Hilvarenbeek

Wij Wouter van Vijgen ende Adam Gysbrechtss. scepenen in Beke tuygen onder onsen gemeynen zegele dat ǁ voer ons coemen is Henrick s. wilnere Henrick Pauwels als man ende momboir van Michtelde zijnen ǁ huysvrouwen dochter wilnere Willems Wouter Boeyenss. ende heeft erffelycken vercocht ende geloeft ǁ te gelden ende te betalen jaerlycken ende erffelycken Peteren Jan Goeijaertss. een jaerlycke ende ǁ erffelycke rente van vyftalven karolus gulden twintich stuvers voer elcken karolus gulden ǁ gerekent oft die rechte werde daer voer in anderen goeden gelde nu gevalueert wesende alle jaeren ǁ op Onser Vrouwen dach Lichtmisse uuyt ende van zynder huijsinge ende timmeringe metter erffenijs ǁ daer aen liggende ende daer toebehoerende gelegen optie Hagors tussen erffenisse Wouter ǁ Willemss. ende Lenaert Everaertss. optie een zijde ende tussen erfenissen Wouter Willemss. voirs. ǁ ende die vroent met meer anderen optie ander zijde. Item noch uuyt ende van eenen stuck ǁ erfs hier tegen eener aen dander zijde vander straten gelegen tussen erffenissen Jans van ǁ Moll met meer anderen optie een zijde ende neven die straet optie ander zijde als hij sede ǁ ende Henrick voers. heeft voerts geloeft op hem ende op allen zyn gueden hebbende ende ǁ vercrygende dese erfrente voers. te waeren alsmen erfrenten met recht sculdich is te waeren ǁ ende donderpanden voer die betaelinge den voers. erfrenten altyt goet genoch waeldoegende ǁ te maecken ende zeker genoch gegeven int jaer ons heeren duysent vyfhondert ǁ ende achtendertich enentwintich daghen in junio.