck lants ǁ drie loepensaet oft daeromtrent begrypende gelegen t[er] plaetsen voers. omtrent der capellen ǁ van sinte Marten tussen erffenisse der erfgenaeme wilner Lauwreijs Boeyen optie een zijde ende ǁ tussen erffenisse Thomaes Henrick Maessz. optie andere zijde streckende met beyden eynden aen ǁ twee gemeyn wegen aldaer loopende Item noch uut e[ene]n stuck beempts geheyten Taspelaer een ǁ halff buender oft daeromtrent begrypende gelegen ter plaetsen voers. tussen erffenisse Lambrecht ǁ Appels optie een zijde, ende tussen erffenisse Conegont Groeys optie ander zijde, streckende vander ǁ gemeijnder straeten totter Aa toe aldaer loopende, Item noch uut allen zijnen anderen erffelycken ǁ gueden soe waer ende tussen wyen die gelegen zijn eest in haerden in weerken in diepen oft in ǁ droegen als hij sede Ende Jan voers. heeft voerts geloeft als een principael sculder op hem ǁ ende op allen zijn gueden hebbende ende vercrijgende desen erfchijns Kathelijnen voers. te waeren alsmen ǁ erfchijns sculdich is te waeren Ende allen commer inden onderpanden voers. wesende aff te ǁ doen. Uutgenoemen drie stuvers erfchijns in tshertogen chijns noch drie mudden ende eenen zester ǁ rogs erfpachs noch ses ende eenen halven Rijnsgulden jaerlijcks erfchijns versceijden persoenen ǁ daer jaerlijcx voer uut te gelden Ende voerts dese onderpanden voer die betaelinge des voers. ǁ erfchijns daer jaerlycx uut te vergelden als voers. is altijt goetgenoch waeldoegende te maecken ǁ ende zeker genoch, Orconden hebben hier oevergeweest scepenen in Oesterwyck Aelbrecht ǁ Willem Aelbrechss. ende Claes Hoeffs Jacopss. die hueren zegelen in getuygenisse hier aen hebben ǁ gehangen int jaer ons heeren duysent vyfhondert drye ende twentich derthien daeghen ǁ in februario.

Dorsale aantekening:

Kathelijn dochter wilner Aerts vanden Eijnde ǁ ij gulden x stuyvers tot ǁ Haren