Den Haag

D’eerste presiderende ende andere vanden raeden ende ǁ leenhove van Brabant onder de Vereenichde Nederlanden doen te wetene dat d’heer Matthijs Cannaerts gewesen drossart ǁ der heerlijckheijt Loon comparerende voor onse lieve ende getrouwe d’heeren David de Ruijter eerste presiderende raedt ǁ ende stadthouder mitsgaders Pieter van Panhuijs raedt ende man van leen inden voors. leenhove vervangende mede Arnoult van ǁ Beaumont insgelijcx raedt ende man van leen, exhibeerde seeckere acte van speciaele last ende procuratie op hen comparant ǁ gepasseert by d’heer Rogier van Broekhoven, ende versochte inde voors. qualite ten behoeve vanden voors. constituant uuijt ǁ den raden dite van wegen d’hooge ende moogende heeren Staeten Generael der Vereenichde Nederlanden als representerende ǁ den hertoge van Brabant verlijdt ende beleent te voerden met seeckere hoeve ende wildernisse in Udenhout gelegen onder ǁ Shertogenbossche int quartier van Oosterwijck groot ontrent hondert mergen metten chijns geheten der chijns van Reijlaer ǁ gelegen inde parochie van Goirle met een erffpacht van vijff mudden ende acht vaeten rogge hem heere constituant bij coopen ǁ aengecomen achtervolgende de opdrachte daer van voor schepenen van Shertogenbossche opden tweeden meert deses jaers XVI^C ǁ twee ende vijfftich, gedaen bij de voors. Matthijs Cannaerts in qualiteijt als inde voors. opdrachte waerop den raedt ende leenhoff ǁ uuijt den raden ende van wegen d’hoochgemelte heeren Staeten Generael den voornoempden stadthouder ende [..]mmen van leene ǁ gemaect hebbende te wijsen der recht waert is bij de selve verclaert ende gewesen dat sij den comparant inde voirs. qualite ǁ in hulde ende manschap ontfangen ende mette voors. leengoederen beleenen sullen ende is alsoo hij comparant inde voors. ǁ in qualite als vooren daeraff gecomen te hande ende monde doende hulde ende eedt van eeren ende trouwe met alle t g[..]t naer ǁ t leenhoffs recht van Brabant schuldig ende gehouden was te doen ende int voors. leengoet beleent ende in manschap ontfanget ǁ behoudens den heere ende eens jegelijcx sijns rechts ende des toirconden hebben wij den segel vanden voors. raede ende ǁ leenhove dese brieven doen aenhangen ende bij onsen griffier onderteeckenen gedaen ende alsoo gepasseert in s’Gravenhaege ǁ elff daegen inde maent van maio int jaer onses heeren XVI^C twee ende vijfftich ǁ

In dorso:

verheftbrief vande hoeve van [***] ǁ hout met den chijns van Rijlaer voor den ǁ leenhove van Brabant in s’Gravenhaeghe ǁ in date den 12^en  meij 1652 ǁ