Loon op Zand

Condt zij eenen ijegelijcken, want joncker Mathijs Cannaerts inden naeme ende van wegen des heere van Loon overmidts gebreck van betaelinge ǁ van eenen schepenen schultbrieff van Venloon van veerthien hondert ende thien guldens, midtsgaeders van eenen jaerlijcxen ende erffelijcken ǁ gewinchijns van twelff guldens ende thien stuijvers, welcken schultbrieff ende chijns Willem Ariens Hoijemeijer respective verleden ende ǁ geloeft hadde Jeronimus Benedictus ten behoeffve van mevrouwe van Loon respective in termijnen ende jaerlijcx te betaelen ende te ǁ vergelden ter causen van coop van LXXXIII loepensaet XX roijen ende XII^1/2 voet heijevelts, gelegen binnen der heerlicheijt van Venloon oistwaert ǁ Jan de Mulder met meer andere, zuijtwaert den gemeijnen wech, westwaert des heeren straete, ende noirtwaert des heeren hoeve met meer andere ǁ daer voer de voors. Willem zijnen persoon, ende allen zijne goeden present ende toecomende verbonden hadde, ende t voors. heijevelt tot hijpoteeck ǁ ende waerborch gestelt, gelijck dat in schepene lettren van Venloon daerop gemaeckt breeder begrepen staet, van welcken voors. schultbrie[ff] ǁ den voors. Cannaerts inder qualiteijt als voer noch gebrack de somme van elff hondert LXXXVI guldens XVII stuijvers XIIII penningen, ende vanden voors. b[***] ǁ gebrack hem drije jaeren, daervan egeene betaelinge en was geschiedt, als hij seijde, gericht waert overmidts vonnisse der schepenen van ǁ Venloon aen t voors. heijevelt, nu tertijdt betimmert, ende oijck ten deele tot lant ende weije gemaeckt zijnde, welck gericht Jan ǁ Adriaens vorster tot Venloon inden naeme ende als gemachticht vanden voors. Cannaerts volcomentlijck volvuerden; ende allet ende een ijegelijck ǁ daertoe dede, dat hij van rechts wegen schuldich was te doen, nijet daer inne achtergelaeten, alsoe doen dit aldus geschiedt was; ǁ gewijst waert overmidts vonnisse der schepenen van Venloon, dat de voors. vorster, als gemechticht t voors. gericht voer t voors. gebreck ǁ vercoopen mochte, ende dat de heere vanden lande den cooper oft coperen daer aff schuldich soude zijn gerechte waerschappe te doen, ende ǁ want t voors. gericht zijne geboden ende verboden heeft gehadt naer behoiren, ende oijck geboden is te quijten ende te lossen, die men van rechts ǁ wegen schuldich was te bieden, soe heeft de voors. Jan Adriaenssen vorster als gemechticht den schouteth t voors. gericht overgegeven, ǁ ende die schouteth heeft het van sheerenwegen opgehangen, ende de voors. Cannaerts inder qualiteijt als voer heeft daer voer geboden zijn ǁ voors. tachterheijt, soe vanden voors. schepene schultbrieff, chijns, als achterstel ende boeten van dijen mette schaeden van recht ende costen ǁ daerop gedaen, ende dijer noch op gedaen sullen wordden, alles ter goeder rekeninghe, ende naer uuijt wijsens de bescheeden daer aff zijnde, ende ǁ soe nijemant meer daer voer en biede, als de voors. Cannaerts, is hij als hoochste ende meest biedende inder qualiteijt voors. aenden ǁ coop gebleven, welcken hoochsten coopere die heere vanden lande overmidts vonnisse der schepenen van Venloon schuldich sal zijn gerechte ǁ waerschappe te doen, soe verre die schepenen van Venloon hier inne wijsers zijn, doen maenden die schouteth den schepenen, zoe het voirts ǁ met recht staen soude, doen wesen die schepenen, dat de voors. erffenisse jaer ende dach soude verhuert wordden. Getuijgen waeren hier over ǁ schepenen in Venloon Jan Wouter Claessen de Bondt, Dierck Raessen van Grevenbroeck, Dingeman Jan Joosten, ende Adriaen Hendricxssen Vos, die ǁ henne propre zegelen hier onder aen in getuijgenisse hebben doen hangen opten dertichsten dach der maent augusti int jaer ons heeren sesthien ǁ hondert ende drijentwintich ǁ Tempore J van Delft ǁ

In dorso:
St van het topnemen te minuteren ǁ passeren ende protocolleren ende van te ǁ [***] te setten numero 87 ǁ [***] het op landen deijr ǁ deser ǁ