's-Hertogenbosch

Aert Jaspars Tielmans, president der vrijheijt van Hilvarenbeeck, heeft ǁ wittelick, ende erffelick vercocht d'heer Cornelis vander Merendonck, licentiaet inden rechten, ende raedt ǁ deser stadt, tot behoeff van jouffrouwe Hester van Griensven, Eenen jaerlicken, ende erffelicken chijns van ǁ vijffthien carolus gulden, tot twintich stuijvers goets ganckbaers gelts elcken gulden gerekent, te betaelen ǁ alle jaer erffelick opten sesthiensten dach der maendt van maij, ende voor den iersten termijn van betaelinge ǁ opten sesthiensten maij anno sesthienhondert tweenevijfftich, ende binnen dese stadt vrij van alle beden,ǁ exactien, subventien, thiende, twintichste, honderste, meerdere, ende mindere penningen, commeren, schattingen, ende ǁ lasten, ordinarisse, extraordinarisse, ingestelt, ende alnoch naermaels ingestelt te worden, egeene lasten ǁ uijtgescheijden, te leveren, ende te vergelden, van ende uijt twee hoijbeempden, negen ende een halff loopensaeten ǁ lants, oft daerontrent int geheel begrijpende, gelegen inde voors. vrijheijt van Hilvarenbeeck, ter plaetse ǁ genoempt inde Haecxfoort, tussen erve Meester Jans Zijlbos, suijtwaerts aen d'een sijde, ende tussen erve Isabeel,ǁ weduwe Jacobs Jan Huijbrechts, noortwaerts aen d'ander sijde, streckende metten eenen eijnde oostwaerts op ǁ erve Anthonis Henricx vanden Kijeboom, ende metten anderen eijnde westwaerts op de gemeijnte, soo hij ǁ verclaerde, vander selver jouffrouwe Hester van Griensven metten erffrecht te hebben, ende te besitten, ende ǁ heeft die voornoemde Aert vercoopere den voors. chijns den voornoemde heere Merendonck, tot behoeff der voors. jouffrouwe ǁ Hester van Griensven opgedraegen, met helmelinge verthijdenisse inne manieren inne dijen gewoonlijck sijnde,ǁ gelovende die voors. vercooper, als schuldenaer principael, op verbant van sijnen persoon, ende allen sijne ǁ goederen, present, ende toecomende, dat hij de voornoempde jouffrouwe Hester van Griensven vanden voors. ǁ chijns schuldige, ende gerechte sal doen warantschappe, ende dat hij allen anderen commer, calaengie, ende ǁ aentael inden voors. onderpande wesende, oft comende, der selver jouff(rouw)e Hester van Griensven aff sal ǁ doen geheelijcken, ende dat hij oock den voornoempden onderpande voorde betaelinge des voors. chijns, de ǁ voornoempde jouffrouwe Hester van Griensven jaerlicx daeruijt, soo voors. staet, te vergelden, altijt ǁ goet genoch, ende weldeugende sal maecken, ende houden. Met conditien inne desen toegedaen, dat die ǁ voors. vercooper den voornoempden chijns sal mogen lossen, ende quijten tot allen tijden teffens, ende ten ǁ eenenmaele, met de somme van drijehondert carolus gulden, tot twintich stuijvers goets permissie gelts ǁ elcken gulden gereeckent, ende metten loopenden jaerchijns, ende achterstellen, ten tijde der aflossinge ǁ vanden voors. chijns ten achteren, ende ombetaelt staende, behoudelijck dat men den voors. los schuldich, ende ǁ verbonden sal wesen een halff jaer te voorens wittelicken te vercondigen, ende op te seggen, Getuijgen waeren ǁ hierover schepenen inne sHertogenbossche, Jacob van Casteren, ende Ghijsbrecht Kuijsten, Gegeven den ǁ sesthienden dach der maendt van Meije, int jaer ons heeren, Duijsent sesshondert Sevenenvijfftich ǁ [..] van Kessel ǁ vidua domicella Hester van ǁ Griensven ǁ

In dorso:
Numero 92 ǁ Seigneur Peter van Bercs ende Jurriaen van Laarn beijde als ǁ regerende blocmeesters vanden block vanden merck binnen dese stadt ǁ hebben opentlick bekent ende beleden dat meester Johan Rijsbosch ǁ wegens den sterffhuijse van Aert Jaspar Thielemans aan behoorlicke gedaene opsegginge ǁ den chijns in 't wittelick deser begrepen den voors. block aengecomen bij ǁ transporten in aen hunner handen heeft ǁ affgelost ende gequeten consenterende oversulx inde cassatie deses ǁ Actum den X^e Maij 1670 Toirconde prior etiam in libro ǁ Hilvarenbeeck ǁ XV gulden sjaers, verschijnende ǁ den XVI^e maij, te los met ǁ III^C gulden ǁ