Hilvarenbeek

Wij meester Jan Willem Lemmensz., ende Jan Willemsz. de With scepenen der ǁ vrijheijt ende dingbancke van Hilvarenbeeck is comen Geraert sone wijlen Jan ǁ Jan Geraert Diercxss. als man ende momboir van Cornelia sijn huijsvrouwe dochtere ǁ wijlen Geraert Adriaen Wijnants van Hulsel, ende heeft vercocht ende geloift als een ǁ schuldenaer principael jaerlijcken ende erffelijcken te gelden ende te betaelen Andriesen ǁ sone wijlen Michiel Henricx vanden Nieuwenhuijse weduwer wijlen IJda syn huijsvrouwe ǁ dochtere wijlen Adriaen Mathijssen vanden Nieuwenhuijse ende sijnen wittigen kinderen ǁ een jaerlijcke ende erffelijcke rente van sess carolus gulden, tot twintich stuvers den ǁ gulden gerekent oft die weerde inne anderen goeden gepermitteerden gelde daer ǁ voir, alle jaer op Onser Vrouwen dach Lichtmisse, ende ierstmael op Lichtmisse ǁ ierstcomende, uuijt ende van sijnder huijsinge ende hoevinghe met heuren gronde ǁ ende toebehoerten metter erffenisse daeraen liggende ende daertoe behorende gestaen ǁ ende gelegen in de parochie van Diessen ter plaetsche geheijten Hagorst op Ymelre ǁ aldaer aen erffenisse Sebastiaen Aben suijtwaert, ende erffenisse Jan Wouters ǁ vanden Broeck westwaert, ende erffenisse de erffgenamen wijlen Adriaen Brievincx ǁ noortwaert streckende oistwaert neffens de vroente, Ende heeft gelooft ǁ op hem ende allen sijne goederen hebbende ende vercrijgende dese erffrente te ǁ waeren gelijck men erffrenten met recht schuldich is te waeren ende donderpandt ǁ voirs. altyt goet seker ende waeldogende te maecken voir die betalinge de ǁ jaerlycke rente voirs., Gegeven int jaer ons Heeren duysent sessehondert ǁ ende elffve, den sevensten marty. ǁ Bartholomeus de Cort subscripsit ǁ

In dorso:
Dese rente bij reecke van curateele ǁ voldaen met 100 gulden gesloten ǁ reeck den 11 augustij 1698 ǁ Neeltken weduwe Gerit Jan ǁ Gerits alias Geen Henssen ǁ van VI gulden voor de huijsarǁmen van Hilvarenbeeck ǁ gelegateert bij Cathelijn ǁ vande Venne. ǁ