's-Hertogenbosch

Jan Lambert Rommen woonende tot Venloon dat men noempt Loon op Sant heeft wittelick ende erffelick vercoft ǁ Jenneken dochtere Marten Jans van Rossum wedue Anthoni Bax, eenen jaerlicken ende erffelicken chijns van seventich ende eenen halven carolus gulden ǁ tot twintich stuijvers goets gancbaers gelts elcken gulden gereeckent, te betaelen alle jaer erffelick opten twelffsten dach der maent van octobri, ende voorden ǁ iersten termijn van betaelinge opten twelffsten octobris anno XVI^c eenent'sestich, ende binnen dese stadt vrij van alle beeden, exactien, subventien, ǁ commeren, schattingen, ende lasten ingestelt ende, noch naermaels ingestelt te wordden, egeene lasten uutgescheijden te leveren, van ende, uut eene stede ǁ lants, te wetene huijs, hoff, gront, lant, weije, ende heijde daeraen liggende, ende toebehoirende, twintich loopensaten lants oft daeromtrent, int ǁ geheel begrijpende gelegen inde voors. parochie van Venloon ter plaetse genoemt de Vaerte, omtrent den Eijckendijck, tussen erve ǁ der kijnderen wijlen heer Jans van Leeffdael in sijn leven heere van Waelwijck oistwarts aen d'een sijde met meer andere, ende tussen erve Gerit ǁ Adriaens Tuijmelaer met meer andere westwarts d'ander sijde, streckende uutten suijden eensdeels van s'heeren varte, ende eensdeels van ǁ erffenisse der erffgenamen wijlen Corstiaen Anthonis noortwarts tot aenden Spranghschen waterganck ende oijck achter aen erve der voors. kinderen heer ǁ Jans van Leeffdael, soo hij verclaerde, vande selve coopersse mitten erffrecht te hebben ende te besitten, ende heeft die voorn. vercooper den voors. chijns ǁ de voorn. coopersse opgedragen mit helmelinge vertijdenis in maniren in dien gewoonlick zijnde, geloevende die voors. vercooper als sculdenaer ǁ principael op verbant van sijnen persoon ende alle sijne goederen present ende toecomende, dat hij de voorn. coopersse vanden voors. chijns sculdige ende gerechte ǁ sal doen warantschap, ende dat hij allen anderen commer, calangie ende aentael, int' voors. onderpant wesende oft comende de voorn. coopersse aff sal doen geheelicken ǁ uutgenomen eenen pacht van eenen sester roggen reductie betaelt worddende mit vijffentwintich stuijvers aen Meelmans gasthuijs binnen deser ǁ stadt, item eenen chijns van twelff gulden aen Henrick Peeters van Bergen op Soom, ende alnoch eenen chijns van vijff gulden aent' convent van Waelwijck ǁ ierst jaerlicx van rechts wegen daeruut te vergelden staende, soo hij verclaerde, ende dat hij oijck het voors. onderpandt voorde betaelinge des voors. chijns ǁ de voorn. coopersse jaerlicx daeruut, als voor te vergelden altijt goet genoch ende welduegende sal maecken ende houden met conditien, inne desen ǁ toegedaen dat die voors. vercooper den voors. chijns tot allen tijden sal moegen lossen ende quijten teffens ende ten eenemael mitte ǁ somme van drijehondert ende vijfftich carolus gulden tot twintich stuijvers goets permissie gelts elcken gulden gereeckent, ende mitten ǁ loopenden jaerchijns ende achterstellen ten tijde der afflossinge daervan t'achter ende ombetaelt staende, behoudelick dat men den voors. los een halff ǁ
jaer te voorens wittelick sal moeten te kennen geven ende opseggen, getuijgen waeren hierover scepenen in sHertogenbossche Johan ǁ Daniels van Oerle ende Joost Aertssen Canters. Gegeven den twelffsten dach der maent octobris int' jaer ons heeren duijsent ǁ sesshondert ende t'sestich. ǁ L. van Kessel ǁ Litera Johannis d[***] ǁ

In de marge:

Debet sigillium mits de ǁ gecoitteerde ǁ totte distribuetie ǁ vant' cleijn segel ǁ tijde der extentie ǁ daervan waeren ǁ onversien ǁ

Dorsale aantekening:

Venloon ǁ constitutie van XVII gulden ǁ