Oisterwijk

Wii scepenen gheswoeren raetsluyde, kerckmeesteren heiligeestmeesteren ende voirts alle die gemeyn gebueren ende innegesetenen der vriiheit van Oesterwiick doen ǁ condt enen yegeliicken die dese onse brieven zullen sien oft hoiren lesen, dat wii met goeden riipen voerraede ende delibiratie daer toe met openbaren sonnen ǁ daechs kerckgeboede vergadert wesende, omme sekeren groete lasten ende scaden die wii onlanx leden gehadt hebben vanden brande ende anderen sware lasten van den ǁ oirloge van gelre, daer wii tegenwoirdeliicken inne siin, welke lasten ende commeren wii onder mekanderen met en connen geviinden beedtsche wiise noch betalen ǁ ende omme den meesten scade metten minsten te scutten ende omme den selven commer te betalene witteliicken ende erffeliicken vercoft hebben joffrouwen Elizabeth wittige ǁ dochter meester Wouters vander Voirt woenende inne der goeder stadt van tsHertogenbossche een jaerliicke ende erffeliicke losrente van veertich floriinen riinsgulden ǁ gemeynliicke genoempt tweyntich penningen stuvers gemeynliicke genoemt voir elken gulden gerekent, Hier inne gerekent den gouden Andriesgulden voir ǁ acht ende tweyntich stuvers den gouden overlenschen riinsgulden voir soenen ende tweyntich stuvers ende die dobbele vueryseren voir twee stuvers ende een oirt ǁ die karolus stuvers voer enen stuver ende een oirt oft ander goet gelt vander selver werden, Te vergelden alle jaer erffeliicke inden hoechtiide van ons liever ǁ vrouwen assumptionis, Ende then bossche vrii ende loss opten wissel oft inne joffrouwe Elizabeth hoiren erven oiren oft nacomelingen handen te leveren op onsen ǁ cost last ende aventuere van allen lasten beeden scaden ende frettingen van der voirs. vriiheit wegen, hoedanich die wesen mochten, Welke losrente voirs. ǁ wii bekennen datze die voirs. joffrouwe Elizabeth wael ende witteliicken gecoft heeft tegen ons met hoeren gereden penningen, welke penningen wii bekennen ǁ dat wii vander voirs. joffrou Elizabeth geboirt ende ontfangen hebben in munten ende priise hier nae bescreven, Ende die voirt beset ende bekeert hebben in ǁ onsen gemeynen noetoirbare ende profiite ons laste voirs., ende anders dairs ons ende onser vryheit voirs. van noode was, Ende welke losrente voirs. wii allen ǁ gesamenderhant inden name van ons selven, ende vander gemeynder vryheit wegen, ende elke van ons voer al als principael sculdenaren geloeft hebben in ǁ goeder trouwen te geldene ende wael te betalene der voirs. joffrouwen Elizabeth hoiren nacomelingen nae hoir oft hoiren seekeren boede brengere van desen brieve ǁ oft der copien auctentiicke in manieren voirs. Ende hier voir hebben wii verbonden ende verbiinden ons onse oiren erven ende nacomelingen, ende elke voir all allen ǁ die gueden van ons onsen oiren erven ende nacomelingen hoe ende waer die gelegen siin die wii nu hebben ende namaels vercriigen moegen, Ende weert ǁ saecke dat wii weeren in eenigen gebreeke der betalingen der losrenten voirs. in ennigen toecomenden tiide, ende die voirs. joffrouwe Elizabeth hoere oiren erven ǁ ende nacomelingen, oft huere seekere boede brengere van desen brieve oft vander copien als voirs. is, dat aen die scepenen then tiide wesende oft ennige der ǁ selver oft aen hoer woenstadt versocht hedden, willen wii ende consenteren dat zii alsdan vertennacht geleden nae elken termiine gevallen, sal moegen vervalle ǁ op ons ende onse voirs. vryheit, elke daechs dat wii inne gebrecke weeren van elken riinsgulden enen halven stuver, welken halven stuver van theere wii ǁ hoir geloeft hebben ende geloeven te betalen sonder die principael rente iiet te minderen, Ende hebben voirts vertegen ende verthiien voir ons onse oiren erven ǁ ende nacomelingen van allen vryheiden van privilegien poirteryen sunte Peters manscappen jaermercthen weeckmercten respiitbrieven quinkernellen, Ende ǁ voirts der exceptien dat men seegt dat gemeyn verthiienisse met en diedt, Ende voirt allen anderen desen sien ende bescuddingen, hoedaninch die wesen mochten ǁ geesteliicken ende weerliicken, die ons in desen souden moegen helpen, ende der voirs. joffrouwe Elizabeth letten oft deren in eninger manieren tegen desen ǁ littere oft tegen eenige vanden voirwaerden ende geloeften die in desen brieven bescreven staen, behoudeliicken dien dat wii die voirs. losrente then ewigen ǁ daegen sullen moegen lossen ende acquiiteren tzamen metter sommen van sesshondert ende veertich riinsgulden tstuck tot tweyntich stuvers gerekent, Ende dat in penningen als hier nae volgen, Te wetene met gouden andriesgulden tstuck tot achtentweyntich stuvers, met gouden overlens riinsgulden tstuck tot soenen ǁ ende tweyntich stuvers met dobbelen vueryseren tstuck tot twee stuvers ende een oirt, met halven van dien nae advenant, met kaerlschen stuvers tstuck voir ǁ enen stuver ende een oirt, oft met andren goeden gelde vander selver werden. Ende oft geboirden dat die voirs. penningen namaels in ennigen toecomenden ǁ tiide eenigen hoegeren oft legeren cuers hedden dan voirs. is, dat wii nochtans niettemin der selver joffrouwen Elizabeth oft hoiren nacomelingen die ǁ voirs. penningen sullen geven ende betalen then priise als voirs. is, te samen metter renthen vanden jaer als men die lossen ende acquiiteren sal, ende ǁ metten afterstelle, oft dan daer eenigen tafter ende onbetaelt stonde, behoudeliicken dat wii then tiide als wii die rente lossen sullen, der voirs. joffrouwen ǁ Elizabeth hoeren oiren erven ende nacomelingen dat een jaer te voirens verkundigen ende den weece daer aff doen sullen. Ende oft namaels geboirden dat ǁ God verhueden moet dat desen tegenwoirdige littere in eenigen toecomenden tiide gestolen gescoirt oft verbrant worde, Soe geloeven wii der voirs. joffrou ǁ wen Elizabeth horen oiren erven ende nacomelingen nae dien wii des versocht sullen wesen, binnen eenre maent daer nae, weeder omme een andere geliicke ǁ littere te bezegelen ende te verleenen nae der copien oft den transcrift van desen. Ende hebben geloeft als voire inden gevalle dat joffrouwen Elizabeth ǁ oft hoeren nacomelingen inder manieren voirs. in toecomenden tiiden egeen betalinge en geschiede, ende wii oft onse nacomelingen daer inne gebrekeliick ǁ vielen, dat wii als dan ende in dien gevalle, then versueke der voirs. joffrouwe Elizabeth hoeren oiren erven ende nacomelingen sullen schicken viive ǁ oft sess goeder mannen wt der vriiheit voirs. wael geguet wesende die der voirs. joffrouwen Elizabeth voir scepenen van den Bosch een geliicke veste doen ǁ sullen van veertich geliicke riinsgulden staende then losse als voir met conditien toegedaen dat wii ende onse voirs. vryheit, ende die voirs. Viive ǁ ofte zess goede mannen met eenre betalinge ende lossinge gestaen sullen, Allet sonder droch oft argeliste, Des torconden hebben wii scepenen gheswoiren ǁ raetsluyde kerckmeesteren heiligeestmeesteren ende gemeyn gebueren der vryheit van Oesterwiick voirs. den gemeynen zegel der vryheit voors. bii onser ǁ alre gelechter wetentheit aen desen tegenwoirdigen brie(ve) doen hangen, Gegeven opten sesten dach der maent Augusti int jaer ons Heren duysent ǁ vierhondert neghen ende tnegentich.