's-Hertogenbosch

Alzoe Raes van Grevenbroeck schouteth der heerlicheijt van Venloon dat men noempt Loon opt Sandt, Jan ǁ Bartholomeus Geldensoen, Adriaen Joosten, Willem Cornelis s. de Pruijser, Gelden Arnt Henrixs s., Jan Willem Heijmens s., Kaerl ǁ Huberts s. ende Willem Martens s. scepenen tot Loon voers., Aert Adriaens s. van Grevenbroeck , Cornelis Jans s. Besauwen, Jan Hanrick Pruijser ǁ borgemeesteren aldaer, hadden te kennen gegeven, dat zij voer hen selven, als uuijten naeme ende van wegen des voers. dorpe ende gemeijnte ǁ hadden geconstitueert, gemachticht ende volcoemen macht gegeven Arnden Willems s. hennen borgemeester, ende Lamberden ǁ Gerit Gelden, omme te mogen compareren voerde weth der stadt van sHertogenbossche, ofte elders daer des van noode ǁ wesen soude, ende aldaer ten behoeve ende ten proffijte vande wedue Erken Eelkens woonende binnen der stadt van sHertogenbossche ǁ opte goeden ende gronden soe van hen, als des voers. dorpe ende gemeijnte competerende ofte anderssins anders mitte voers. wedue te ǁ accorderen ofte te blijcken, gelijck de voers. geconstitueerden tot nut, oirbaer ende proffijt vande voers, dorpe ende gemeijnte bevijnden ǁ souden te behoeren, gevende zij constituanten voers. den voers. geconstitueerden in desen sunderlinge bevele ende authoriteijt te doen ǁ ende handelen inder vuegen oft zij constituanten zelffs alomme present ende voer oogen waren, gelijck in seeckeren procuratie brieven ǁ van Loon daer aff gemaict ende geexpedieert breeder scheen begrepen te wesen waer aff den daet begrijpt opten drie ende twintichsten ǁ dach der maent novembris int jaer vijfthienhondert drie ende tachtentich, soe zijn gestaen voer scepenen ondergescreven die ǁ voers. Aert Willems s. bourgemeester ende Lambert Gerit Gelden gebruijckende de macht hen in vuegen ende maten alsboven gegeven ende ǁ gegunt, ende hebben geloeft onder verbijntenisse van allen den goeden vanden geenen daer zij aff gemechticht zijn in vuegen ende maten als ǁ boven ende alnoch die voers. Arnt Willems s. als sculdenaer principael onder verbant van zijnen persoon ende alle zijnen goeden hebbende ende vercrijgende ǁ ende die voers. Lambert Gerit Gelden onder verbijntenisse van eenen acker lants twee ende een halff loopensaet lants oft daer omtrent begrijpende ǁ gelegen inde parochie van Venloon ter plaetssen genoempt op Dersterlinge, tussen erffenisse Gerits Claes Delen oistwaert ter ǁ eenre ende tusschen de gemeijn strate suijtwaert ter andere zijden, streckende vanden erffgenaemen Jans Hendrick Preijser totten erffenisse ǁ Hubert Jans s., ende die voers. Adriaen Joosten heeft geloift onder verbijntenisse van twee ackeren lants deen beneffen den anderen, gelegen ǁ inne der voers. parochie van Venloon ter plaetsen genoempt opte Vaert tussen erffenisse Adriaen Arnts s. Oerman oistwaert ter eenre ǁ ende tusschen erffenisse Adriaen Jans s. Dielen ter anderen zijden ende mitten oerden eijnde streckende mitten zuijden eijnde aen een gemeijn stege, ǁ ende is desen voers. acker lants groot vier loopensaet, ende die voers. Willem Martens s. heeft geloeft onder verbijntenisse van eenen ǁ acker lants omtrent vijff loopensaet ofte daer omtrent begrijpende, gelegen inne der voers. parochie van Venloon, ter plaetsen genoempt ǁ op Craenvenne, tussen de erffenisse Jans Peter Loijen oistwaert ter eenre ende tussen den erffenisse ofte gemeijn straet noirtwaert ter ǁ andere zijden, strecken(de) met beijde den eijnden soe suijtwart als westwart aende gemeijn heijde, ende alnoch die voers. ǁ Aert Willems s., Lambert Gerit Gelden, Adriaen Joosten ende Willem Martens hebben geloift als sculdenaer principael ondert ǁ scheijden ende een vuer al onder verbant van henne persoonen ende allen henne goeden hebbende ende vercrijgende verlenen nagelaten wedue ǁ zaliger Jans Eelkens de somme van drie hondert vier ende tseventich gulden carolus gulden gemeijnlijck genoempt twentich penningen stuvers gemeijnlijck ǁ genoempt ofte die werde der selver in anderen goeden gelde ten tijde der betalinge binnen sHartogenbossche ter beursen gemeijnlijck ǁ loopende voer elcken der voers. gulden te rekenen ende achtien der gelijcke stuvers ende twee oert vanden hoochtijde van Sinte Andries ǁ apostel naestcomende over een jaer te geven ende te betalen, ende binnen der stadt van sHartogenbossche vrij te leveren, getuijgen ǁ waeren hier over scepenen in sHertogenbossche Roeloff Aerts s. ende Nicolaes van Thulden. Gegeven den sess ende ǁ twintichsten dach der maent van novembri int jaer ons heeren duijsent vijffhondert drie ende tachtentich. ǁ J Donck secretaris ǁ secretaris Donck ǁ

In dorso:

Desen schultbrieff is gecasseert ǁ ende verandert met zekere andere ǁ voluntaire condempnatie slaande op ǁ Willem Mertens ende Ferdinandus Jacobs s. voor ǁ scepenen deser stadt gepasseert ǁ opten II^en dach decembris anno XV^C ǁ drije ende tachentich ǁ Looijen ǁ [***]ǁ