Oisterwijk

Heer Jacop ende Henrick gebruederen Elizabeth, Juet ende Margriet gesusteren kijnderen wilner Henrick ǁ Moels metten momberen der selver daer toe van hen gecoren ende hen vanden rechter als recht is ǁ gegeven enen jaerlijcken ende erffelijcken pacht van enen halven mud roggen te vergelden allen ǁ iaer erffelijck op ons liever vrouwen dach purificatie van ende wt enen huyse ende hoeve met ǁ zijnen gronde ende toebehoerten ende wt enen acker daer aen liggende vier lopensaet oft daer ǁ ontrent begrepende gelegen inder prochien van Oesterwijck in een stede geheiten Berkel aenden ǁ Ketshoevel aldaer tusschen erfenisse Henrick Melis Bonten soen deen sijde ende tusschen erfenisse Henrick ǁ vanden Brekelen dander sijde streckende vander gemeynder straten totter erfenisse Ians geheijten Brocken ǁ welken erfpacht voirs. Jan soen wilner Aerts geheiten Langerbeen vercoft hadde aenden soen wilner ǁ Wouters Aert Langerbeen tot behoeff Lauwreyssen Margrieten ende Adrianen kijnderen wilner Reinier ǁ Smolders ende welken erfpacht voirs. Henrick van Beeck overgegeven ende opgedragen hadde ǁ Beelen van Beeck zijnre moeder gelijck als dat in verscheidenen scepenen brieven daer op gemaect vol ǁ comerlijcker begrepen is. ende welcken erfpacht voirs. nae der doet van Beelen voirs. tot Baeten ǁ Moels hoere moeder, ende nae der doet van Baten voirs. in recht van versterve tot hen als ǁ zij seden gecomen ende verstorven is, hebben zij wittelijcken ende erffelijcken overgegeven ǁ ende opgedragen Henricke soen wilner Willem Emmen tsamen met allen scepenen brieven ende voer ǁ waerden daer aff nieuwe maeckende ende gewach doende, ende met allen den recht daer inne ǁ hen eenichsins toebehoerende met afgaen ende verthyen als daer toe behoirlijck is, ende hebben ǁ geloeft heer Iacop Henrick Elizabeth, Juet ende Margriet met hoeren momberen voirs. als principael ǁ sculderen gesamenderhant ende onversceiden op hen ende op allen hen gueden die zij nu hebben ǁ ende namaels hebben ende vercrigen moegen dese voirs. opdracht altijt vast ende stentiche te ǁ houden sonderen eenich wederseggen ende allen commer ende calaengie daer inne van hennen wegen ǁ wesende altemael aff te doen den selven orconden hebben hier oever geweest scepenen in Oester ǁ wijck. Embrecht Henrick Emmen soen ende Goeyart die leen die hoir zegelen in getuigenisse hier aen ǁ hebben gehangen int iaer ons heren duysent vijfhondert ende een acht dage inden meye

[***] pro scabini