Hilvarenbeek

Heijliger soone Corstiaen Huijbrechts Loeijen, heeft vercocht ende gelooft ǁ als een schuldenaer principael, Hendricken Hendricx vande Kieboom, ende Jannen Aert ǁ Hessels, als momboirs ende toesienders van de onmundige kinderen wijlen Cornelis Hendricx vande ǁ Kieboom, verweckt aen Maria Aert Hessels, de voors. Maria voor haer leven voor ǁ d'een hellicht in tochten, ende ten behoeve van hare ende des voors. Cornelis kinderen ten ǁ erffrechte jaerlijck ende erffelijck te gelden ende te betaelen eene jaerlijcke ende erffelijcke ǁ rente van vijftich carolus gulden, elcken carolus gulden ten prijse van twintich stuijvers, alle jaer ǁ op onser vrouwen dach lichtmisse, ende eerstmaels te lichtmisse eerstcoomende over een jaer, los ǁ ende vrij van alle ordinarise ende extraordinarise dorpslasten, inne gestelt ofte inne gestelt ǁ te worden, welckerhande ende hoedanich deselve lasten souden mogen wesen off genaemt worden ǁ egene daer van uutgescheijden, uijt ende van een stuck bempts genoemt den Luijen voortsen bempt ǁ
gelegen t'Eijsbeeck int Nereneijnse Broeck aldaer neven erve Peter Hendrick Vrancken met d'oistensijde, de ǁ weije des Heijlige Geest van Beeck mette westenzijde, aen erve Lambert Hans Hessels metten zuijdeneijnde,ǁ streckende metten noordeneijnde aen erve Willem Huijbrecht Voss, Item uijt ende van een bempt ende een weije ǁ aen maelkanderen gelegen, genoemt de Luijen voortse weije, gelegen omtrent ter plaetsen voors., aldaer aen de gemeijne ǁ heije metten suijdeneijnde, aen erve Lambert Hans Hessels metten noerdeneijnde, streckende neven erve Hendrick Adriaen ǁ Baeijens met d'oistensijde, ende metten westensijde neven erve der weduwe ende kijnde Adam van Laerhoeven, mette ǁ westensijde, wesende vrij van renthen ende pachten, Ende die voors. vercoopere heeft gelooft als een schuldenaer ǁ principael op hem ende alle sijne goederen hebbende ende vercrijgende dese erffrente te waren gelijck men erffrechten met ǁ recht schuldich is te waren, ende d'onderpanden voors. altijt goet seker ende weldoegende te maecken voor die ǁ betalinge der jaerlijcke ende erffelijcke rente voors. met voorwaerden dat hij vercoopere alle jaer op Onser ǁ Vrouwen dach Lichtmisse tot sijnen schoonsten als hem gelieven, coomen sal mogen ende lossen ende quijten de ǁ erffrente voors. metter somme van drij hondert carolus gulden ten prijse als voor, in gepermitteerde ǁ ende gevalueerde munte, der Geunieerde Provintien, altijt metten achterstel ende jaer rente, ten ǁ achteren ende onbetaelt staende, Behoudelijck den los een halff jaer van te vooren op te seggen, Getuijgen ǁ waren hier over schepenen der dinghbancke van Hilvarenbeeck, Peter Jekerman, ende Hendrick vande Werff, ǁ Gegeven int jaer ons heeren XVI^C vier ende vijftich, den vier ende twintichsten dach der maent Januarij.ǁ H. Pannekoeck ǁ