Oisterwijk

Jan sone wijlen Frans Janssen heeft wettelijck ende erffelijck vercocht Adam Martens van ǁ Hees tot behoeff vande fabrijcke der prochie kercke binnen der Vrijheyt van Oisterwijck, Eenen ǁ jaerlycke ende erffelycke chijns van vijff Carolus gulden van twintich stuyvers tstuck, Te vergelden ende te betaelen allen jaer ǁ erstelyck opten achsten dach vande Merte, vueraff den jiersten betaeldach wesen sal opten achtsten dach ǁ vande Merte jierstcomende wesende van huyden over een jaer van ende uuteen huijsken hoff ende boomgart ǁ lant ende driesse ende erffenisse daeraen liggende ende daer toebehorende ses lopens. oft daeromtrent begrijpende gelegen inde ǁ prochie van Oisterwijck ter plaetse genoempt Berckel omtrent de Pighstrate, tussen erffenis ǁ Willem Ariaen Gerits aen deen zijde, en tussen eene steeghde aldaer aen dandere zijde, streckende ǁ metten eenen eynde aende gemeijn Pighstrate ende metten anderen eynde aen erffenisse Lijsken weduwe Aert Aertss. ǁ als hij sede om den voors. chijns bijde voors. fabrijcke in eenen erffrecht te hebben ende te besitten, gelovende ǁ die voors. vercopere als schulder principael op hem ende op alle sijne goederen hebbende ende vercrijgende den voors. chijns ǁ van vyff carolus gulden der voors. fabrijcke te waren als men erffchyns schuldich is te waren, ende tvoors. onderpant ǁ voorde jaerlycxe betaelinge vande voors. chijns altijt goet seker genoech ende weldogende te houden ende te ǁ maecken ende allen anderen commer ende calangie daerinne wesende der selver aff te doen geheelycken ǁ uutgenomen een mud roggen erffpachts in eenen meerderen pacht aende convente vande Couwater ǁ tot Rosmalen   ende noch seven gulden 1 stuijvers tsers aende kijnder Peter Lenart Heunen, beyde jierst van rechts ǁ wegen daer uut te vergelden staende, Met conditien hier inne toegedaen dat die vercopere den voors. chijns ǁ sal moghen lossen ende quijten altijt alst hem gelieven sal finaels ende eens mette somme van hondert ǁ gelijcke carolus gulden metten jaerchijns ende metten achterstelle ten thyde vande loss ten achteren ende ombetaelt ǁ staende behoudelijck dat hij gehouden sal wesen den loss een halff jaer te voorens wettelyck op te seggen, ǁ Getuygen waren hier over schepenen in Oisterwijck Jan Jansse Timmermans ende Jan Stevens vanden ǁ Biesenrijt die hunne segelen in getuygenis hier aen hebben gehangen, Opten achtsten dach ǁ April int jaer ons heeren duysent seshondert drijenveertich. ǁ J. Peijnenborch