Hilvarenbeek

Wii Ian vanden Royen ende Ian die Ceman vanden Hoeve scepenen in Beeck tuyghen onder onsen ghemeynen segell dat voir ons comen siin Bartholomeeus ǁ vanden Niewenhuiis wilner Henricx soen aen deen siide ende Liisbet Ians dochter vanden Hoeve aen dander side voir hair selven ende voir hair ǁ wittige kinderen die sii vercregen heeft bii wilner Iannen Stevens met haeren momboir haer gegeven ende hebben een erfwisselinge gemaect ende gedaen bii ǁ rade van haeren vrienden van sommigen haeren erven ende erfpachten overmids welker erfwisselinge wille, soe sall Liisbet voirs. met haeren ǁ kinderen ende Bartholomeeusen ontfangen hebben houden ende besitten een bocht geheiten bruggenbocht met eenen acker dair aen gelegen geheiten den ǁ voirtacker gelegen tot Diessen bii die brugge metten eenen siden streckende op die gemeyn[straet] ende aen erffenissen wilner Ghiiben Meeus kinderen ǁ dander side die selve voirsc. kinderen ende aen Iacop Thiis erffelycke goederen metten enen einde aen die vaert dander einde aen erffenissen der voirscr. ǁ kinderen, dese voirs. erffenissen vanden voirs. Liisbetten met hoeren kinderen voirscr. in een recht erfrecht te besitten  dair sii iairlicken ende ǁ erffeliiken uut sullen bliven gelden ende gelovende te gelden ende te betalen iairliken ende erffelyken te weten uuten voirtacker ontrent twe ǁ penninghen in des hertogen chiins hier toe sall Liisbet voirs. noch erffeliick bliven gelden ende geloeft te gelden ende te betalen allen iair op ǁ Onsen Vrouwen dach Lichtmisse drie mudd roggen iairliicx ende erffeliicx pachts Liisbetten dochter Lauwereys Meeus Hillen soen die ǁ welck Lauwereys voirs. vercregen heeft bii wilner Katheliinen dochter wilner Henricx vanden Niewenhuys hier tegen sall Bartholomeeus ǁ voirs. hebben houden van Liisbetten ende hoeren kinderen voirs. ende tot siinen erffeliicheit te besitten een stuck beempts aen dat sprenkels-ǁ einde gelegen ter plaetsen geheiten in den vorsthout gelegen metten einde aen erffenisse der kinderen wilner Wouters van Beloys dander siide ǁ aen erffenissen Ians vanden Hoeve geheiten die Ceman hoedende metten enen einde aen erffenissen Michielen Henrick Meeus soen dander ǁ siide aen die vrunt dit voirs. stuck beempts vanden voirs. Bartholomeeusen in een recht erfrecht te besitten dair hii iairliken ende ǁ erffeliiken uut sall blive  gelden ende gevest te gelden ende te betalen iairlyken ende erffeliiken tot behoerliiken dagen ende plaetsen der ǁ kercken van Diessen twee scellinge payments ende voirt meer  soe geloeft Bartholomeeus te geven ende te betalen Liisbetten ende ǁ haeren kinderen allen iair op Onse Vrouwen lichtmiss dach een mudd roggen iairliicx [***] voir ende vander ǁ erffenissen voirg. ende hebben [***] Liisbetten met haeren kinderen voirs. met haeren [***] seden ende Bartholomeeus ǁ voirs. ter andere siden doen den andere op hen ende op allen haire guederen hebbende ende verkrygende dese erfwisselinge tot ǁ ewigen dagen vast ende stendich te houden ende in honnen name te doen houden sonder enich wederseggen ende hebben voirt ǁ geloeft dese voirs. personen op die voirs. verbintenisse dat een yegelyck sinen commer hen in dese erfwisselinge voirnoempt ǁ wesende alzo gelden ende betalen sall als dat die ander van hen ende siin gueden dair aff sellen bliven angehouden ten ewigen ǁ dagen hier siin bii gestaen Thomaes wilner Lauwereiis Stevens soen ende Ian vanden Hove Willems soen ende hebben geloeft met  ǁ Liisbetten voirsc. ende voir die voirs. Liisbetten kinderen dese erfwisselinge vast ende stendich te houden ten ewigen dagen, gegeven ǁ int iair ons Heeren duysent vierhondert tsestich ende negen in aprili thien daghe