Loon op Zand

Wij Dierck Raessen van Grevenbroeck, ende Adriaen Cornelis van Esch, schepenen ǁ der heerlicheijt Venloon, doen condt eenen ijegelijcken, naer dijen desen erffcoop bejaert ǁ ende bedaeght zijnde den dach van verbuete ten versuecke vanden geintresseerde was ǁ geprolongeert, ende daer naer bij surcheantie bij hen daer toe inden raede van Brabant ǁ verworffven, gestateert, soemen verclaerden, dat daerent eijnden t voors. stuck erffenisse ǁ drije sondaegen naeden anderen, soe binnen der stadt sHertogenbossche ter puijen aff, ǁ als inder kercke van Loon, daer men gewoonlijck publicatie is te doen, oepenbaerlijck ǁ ende voer alle man was geveijlt, ende een verbueth daer aff op heden date deser geleeght ǁ in eene oepenbaere herberge alhier tot Loon te weten ten huijse van Goijaert ǁ Geerits van Duppen stadthouder der voors. heerlicheijt, om daerop ten hoochsten ǁ te sitten, ende een ijegelijck daer aen ten achteren wesende naer behoiren ghenoech te doen, ǁ dat ter voorschreven plaetsen ende ter gewoonlijcker uren voer ons gecomen ende gecompareert ǁ is de voors. joncker Mathijs Cannaerts inder qualiteijt voors., ende heeft de voors. ǁ erffenisse oepenbaerlijcken ten beurde gestelt, daer voer biedende boven tgene inden ǁ vonnisbrieff begrepen staet den achterstel vanden voors. chijns van twelff guldens ǁ X stuijvers tsiaers, die nae date vanden voors. coop ende geduerende dese evictie ǁ verschenen is mette schaeden van recht, ende de costen op dit verbueth gedaen ende ǁ verteirt, ende dijer noch op gedaen ende verteirt sullen wordden, midtsgaeders de ǁ boeten vanden voors. ombetaelden chijns, behoudelijck dat hier aen cortten sal tgene d'evicteur ǁ inder qualiteijt als boven vanden hueringe van t voors. stuck erffenisse geduerende dese evictie ǁ genoten oft ontfangen mach hebben, ende t gene blijcken sal daerop betaelt te zijn, ǁ met conditien hier inne toeghedaen, dat in soe verre ijemant ten beurde compareert ǁ pretenderende met meer biedens dit verbueth aen hem te slaen, dat den selven gehouden ǁ sal wesen den voors. evicteur te voldoen binnen XIIII daegen, oft dat anderssins bij ǁ gebreke van dijen hij evicteur dit verbueth aen hem selven is reserverende, daer aff ǁ protesterende, daer naer is ten beurde ghecompareert Hendrick Diercxssen van Grevenbroeck ǁ soe als man ende momboir van Cornelia zijne huijsvrouwe dochtere wijlen Jan Adriaenssen ǁ Oirlemans, als mede inden naeme ende van weghen der kinderen van wijlen Huijbert Jan Peter ǁ Thonis, te kennen ghevende, dat wijlen Willem Adriaenssen Hoijmeijer aenden voors. ǁ Jan Adriaenssen Oirlemans opten XII^en junij anno XVI^c ende neghenthien opgedraeghen heeft ǁ ontrent vijff hont erffenisse gespleten van d'erffenisse ende hijpoteecq inden vonnisbrieff ǁ gementionneert, welck stuck erffenisse de voors. Willem Adriaens op hem ende ǁ allen zijne goeden hebbende ende vercrijgende den voors. Jannen Adriaenssen Oirlemans geloeft ǁ heeft te waeren, uuijtgenomen XII stuijver II oirt oft daer ontrent tot chijns aenden heere van ǁ Loon, sulcx dat soe verre den erffgenaemen des voors. Jan Adriaen Oirlemans de voors. vijff ǁ hont erffenisse ontwaert wordden bij dese evictie, zij daer bij beschaedicht souden wesen ǁ ontrent de somme van twee hondert guldens, boven de schaeden ende intresten bij hen ǁ geduerende dese evictie geleden, ende alsoe hij comparant hem beswaert is vindende, om dit ǁ verbueth aen hem te slaen, soe sustineert de selve comparant, dat de ghene, die met ǁ uuijtganck vanden bernende kersse aen dit verbueth sal geraecken te blijven, gehouden sal wesen ǁ de geevinceerde erffenisse ende hijpoteecke oepenbaerlijck ende voir alle man te priseren, te slijten ǁ ende te vercoopen, ende tgene boven de lasten ouder van date wesende, dan tgene voors. is ǁ sal comen over te schieten, dat hem comparant t selve opde t achterheijt ende schaeden der ǁ voors. erffgenaemen sal volgen ende uuijtgereijckt wordden naer behoiren, ende ingevalle ǁ van egeene overinge tzij int geheel oft deel, dat hij zijn verhael is reserverende, daer ǁ ende alsoe des behoiren sal, daer aff hij comparant inder qualiteijt voirgen. ende inden naeme ǁ als voer wel expresselijck is protesterende, een kersse naer ouder manieren ontsteecken ǁ zijnde, soe is de voors. joncker Mathijs Cannaerts inden naeme mijns heere van ǁ Loon met uuijtganck vanden selve kersse aen dit verbueth gebleven, onder protestatie ǁ als voir, ende des toirconden soe hebben wij schepenen van Venloon bovengenoempt ǁ onse propre zegelen hier onder aen in getuijgenisse doen hangen opten XXVIII^en dach ǁ der maent martij int jaer ons heeren XVI^c ende achtentwintich, ǁ D. Coomans secretaris ǁ 1636 ǁ