Oisterwijk

Aert sone wylen Adriaen Wouters van Heck, heeft wettelyck ende erffelyck vercocht ǁ Jan Corneliss. de Bont, tot behoeff vande gilde off broederschappe van sinte Barbara binnen der Vrijheyt van ǁ Oisterwyck, eenen jaerlycken ende erffelycken chyns van negen Karolus gulden van twintich stuivers tstuck off die weerde daervoor ǁ in anderen goeden gevalueerden ende gepermitteerden gelde te vergelden ende te betaelen allen jaer erffelyck opten sessen ǁ twintichsten dach vanden April, Waeraff den ijersten betaeldach wesen sal opten sessentwintigchsten dach vanden April nu ijerst ǁ comende wesende van huyden over een jaer, van ende uuyt een stuck weijvelts drije lopen off daeromtrent begrypende gelegen ǁ binnen der Vryheyt van Oisterwyck omtrent de Ceppelstrate tussen erffs des Heijligeest binnen Oisterwyck aen deen ǁ syde ende tussen erffenis Jonkheer Henrick van Heurn aen dander syde, streckende metten eenen eynde aende molenstroom ende met ǁ den anderen eynde aen erffenis Adriaen Servaes Hooffman, Ende noch van ende uuyt een stuck erffs een bunder off daeromtrent ǁ begrypende gelegen onder de voors. vryheyt over het schoof brugsken tussen erffenis Peter Martens van Beurden aen deen syde, ende tussen ǁ erffenis der weduwe ende kynderen Gielis de Weer aen dander syde, streckende metten eenen eynde aen erffenis der kynderen Jan ǁ Reyner Heesters, ende metten anderen eynde aende gemeynt, als hij sede, Om den voors. chyns byder voors. gilde in eenen erffrecht ǁ te hebben ende te besitten, Gelovende die voors. vercoopere als schulder principael op hem ende op alle syne goeden hebbende ende ǁ vercrygende den voors. chyns van negen Karolus g(ulden) der voors. gilde te waren, alsucen erffchyns schuldich is te waren, ende de voors. ǁ onderpanden voorde jaerlycxe betalinge vanden voors. chyns altyt goet seker genoech ende weldogende te houden ende te maecken ǁ ende allen anderen commer ende calaingie inde voors. onderpanden wesende der selver aff te doen geheelycken, utgenomen des hertogen ǁ grontchyns met recht utten voors. bunder erffs te vergelden staende met conditien hier inne toegedaen, dat die voors. vercoopere den ǁ voors. chyns sal mogen lossen ende quyten altyt alst hem gelieven sal smaels ende eens netto somme van hondert ende vyffenseventich ǁ gelycke Karolus g(ulden) metten jaerchyns ende metten achterstelle ten thyde vanden loss ten achteren ende ombetaelt, staende, behoudelyck ǁ dat hij gehouden sal wesen den loss een halff jaer te voorent wettelyck op te seggen, Getuijgen waeren hierover Schepenen in ǁ Oisterwyck Adriaen Willemss. Verhoeven ende Anthonis Herberts Smidts, die heure segelen in getuygenisse hieraen hebben gehangen ǁ opten sessentwintichsten dach vanden April int jaer Ons Heeren duysent sesshondert ende eenen vijftich.

Dorsale aantekening:

Gilde Barbara in ǁ Oisterwyck