Oisterwijk

Alsoo zeker ghescillen op verstaen ende gheresen waren tusschen Kathelinen weduwe Ioerdens vander Heiien dochter wilner Ians. Clercs ter eenre, Aernden gheheiiten Wolfaert, Mechtelt siin zustere kinderen wilner Laur[eiissoon] ǁ vander Heiien Heylwiighen dochtere wilner Peters. vander Heiien, Gheriiden van Berck, Peteren Willems. sone vander Heiien als ghemechtichde van Iacoppen Laurens sone vander Heiien ende van Henricken P[eter]s. [vander] ǁ Heiien ende van Adriaen Scuitken, Adriaen vander Hoeven hem machtich makende voer Ian van Iuthen ende voer Henricken Dircken Willens. ter andere ziiden ende alsoe verre als Ian van Iuthen ende Henricken Dircken Willens. [voers.] ǁ daer in ghericht seiinde als erfghenamen wilner Aerts vander Heiien Iueten siinre huysvrouwen ende Ioerdens hore beiider sone te weten van allen ende enyegheliiken alsulken erfgueden ende tocht gueden die den selven ende elken van hen ǁ vander doet wilner Aerts vander Heiien voer Ioerden siins soene ende Iueten siinre huysvrouwen daer nae met recht van versterve aen comen waren ende die die selve wilner Aert Ioerden ende int voers. afterghelaten hebben[de] ǁ des gheschils hebben hen de voers. partiien ghesubmitteert ende verbonden in Henrick Ian Back ridder in Henrick vande Keelen rentmeester vanden Bosch ende in Iacobben vander Elst als segghende ghecoren ende ghenomen van Katheline ǁ voers. weghen in heeren Floriis Ghiisrechts sone priester in Corneliiss Dicbier scout[et]h van Oesterwiick ende in Henrick van Berck als segghenede ghecoren ende ghenomen van Aerenden Mechelden Heiilwiighen Theunis Peters ende inde anderen ǁ voers. weghen welc partiien van beiiden ziiden op zekere peenen voer notariis ende ghetuyghen in eenre submitteert daer op ghemaect alsulcken seyghen te houden te achtervolghen ende volcomeliiken te volvueren ende te voldoen als ǁ vanden voers. ses goeden mannen als arbiiters van horen voers. ghescillen eendrechteliic uutghesproken ende ghepronuncieert soude weerden op de peenen inder voers. submissien begrepen waer nae die voers. ses goede ǁ mannen hen op de voers. ghescillen doechdeliic met voerzienicheiden beraden hebben ende daer op verhoert consulteren van doctoren van beiiden partiien en daer op verworven ende daer riipeliic op ghelet ende daer nae allen ǁ saken waer gheweghen van beiiden ziiden ende daer nae de voers. viif arbiters in absentien van Corneliis Dicbier als den sesten bii consent van beiiden partiien hoer minliic uutspraeck eendrechteliic ghedaen hebben inder ǁ manieren hier naevolghende inden iersten hebben sii de voers. partiien verleeken ende verenicht gheseet van allen actiien ghescillen toesegghen consulteren van doctoren ende sii teghen malcanderen te segghen moghen hebben tot desen ǁ daghe toe in ennigher manieren voert meer soe zullen die voers. partiien erfghenamen wilner Aerts vander Heiien, Ioerden siins soens ende Iueten siinre huysvrouwen voers. consenterende affirmerende abproberen ende over gheven ǁ allen alsulken meecsel in manieren van testament bii wilner Ioerden vander Heiien Kathelinen siinre huysvrouwen voers. ghemaect in schepenen brieven ende voer schepenen van Oesterwiick ende allen vercopen van erve ende van goey? ǁ bii wilner Iueten vander Heiien in horen leven vercoft ende ghevest ende allen vercopen van erve ende van goey bii Kathelinen voers. vanden gueden Ioerdens voers. nae doet van hem nae inhout ende tenuere siins testaments voers. ǁ vercoft ende ghevest in allen staen nae inhout ende tenuere Ioerdens testamente voers. van weerden te bliven ende daer op vertiien in allen staen soe dat ghemaect is ende ghevest voert meer soe zullen die voers. erfghenamen doech ǁ deliiken betalen allen ende enyegheliike alsulken costen als int vervolch van desen werck bii de arbiters ende anderen goeden mannen tot Oesterwiick ghedaen siin te weten inden husen Claeus van Berck, Gherits van Berck, Gherits ǁ vanden Wiele ende Peterken Beelen alsoe dat die ghene diet verteert hebben ende die voers. Kathelinen daer af onghelast zullen bliven voert soe zullen sii partiien erfghenamen Aerts, Ioerdens ende Iueten voers. gheloven ende ver ǁ borghen daer Kathelinen voers. aen ghehouden mach bliven te betalen der selve Kathelinen hondert riinsch gulden den gulden tot tweintich stuver gherekent oft die weerde in alsulken penninghen alsmen ten tiide der ǁ betalinghen ten Bosch opten wissel meede betaelt ende die te betalen van onsen vrouwen daghe purificatio nu naestoecomende over een iaer met thien de gheliiker gulden oft van onsen vrouwen daghe purificatio nu ǁ naestoecomende over een iaer met viif der gheliiker gulden oft in onsen vrouwen daghe purificatio nu naestoecomende met thien der gheliiker gulden te betalen der selver oft in elken onsen vrouwen daghe purificatio ǁ binnen den voers. terminen die voers. hondert gulden met verganghenen chiinche te betalen ende allen iaer den voers. chiins te betalen, item dies sal die voers. Kathelinen met horen momboer vertiien op allen alsulken tocht ǁ ende recht van tochten als hoer wilner Ioerden hoer man doen hii leefde in siinen testamente ghelaten ende ghemaect hadde tot behoef Aerts gheheiten Wolfaert, Mechtelden siinre zuster, Heiilwiighen Gherits Peters ende ǁ Adriaens voers. alsoe verre als elc vanden erfghenamen Aerts, Ioerdens ende Iueten voers. int erfgoet der selver gherecht moghen siin ende gheloven daer nimmer meer op te spreken met eghenen recht gheest ǁ teliic oft weerliic dwelc gheschiet soe siin ghestaen voer schepenen hier onder ghes. Aert, Mechtelt, Heiilwiich, Gherit, Peter ende Adriaen voers. metten momboren Mechtelden ende Heiilwiighen voers. daer toe van hen ǁ ghecoren ende hen vanden rechter ghegheven als recht is Gherit ende Peter voers. voor hen selven ende voer Iacoppen, Henricken ende Adriaenen voers. daer Gherit ende Peter voers. voer gheloeft hebben Adriaen vander ǁ Hoeven voers. voer Iannen van Iuthen ende voor Henricken voers. daer Adriaen voers. voer geloeft heeft naegaende de uutspraken voers. allen ende enyegheliicken alsulken erfeliike gueden bii wilner Ioerden vander Heiien die ǁ voers. Kathelinen sunre huysvrouwen voer schepenen ende in schepenen brieven van Oesterwiick ghemaect nae inhout ende tenuere der selver brieve, item hier toe allen ende onyegheliicken alsulken erfeliike gueden bii wilner Iueten ǁ vande Heiien naeder doet Ioerdens hoers soens vercoft ende ghevest, item hier toe allen ende enyegheliike erfeliike gueden bii Kathelinen voers. naeder doet Ioerdens voers. vercoft ende ghevest in allen staen Ioerden voers. die voers. ǁ gueden der voers. Kathelinen sunre huysvrouwen in sinen uterste voer schepenen ende in schepenen brieven van Oesterwiick ghelaten ende ghemaect hadde, Hebben sii witteliic ende erfeliic overghegheven ende opghedraghen Kathelinen ǁ voers. tot behoef hore ende tot behoef allen der gheenre die de voers. gueden vercoft ende ghevest siin te samen met allen schepenen brieven ende vorwaerden daer af mentie makende ende ghewach doende met afgaen ende vertiien als ǁ daer toe behoerliic is ende hebben gheloeft aen gheheiten Wolfaert, Mechtelt, Heiilwiich met horen momboeren Gherit, Peter ende Adriaen voers. elc voor siin hoet ende voer die ghene daer sii e[…] van hen als voers. is voer ǁ gheloeft hebben als principael sculdener op hen ende op allen hoer gueden die sii nu hebben [ende nae]maels hebben ende vercriighen moghen dit overgheven opdraghen afgaen ende vertiien voers. der voers. Kathelinen ende allen den ǁ gheenre die als voers. is ghecoft hebben eweliic ghesthendich ende vast te houden sonder enich wedersegghen ende allen commer ende calangie van horen weghen daer in wesende altemael af te doen den selven, Hebben voert ǁ gheloeft Aert, Mechtelt, Heiilwiich, Gherit, Peter ende Adriaen voers. als principael s[culder]en ghesamenderhant ende onverscheiden op hen ende op allen hoer gueden die sii nu hebben ende naemaels hebben ende vercriighen moghen ǁ Kathelinen voers. houden riinsch gulden den gulden tot tweintich stuver gherekent oft die weerde te betalen in alsulken penninghen alsmen ten tiide der betalinghen ten Bosch opten wissel mede betalen ǁ mach van onsen vrouwen missen purificatio nu naestoecomende over twe iaer met thien der gheliiker gulden te betalen ende van onsen vrouwen daghe purificatio nu naestoecoemende over een iaer viif der gheliiker ǁ gulden te betalen ende in onsen vrouwen daghs purificatio nu naestcomende thien der gheliiker gulden te betalen met zulker vorwaerden toe ghedaen dat dese voers. ghelover in dese voers. hondert riinsch gulden ǁ binnen den voers. termene toe horen schoensten zullen moghen betalen ende altiit met verganghenen chiinche dwelc gheschiet alsoe is ghestaen voor schepenen hier onder ghes. Kathelinen voers. metten momboer der ǁ selver daer toe van hoer ghecoren ende hoer vanden richter ghegheven als recht is naegaende der uutspraken voers. alsulken tocht ende recht van tochten als Kathalinen voers. besittende is in allen ende enyegheliicken ǁ alsulken erfeliiken gueden daer wilner Ioerden hoer man doen hii leefde in besterf ende der selver Kathelinen tot hoeren tochten ghelaten had nae inhout ende tenuere schepenen brieven van Oesterwiick daer op ǁ ghemaect, Heeft sii wetteliic over ghegheven ende opghedraghen Aerenden, Mechtelden, Heiilwiighen, Gheriiden, Peteren ende Adrianen voers. van weghen Ians van Iuthen ende henne voers. te samen men allen schepenen ǁ brieven ende vorwaerden daer af mentie makende ende ghewach doende met afgaen ende vertiien als daer toe behoerliic is ende heeft gheloeft Kathelinen met hoeren momboer voers. als een principael sculders op hoer ende ǁ op allen hoer gueden die sii nu heeft ende naemaels hebben ende vercriighen mach dit overgheven opdraghen afgaen ende vertiien voers. den voers. Aerenden, Mechtelden, Heiilwiighen, Gheriiden, Peter en Adrianen voers. ǁ der voers. manieren eweliic ghesthendich ende vast te houden sonder ennich wedersegghen ende […] voers. tochten nimmer meer te comen noch op te spreken met eghenen recht gheesteliic oft weerliic ende oft deze uut ǁ spraken tusschen die voers. partiien ennighe punten donckerlinghe onverclaert waren bleven staen dat houden dese voers. arbiters altiit in horen segghen ende verclaren, Oirconden hebben hier om gheweest ǁ schepenen in Oesterwiick Adriaen Heiien ende Claeus van Berck die hoer zeghelen in ghetughenissen hier aen hebben ghehanghen int iaer ons heeren dusent vierhondert ende acht[endeta]chtentich seven ende tweintich ǁ daghe in iulio