Hilvarenbeek

Wij Willem Janss. de With ende Huijbrecht Aert Schellekens schepenen inne Hilwarenbeeck ǁ tuijghen onder onsen gemeijnen segule dat voor ons comen is Mathijs zone Adriaen ǁ Janss. van Spreuwel ende heeft vercocht ende gelooft als een schuldenaer principale ǁ jaerlijck ende erffelijck te gelden ende te betaelen Adriaenen Claess. van Spreuwel ǁ een jaerlijcke ende erffelijcke rente van vijer carolus gulden tot twintich stuvers den ǁ gulden gerekent oft de gerechte weerde in andere goede permissie munte ǁ daervoor alle jaer op Onser Vrouwen dach Lichtmisse ende is ierstmale verschenen ǁ op Onser Vrouwen dach Lichtmisse anno achtentseventich lestleden, uuijt ende ǁ van zijnder huijsinge ende hoevinge metter gronde ende toebehoirte, metter ǁ erffenisse daeraen liggende ende daertoe behoirende gestaen ende gelegen tot ǁ Beeck aende Voort aldaer tusschen den Leijten Padt opte een zijde ende erffenisse ǁ Aert Pauwels Otten opte andere zijde streckende vander gemeijn strate ǁ tot eenen gemeijnen ackerwech als hij zeijde Ende die voors. vercoopere ǁ heeft gelooft op hem ende alle sijne goederen hebbende ende vercrijgende ǁ dese erffrente te waeren alsoe men die met recht schuldich is te waeren ǁ ende d'onderpande voirs. altijt goet seker ende waeldoegende te maken ǁ voor die betaelinge der jaerlijcke rente voirs. Gegeven int jaer onss heeren ǁ vijffthienhondert tachtentich den vijffsten februarij ǁ Geregistreert bij [***ort] ende uuijtgemaeckt bij A Hessels substituut secretaris ǁ

In dorso:
Desen brieff van vier gulden ǁ jaerlijcks hoirt toe den ǁ schulde vanden heilige sacrament ǁ genoempt van den oude rente ǁ dije Lijntken weduwe Cornelis ǁ Schilders aende dese Broeder so[..]ǁ plach te gelden ǁ