's-Hertogenbosch

Gerardt soone wilner Jans Martenz. de Wit woonende tot Gestel by Oisterwijck heeft ǁ wittelick ende erffelick vercocht ende vercoopt mits dezen Jannen Antonis Schenckels vette waerencremer ǁ eenen jaerlicken ende erffelicken chijns van seventhien ende eenen halven Carolus gulden, tot twintich ǁ stuivers elcken gulden goets gancbaer gelts gerekent. Te betaelen alle jaer erffelick int Hoochtijt ǁ van Sinte Lucia die maget. Ende voorden iersten termijn van betaelinge int Hoochtijt van sinte ǁ Lucia die maget anno sestienhondert ende tweentwintich. Ende binnen s´Hertogenbossche vrij ǁ van alle beden ons heeren des hertochs exactien, subventien soo thiend twintichste hondertste ǁ als alle anderen meerdere ofte mindere penningen, commeren schattingen ende lasten ordinarissen extra ǁ ordinarissen ingestelt ofte bij avontueren naemaels ingestelt te worden gheen lasten ǁ uuijt gescheijden te leveren ende te vergelden, van ende uuijt een stuck ackerlants ǁ groot omtrent vijff loopensaten, gelegen onder de parochie van Gestel voors., ter plaetsse ǁ genoemt aen den heycant bij het brugsken aldaer tusschen erffenisse Arnts Jans Nelen ten ǁ beijden sijden. Streckende metten eenen eynde aen erve Maryken weduwe Corstiaen Marcus de ǁ Beer, ende metten anderen eynde aen de gemeijn straeth, ende alnoch van ende uut eenen hoijbeempt ǁ genoempt de Strijpen, groot omtrent acht loopensaten, gelegen tot Gestel voers. ter plaetsse ǁ genoemt Inde Strypen, neffen erffen Daniel Janss Bressers aen deen sijde ende neffen erve ǁ Willem Mathijs Coels aen dande sijde. Streckende van erffen Dierick Adriaen Meussgen ǁ tot aen den gemeynen Elsdijck. (Soo hij verclaerden) van den zelven cooper metten erffrecht te hebben ǁ ende te besitten, ende heeft die voorn. vercooper den voers. chijns den voorn. cooper opgedragen ǁ met helmelinge verthijdenis inne manieren in dijen gewoonelick sijnde gelooven ǁ de voorn. vercooper als schuldenaer principael op verbant van sijne persoon ende allen sijnen ǁ goederen present ende toecomende, dat hij den voorn. cooper van den voers. chijns schuldige ǁ ende gerechte sall doen warantschappen ende dat hij allen anderen commer calangie ǁ ende aentael inde voers. onderpanden wezende oft comende den voorn. cooper aff sall doen geheelijck ǁ uuijtgenomen eenen halven braspenninc groot sijns aende heere van Gestel, uuten voers. ǁ iersten onderpande ende eenen chijns van twee penningen aen taeffele des heijliche geest ǁ binnen deser stadt. Van voers. tweeen onderpande jaerlix van te voorens, ende van rechts wegen ǁ te vergelden staende t soo hij seghden, ende dat hij de voornoemde onderpande voorde betaelinge ǁ des voors. chijns den voornoemde cooper jaerlix als voerschreven staet daer uut te vergelde ǁ altijt goetgenoch ende weldoegenen en sall maken ende houden. Getuijgen waeren hier over scepen ǁ in sHertogenbossche Rombout Romboutssen ende Jan van de Stegen. Gegeven den thienden ǁ dach der maent decembris, int jaer ons heeren duijsent sesshondert eenentwintich

A van Heessel subscripsit

Dorsale aantekening:

numero XXVII

Constitutie van XVII gulden X stuivers ǁ Voor Jannen Antonis ǁ Schenckels tot, ǁ Moergestel verschynt ǁ op Sinte Lucien dach ǁ ende moet jaerlix betaelt ǁ worden volgende [***] ǁ gelt