Loon op Zand

Lodewijck sone wijlen Adriaen Janssen van Hemert heeft geloeft als schuldenaer principael Adam ǁ Adriaenssen Mulder eenen jaerlijcxen, ende erffelijcken chijns van sess carolus guldens, te geven, ende te ǁ vergelden alle jaer erffelijck den XXVII^en dach der maent aprilis, ende voerden iersten dach van betaelinghe ǁ den XXVII^en aprilis des jaers XVI^c ende sevenendertich, vrije van alle beden, commeren, schattinghen, ǁ lasten, ende impositien, soo ordinaris, als extraordinaris, tot Venloon te leveren, van ende uuijt een ǁ halff huijs, schuere, hoff, grondt, ende ackerlant daer achter aenligghende, ende toebehoirende, acht ǁ loopensaeten, oft daer ontrent int gheheel begrijpende, gelegen binnen der heerlicheijt Venloon ter plaetsen ǁ genoempt den Ketshoevel, oistwaerts aen erffenisse der erffghenaemen wijlen Jan Joosten Taelen, ǁ zuijtwaerts aen sheerenstraete, westwaerts aen erffenisse Bruijst Janssen Stoop, ende noirtwaerts ǁ aende Twelff Geerden, soo hij seijde, ende heeft de voors. Lodewijck geloeft als schuldenaer principael op ǁ hem ende allen zijne goederen hebbende ende vercrijgende, dat hij den voors. chijns van sess carolus guldens ǁ jaerlijcx den voernoempden Adam Adriaenssen sal waeren, als men erffchijns schuldich is te waeren, ende allen commer ǁ calaingie, ende aentael in tvoors. onderpandt wesende aff sal doen, uuijtgenomen den grontchijns mijns heere ǁ van Loon, noch twee dordendeelen van acht vaten roggen tsiaers, ende noch twee dordendeelen van vijff vaeten roggen tsiaers, ǁ beijde aenden heijligeest van Venloon hier voir met recht uuijt te vergelden staende, met conditien hier inne toeghedaen ǁ dat de voors. Lodewijck Adriaen Janssen van Hemert den voors. chijns van sess carolus guldens tsiaers tseffens ende tenemael ǁ sal moeghen lossen metter somme van hondert carolus guldens goet gancbaer gelt metten jaerchijns ende ǁ achterstel ten tijde vande afflossinge ten achteren, ende ombetaelt staende, behoudelijck dat men den loss ǁ een halff jaer te voirens richtelijck sal opseggen, ende denuncieren. Ghetuijgen waeren hier over schepenen ǁ der heerlicheijt van Venloon, Peeter Peeterssen ende Ghijsbert Claessen Buennen, die henne zegelen hier ǁ onder aen in ghetuijgenisse hebben doen hanghen opten sessentwintichsten dach der maent aprilis int jaer ǁ ons heeren duijsent sess hondert, ende sessendertich ǁ D. Coomans ǁ 16[..] ǁ

Dorsale aantekening:
Constitutie van eenen chijns ǁ van sess guldens tsiaers op ǁ Lodewijck Adriaen Janssen ǁ van Hemert ǁ