Oisterwijk

Jan sone wijlen Adriaen Cornelissen vanden Bosch ende Willem sone Claes Henricx ende als momboiren ende ǁ toesienderen vande ommondige kijnderen wijlen Willem sone Jan Willem Adriaenss. tot sgeens hiernae volght ǁ consent hebbende van schepenen van Oisterwyck als opperste weesmeesteren, hebben wettelijck ende erffelijck ǁ vercocht Aerden Henrick Anshems tot behoeff vande taeffele des heyligeest inder kercken van Haren, ǁ eenen jaerlijcken ende erffelijcken chijns van thien karolus gulden van twintich stuyvers tstuck oft die werde ǁ daervoor in anderen goeden gelde, te vergelden ende te betalen allen jaer erffelyck int ǁ hooghtijt van ons lieve vrouwe purificatie, waeraff den ijersten betaeldach wesen sal van ’t hoochtijt ǁ van ons lieve vrouwe purificatie nu ijerstcomende over een jaer, van ende uuijt een huijs ende backhuys ǁ met henne gronde ende toebehorten ende erffenis daeraen liggende ende daertoe behorende derthien lopensaet ǁ oft daeromtrent begrijpende gelegen inde prochie van Haren ter plaetse genoempt inden Ghever tussen ǁ erffenis Jan Henricx Vervloet met meer andere aen deen syde, ende tussen erffenis Aelken ommondige ǁ dochtere Jan Claessen van Vucht aen dander syde, streckende metten eenen eynde aende gemeijn strate, ende ǁ metten anderen eijnde aende Boschbane, noch van ende uuijt het middelste vijffsten gedeelt ǁ in een stuck weijvelts vierentwintich lopensaet oft daeromtrent int geheel begrypende ǁ gelegen inde prochie voors. ter plaetse genoempt int Elsbroeck, ‘t geheel stuck ǁ tussen erffenis des grooten gasthuijs vanden Bosch met meer andere aen deen syde, ende tussen ǁ eenen gemeijnen waterlaet aen dander syde, ende metten eenen eijnde, streckende metten anderen ǁ eijnde aen erffenis des grooten gasthuijs voors., ende noch van enen uuijt de helft westwart ǁ in twee hoijbemdekens gelegen in de prochie voors. int Abroeck, de geheele bemdekens ǁ tussen erffenis der kijnderen Henrick Anthonis van Someren aen deen syde westwart, ǁ ende tussen erffenis welck hiertegen gedeijlt is aen dander sijde, streckende metten eenen ǁ eijnde aen erffenis Aert Henrick Anshems met meer andere, ende metten anderen eijnde ǁ aende Molenstroom so men verclaerden, Om den voors. chyns byder selver caestele in eenen ǁ erffrecht te hebben ende te besitten, Gelovende die voors. vercoperen als schulderen [pl] ǁ op verbyntenisse van allen den goederen der voors. ommondige kynderen hebbende ende ǁ vercrijgende den voors. chijns van thien Karolus gulden der voors. caestele te waren als men ǁ erffchyns schuldich is te waren, aende de voors. onderpanden voor de jaerlijcxe betalinge ǁ vande voors. chijns altijt goet secker genoech ende weldogende te houden ende te maken, ende ǁ allen anderen commer ende calaingie daer inne wesende den selven aff te doen geheelijck ǁ uuijtgenomen vier lopen roggen erffpachts in eenen meerderen pacht aen het beneficium ǁ vande yerste misse inder kercken van Haren, noch sess Karolus gulden tsjaers aen het selve ǁ beneficium, noch veerthien stuijvers tsjaers aende prelaet van sinte Geertruijden ǁ tot Loven allet yerst van rechtswegen daeruuijt te vergelden staende, met ǁ conditien hier inne toegedaen dat men den voors. chijns van thien Karolus gulden sal mogen lossen ǁ ende quijten altijt alst den kijnderen gelieven sal smaels ende eens mette somme van ǁ twee hondert gelijcke Karolus gulden metten jaerchijns ende metten achterstellen ten thijden ǁ vande loss ten achteren ende ombet(ael)t staende, Behoudelijck dat sij gehouden sullen wesen den ǁ loss een halff jaer te voorens wettelijck op te seggen, Getuijgen waeren hierover ǁ schepenen in Oisterwijck Jan Adriaen Porters ende Petter Marttens van Buerden die ǁ huere segelen in getuygenisse hieraen hebben gehangen opten sevensten dach ǁ januarij int jaer ons heeren duijsent sesshondert ende vierendertich

J Peijnenborch

Dorsale aantekening:

heyligeest tot Haren ǁ X gulden tsjaers op erfenis ǁ der kijnderen van ǁ Jan Willems

Numero 21