's-Hertogenbosch

Servaes sone wijlen Goijarts Faessen woonende tot Enschot als wittich ǁ man ende momboir van Elisabeth sijne huijsvrouwe dochtere wijlen Cornelis Jan Denis heeft wittelick ǁ ende erffelick vercost Laureijns van Kessel secretaris deser stadt, tot behoeff van Nicolaesken ǁJanssen van Berckel eenen jaerlicken ende erffelicken chijns van vijff Carolus gulden, tot twintich stuijvers ǁ goets gancbaers gelts, elcken gulden gereeckent te betalen alle jaer erffelick opten negentiensten ǁ dach der maent van novembri ende voorden iersten termijn van betaelinge opten negentiensten novembris ǁ Anno XVI^c vijffenveertich, ende binnen dese stadt vrij van alle beeden, exactien, subventien, tiende ǁ twintichste, honderste meerdere ende mindere penningen comerende, scattingen ende lasten gewoonlicke onge ǁ woonlicke, ingestelt ende naemaels ingestelt te wordden egeene uutgescheijden te leveren ende te ǁ vergelden, van ende uut huijs, erve, hoff ende ackerlant dien aenliggende eenentwintich loopensaten ǁ lants oft daeromtrent, begrijpende, gelegen inde parochie van Oisterwijck ter plaetse genoempt ǁ Enschot, tussen erve van Joncker Muijckens tot Esch aen d'een zijde ende tussen de gemeijnstraet ǁ aen d'ander sijde, streckende metten eenen eijnde aen erve toegecomen hebbende den susteren ǁ convente tot Waelwijck ende metten andere eijnde aen erve der heeren cathuijseren tot Vucht, ǁ ende alnoch van ende uut een stuck heijtvelts groot omtrent drije loopensaten gelegen inde ǁ parochie van Loon bijden gerichte oft moor aldaer, tussen erve Vranck Gerarts aen deen ǁ zijde ende tussen erve vande wedue Claes Hoeijpijlen woonende tot Tilborch aen d'ander zijde, streckende ǁ metten eenen eijnde aende gemeijn moeren ende metten anderen eijnde aen Peeter Baijendijck, ǁ Soo hij verclaerde, vander selver Nicolaesken metten erffrecht te hebben ende te besitten, ǁ ende heeft die voorn. vercooper den voors. chijns den voorn. van Kessel tot behoeff vanden ǁ voors. Nicolaesken opgedragen met helmelinge vertijdenis inne maniren in dien gewoonlijck ǁ zijnde, geloevende die voors. vercooper als sculdenaer principael op verbant van sijnen persoon ǁ ende alle sijne goederen present ende toecomende, dat hij der voorn. Nicolaesken vanden voors. chijns ǁ sculdige ende gerechte sal doen warantscap, ende dat hij allen anderen commer, calangie ǁ ende aentael inde voors. onderpanden wesende oft comende, der voorn. Nicolaesken aff zal doen ǁ geheelicken uutgenomen eenen erffelicken pacht van elff loopen roggen aende Convente ǁ vande susteren van Orthen, ende alnoch eenen erffelicken chijns van elff gulden aen Meester ǁ Gerart van Nuenen uut den iersten onderpande ierst jaerlicx van rechts wegen ǁ te vergelden staende, soo hij seeghde, ende dat hij oijck de voorn. onderpanden voorde ǁ betaelinge des voors. chijns der voorn. Nicolaesken jaerlicx daer uut als voor, te vergelden ǁ altijt goet genoch ende welduegende sal maken ende houden, mit conditien inne desen ǁ toegedaen dat die voors. vercooper den voorn. chijns sal mogen lossen ende quijten tot ǁ allen tijden teffens ende t'eenemaele met de somme van hondert Carolus gulden tot twintich ǁ stuijvers goets hollants permissiegelts elcken gulden gereeckent in geen mindere specien ǁ als schillingen van ses stuijvers t'stuck, ende, metten loopenden jaerchijns ende achterstellen ǁ ten tijde der afflossinge vande voors. chijns t'achter ende onbetaelt staende, behoudelick ǁ datmen den voors. los sculdich ende verbonden sal wesen een halff jaer te voorens ǁ wittelijck te vercondigen ende op te seggen, getuigen waeren hier over Scepenen ǁ in shertogenbossche Johan vanden Berch, ende Henrick Tielemans, gegeven ǁ den negentienden dach der maent novembris int jaer ons heeren duijsent sesshondert ǁ vierenveertich.

Dorsale aantekening:

Niclaesken Janssen van Berckel, heeft midts ǁ desen oupentelijck beleden ende bekendt, dat d'heer Judocus Wiltsins ǁ als Evicteur vande goeden wijlen Servaes Goijarts ǁ den chijns van 5 gulden inne desen constitutui brieff ǁ vermelt, heeft affgelost ende gequeten, met twee ǁ jaeren achterstels opten 19 november 1663 ǁ incluis? verscenen ende vervallen, consenterende alzoo ǁ hiermede, dat die opten prothocolle deser stadt ǁ als sal werden gecasseert, geextingueert, doot, ǁ ende te nijet gedaen. Actum 21 Maij 1664. Ende ǁ des toirconde dese ondertekent etcetera.

bij mij Claesken Janss. van Berckel                             

P. de Louw testes                                                       

Enschot ende ǁ Loon                                                               

constitutie van ǁ V guIden voor ǁ Claesken Janss. van Berckel