's-Hertogenbosch

Jan Henricxs van IJerssel woonende inde parochie ende heerlickheijt van Venloon datmen noempt Loon opt Sant, heeft ǁ wittelick ende erffelick vercoft Peeteren Henricx s. van Oudenhoven, eenen jairlicken ende erffelicken chijns van elff carolus tot twintich ǁ stuijvers goets gancbair gelts elcken gulden gerekent te betalen alle jair erffelick opten twelffsten dach der maent van augusto, ende ǁ voor den iersten termijn van betalinge opten twelffsten augusti naestcomende des jairs XVI^C een en vijfftich, ende binnen deser ǁ stadt vrij van allen beden, exactien subventien thiende twintichste honderste meerdere ende mindere penningen commeren scallengen ende lasten ǁ gewoonlick ongewoonlick ordinaris extraordinares ingestelt oft alnoch namaels ingestelt te wordden egeene lasten uutgesceijden ǁ te leveren ende te vergelden, van ende uuijt eenen acker lants gemeijnlick genoemt Willekens IJeije twelff loopensaten lants oft ǁ daerontrent begrijpende, gelegen inde voors. parochie ende heerlicheijt van Venloon ter plaetsse genoemt opte Molenstraet tussen erve ǁ Ghijsberts Claessen Buenen ende Stevens Lenairts aen deen sijde, ende tussen een heijvelt toecomende Wijt Peeters s. aen dander ǁ sijde, streckende metten eenen eijnde voor aen de gemeijnen strate ende metten anderen eijnde achterwaerts op erve ǁ der erffgenamen Adriaens Cornelis s., soo hij verclairde, vanden selven cooper metten erffrecht te hebben ende te besitten ǁ ende heeft de voorn. vercooper den voors. chijns den voorn. cooper opgedragen met helmelinge vertijdenisse inne manieren in ǁ dijen gewoonlick sijnde, gelovende die voors. vercooper als schuldenaer principael onder verbant van sijnen persoon ǁ ende allen sijnen goederen present ende toecomende dat hij den voorn. cooper vande voors. chijns sculdige ende gerechte sal doen ǁ warantscappe ende dat hij allen anderen commer calangie ende aentael in den voors. onderpant wesende oft commende den voorn. ǁ cooper aff sal doen geheelijcken, uutgenomen eenen erffelicken chijns van vijff gulden aen Fransken Kuijsten uut tvoorscreven ǁ onderpant ende meer andere goederen ierst jairlicx van rechts wegen te vergelden staenden soo hij seede ende dat hij oock ǁ tvoors. onderpant voor de betalinge des voors. chijns den voors. cooper jaerlicx dair uut soo voors. staet te vergelden, altijt ǁ goet genoch ende welduegende sal maken ende houden, [me]t conditien inne desen toegedaen dat die voors. vercooper den voorn. chijns ǁ sal mogen lossen ende quijten tot allen tijden teffens ende ten eenen maelen met de somme van twee hondert carolus gulden tot ǁ twintich stuijvers goets permissie gelts elcken gulden gerekent ende metten loopende jairchijns der afflossinge ende achter ǁ stellen van den voors. chijns tachter ende ombetaelt gelijck de selve cooper dat opentelick heeft bekent ende den voors. vercooper ǁ als sculdenaer principael onder verbant van sijnen persoon en allen sijnen goederen present ende toecomende dat wederom heeft gelooft, behoudelick ǁ dat men den voors.los schuldich ende verbonden sal wesen een halff jaer te vorens wettelicken te vercondigen ende op te seggen. Getuijgen waeren ǁ hierover schepenen in sHertogenbossche Jacob Focanus ende Matthijs Brul gegeven den elffsten dach der maent novembris int jaer ǁ ons heeren duijsent sess hondert ende vijfftich ǁ Van laken ja[***] ǁ XXIIIIen ǁ

In dorso:
Numero 27 ǁ [***] ǁ Elff gulden tot Loon ǁ