Oisterwijk

Wij Scepenen Gesworen Raetsluyde, Kerckmeesteren, Heyligeestmeesteren ende voerts allen die gemeyn gebueren ende ingesetenen der vryheit van Oesterwijck doen cont eenen yegelijcken die dese onse ǁ brieven sullen sien oft hoiren lesen dat wij met goeden rijpen voerraede, ende deliberatie daer toe met openbaren Sonnendaeghs kerckgeboede vergadert wesende, omme deswillen onse alre ǁ genedichste heeren de Hartoge van Brabant etcetera zijne domeynen ende gueden nu ter tijt versettende is, ende wij van den selven die acchijnsen van wijn, bier ende broot metten ghene dat daeraen ǁ cleeft binnen onsen vryheit voirs. om die te moegen hoegen ende leegen nae onsen proffijt ende goetduncken vanden selven onsen genedigh heer sekeren tijden van jare in pachtingen plagen te ǁ hebbende ende te houdende, de welke voirs. acchijnsen wij nu om een sekere groete somme van penningen vanden selven wittelijcken ende erffelijcken gecoft hebben, nae inhout van sekeren ǁ sijnen openen brieven van ottroeye, ons daer op van hem verleent, welke voirs. penningen wij onder ǁ malcanderen beedschewijse nyet en connen gevijnden noch betalen. Ende ons die selve ǁ penningen te crijgen ende te severen hebben wij wittelijcken ende erffelijcken vercoft heeren Mathijse priester soen wilner Henrick Kepkens canonick tot Everboede, ende persoen tot Venloe, ten jaerlijcke ǁ ende erffelijcke losrente van tweentweyntich florijnen Rijnsguldenen gemeynlijcken genoemt tweyntich penningx, stuvers, gemeynlijcken genoemt voir elken Rijnsgulden voirs. gerekent in munte ǁ gelijck then dagen vander betalinge inder stadt vanden Bosch gemeynlijck ter boirsen gaen sal. Te vergelden allen jaer erffelijck op ten heyligen Korsdach ende inder stadt vanden Bosch. ǁ vrij ende loss op ten wissel, oft in zijnen zijnre erven oiren oft nacomelingen handen te leveren op onsen cost last ende avontuere van allen lasten beden scaden ende settinge vanden voirs. ǁ Vryheit wegen hoedanich die wesen mochten. Welke losrente voirs. wij bekennen datse die voirs. heeren Mathijs wael ende wittelijcken gecoft heeft tegen ons met sijnen gereden pen ǁ ningen ende welke penningen wij bekennen dat wij vanden voirs. heeren Mathijs gebuert ende ontfangen hebben in munte ende prijse hier nae bescreven, ende die voirts bekeert ǁ hebben int gemeyn proffijt van onser Vryheit voirs., ende welke losrente voirs. wij allen gesamenderhant inden name van ons selven ende vander gemeijnre Vryheit wegen ende elke ǁ van ons voer al geloeft hebben als principael sculderen in goede trouwen te gelden ende te betalen den voirs. heeren Mathijse zijnen nacomelingen nae hem oft hoeren sekeren ǁ boede, brengere van desen brieve oft der copien auctentijcke in manieren voirs. ende hier voire hebben wij verbonden ende verbijnden ons onse oiren erven ende nacomelingen ende elken ǁ voir al, allen onse gueden ende voirts allen die gueden van onsen oiren erven ende nacomelingen hoe ende waer die gelegen sijn die wij nu hebben ende namaels hebben ende ǁ vercrigen moegen, ende weert saecke dat wij weren in eenigen gebreecken der betalingh vander losrenten voirs. in eenigen toecomenden tijden ende die voirs. heeren Mathijs sijn oiren ǁ erven ende nacomelingen nae hem oft hoere sekere boede brengeren van desen brieven oft vander copien als voirs. is dat aen die Scepenen then tijde wesende oft eenige der selver oft ǁ aen hen woenstadt versocht hedden, willen wij ende consenterende dat hij alsdan een maent geleden nae elken termijnen gevallen, ende nae dat die maninge inder manyeren voirs. ǁ geloeven te betalen sonder die principael rente yet te verminderen ende hebben voerts vertegen ende vertyen voer ons onse oiren erven ende nacomelingen van allen vryheiden van ǁ privilegien poerteryen Sunte Peters manscappen Jaermercten Weeckmercten Respijtbrieven quinkernellen ende voerts der exceptien dat men seegt dat gemeyn verthyenisse nyet en dyet ǁ ende voert allen anderen defensien ende bescuddingen hoedanich die weesen mochten geestelijcken ende weerlijcken die ons in desen souden moegen helpen ende den voirs. ǁ heeren Mathijse letten oft deren in eeniger manyeren tegen dese br(iev)en oft tegen eenigen van den vorwaerden ende geloeften die in desen br(iev)en bescreven staen ende om den voirs. ǁ heeren Mathijse sijnen oiren erven ende nacomelingen nae hem allen dese punten ende vorwaerden in desen br(iev)en begrepen te voldoenen, Soe bidden wij allen Heeren ende Richteren ǁ ampluyden ende gerichts boeden geestelijcken ende weerlijcken dat in dien wij in gebreeke van desen in toecomenden tijden bevonden mochten worden ende wij ende onse na ǁ comelingen nae ons inder manyeren voirs. nyet en betaelde, nae dien die termijnen van betalingen een maent leden gevallen sullen wesen ende hij oft zij inder manyeren voirs. ǁ gemaent sullen hebben dat zij ons daer nae binnen eenre maent tijts sullen commeren ende arresteren onse lijven ende gueden ende onser nacomelingen lijven ende gueden ǁ gerede ende ongerede ende elken van ons voir principael hoeftsculde tot wat plaetschen ende steden hetzij te water oft te lande zij bevonden sullen worden, totter tyt toe wij ǁ hem die principael gevallen rente tsamen met allen costen van recht daer op gedaen vervuecht sullen hebben, behoudelijcken dien dat wij ende onse nacomelingen dese voirs. ǁ losrente altijt sulen moegen lossen ende afquijten tsamen metter sommen van drie hondert ende vierentsoeventich Rijnsguldenen tweyntich stuvers oft die rechte werde daer voir in anderen ǁ paeymente voir elken Rijnsgulden voirs. gerekent, ende dat in penningx ende munte als hier nae volgen, te weten met gouwen leeuwen van gewichte tstuck tot vierenveertich stuvers, met gou ǁ den bourgoense Rijderen ende vugerse guldenen van gewichte tstuck tot negenendertich stuvers, met goudenen Andriesguldenen en de gwilhelmese scilden van gewichte tstuck tot negenentweyntich ǁ stuvers met goudenen oeverlens Rijnsche guldenen van der valuatien tstuck tot achtentweyntich stuvers, met gouden Philips guldenen van gewicht tstuck tot vijffentweyntich stuvers, met dob ǁ belen vieryseren tstuck tot twe stuvers ende een oirt ende voirts met allen anderen gouden gelde vander selver valuacien nu gevalueert zijnde nae advenant, ende metter jaerrenten ǁ als men die lossen ende afquijten sal, ende metten afterstelle daer aff ofter dan eenigen onbetaelt stonde, ende oft namaels gebuerden dat God verhueden moet dat dese tegenwoirdige ǁ brieven in eenigen toecomenden tijden gestoelen gescoirt oft verbrant worden, soe geloeven wij den voirs. heeren Mathijse sijnen oiren erven ende nacomelingx nae hem nae dien wij des ǁ van zijnen oft hoiren wegen versocht sullen worden binnen eenre maent daer nae wederomme een andere gelijcke brieven te besegelen ende te verlenen nae die copien oft transscrift van ǁ desen op sijnen oft hoeren coste, allet sonder droch ende argeliste, des torconden hebben wij Scepenen geswoeren Raetsluijde Kerckmeesteren Heijligeestmeesteren ende gemeijn gebueren der ǁ vrijheit van Oesterwijck voirs. den gemeynen zegel onser vryheit voirs. bij onser alre gerechter wetentheit aen desen tegenwoirdigen brieven doen hangen int jaer Ons Heeren duijsent ǁ vijfhondert ende vijve opten sesthen dach van Januario nae costume van scrijven der cameren van den Bossche.