Loon op Zand

Wij Goijardt Janss Verdiesen ende Bertrom Claess sceepenen in Venloon doen condt eenen ijegelijcken hoe dat voir ons ǁ commen is Art wijlen Giliss Verhorst ende heeft geloeft alzulcke erffenisse als hij liggende heeft inde prochie van Venloon oostwart ǁ duer tcleijn verlaet omtrent der nijeuwer moelen gelegen mitten westenzijde neffen tstheenen strate metten erfenzijde neffen Robbert ǁ Geritss streckende vanden vurcant noortwairts op tot aenden heer van Loon toe alzoe hij zeede dat hij Art voirs. allen dat houdt dair op ǁ wassende ofte noch wassen zal aff houden tot scairhout ende egeen ander hout weederom te poeten scairhoudt ende allen oevergande ǁ eijken affsneijen zulx dat dan der voirs. moelen egeenen staede aff en omme ende ofte dit voors. weste tot anderen tijden toecommende ǁ enijge opgande eijcken aff hielde zoe zal Art voirs. dair weederom ander heesters moegen setten ende dije nijet narder der moelen dan ǁ dije oude eijken gestan en hebben, geloovende Art voirs. voir hem ende zijnen nacommelingen op hem ende op allen zijn goeden die hij ǁ heeft ofte vercrijgen mach deese geloeff voirs. euwelijck, vast, stentich ende van weerden te houden ende dair nimmermeer tegen ǁ te zeggen ofte doen zeggen met enijgen rechte geestelijck ofte weerlijck, In kennisse der waerheijt zoe hebben wij scepenen voirs. onsen ǁ zeegelen hier aen gehangen int jair ons heeren dusent vijffhondert vertich ende vijff opten tweeden dach van augusti

A. de Preijser  

Dorsale aantekening:

Con[***] temporali ǁ Loon ǁ raekende de plantagie ǁ ontrent den niewen ǁ meulen op de vaert