's-Hertogenbosch

Alsoo Adam sone wijlen Adriaen Claes van Spreuwel hadde vercocht ǁ ende gelooft als een schuldenaer principael, Peeteren Wouters Verrijts, als momboir, ende toesiender ǁ ende tot behoeff van de onmundige kinderen wijlen Jan Peeters van Mol, dat hij gelden ende betaelen soude ǁ den selven kinderen eene jaerlicke, ende erffelicke rente van achthien carolus gulden, elcken carolus ǁ gulden, ten prijse van twintich stuijvers, los ende vrij van alle ordinarisse, ende extraordinarisse dorpslasten,ǁ innegestelt, oft ingestelt te worddene, welckerhande, ende hoedanich die selve lasten souden mogen ǁ wesen, oft genoempt wordden, egeene daervan uijtgescheijden, alle jaer opten sesthienden Aprilis, van ǁ ende uijt een stuck saijlants, genoempt het Putthen, ontrent sess loopensaet begrijpende, gelegen inden ǁ Hertganck van Loo ter plaetse genoempt het Loth, aldaer tussen erve Jacob Henrick Loijen, ende meester ǁ Jacob vanden Kerckhoff met die oistensijde, d'erve des voorscreven Jacops, ende de Broeckstraet aldaer op ǁ die noordensijde, tussen erve Marten Peeter Melis met die westensijde,streckende met de suijdensijde ǁ neven erve Cornelis Dierck Moonen, ende het onmundich kindt Matheus van Ubelen, met d'ander sijde,ǁ Item uijt een stuck lants, geheeten De Groote Sijde, drie loopensaet oft daerontrent begrijpende, gelegen ǁ aent Loo, ter plaetse genoempt den Groenen Wech aldaer, tussen den Groenen Wech mette westensijde,ǁ d'erve der weduwe, ende kinderen Andries Marcelis metten noordeneijnde, d'erve Nicolaes Zebrecht ǁ Vrancken met d'oijstensijde, streckende metten suijdeneijnde aen erve Peeter Verrijth, daer den kerckpat ǁ tussen beijde loopt, gelijck inne schepenen brieven van Hilvarenbeeck, daerop gemaeckt, breeder staet ǁ begrepen, wesende vander date int jaer ons heeren sesthienhondert dertich, ende acht, den lesten ǁ dach van april, Soo is gestaen voor schepenen ondergescreven Cornelis van Mol, sone wylen Jans ǁ Peeters van Moll voornoempt, gepasseert den ouderdom van vierentwintich jaeren, soo hij verclaerde,ǁ ses gulden jaerlicker, ende erffelicker rente, inde voornoempde rente van achthien carolus gulden ǁ die hem mits sekere erffscheijdinge, ende erffdeijlinge voor schepenen van Hilvarenbeeck gepasseert, te deel ǁ ende te lothe gevallen waeren, ende daervan die resterende twelff gulden waeren gelost, soo hij verclaerde,ǁ heeft hij wittelick, ende erffelick opgedraegen, ende overgegeven mits desen Laureijnssen van Kessel, tot behoeff ǁ van den huisarmen van Hilvarenbeeck, gefundeert bij Andries Michielss., tot augmentatie der fundatie van ǁ Catharina van den Venne, sijne huijsvrouwe zaliger, tsamen mette voorscreven brieven, ende den alingen rechte, hem,ǁ opdragere daerinne, ende den inhouden van dijen eenichssints competerende, ende met een jaer achterstels ǁ daervan verschenen, ende onbetaelt staende, soo hij verclaerde, Ende heeft helmelinge daerop verthegen inne ǁ manieren inne dijen gewoonlijck sijnde, Gelovende die voorscreven opdragere, als schuldenaer principael, op ǁ verbant van sijnen persoon, ende allen sijne goederen present, ende toecomende, dat hij den voorscreven huijsarmen van de ǁ voornoemde ses gulden jaerlicker, ende erffelicker rente voornoemt schuldige ende gerechte sal doen warantschappe, Ende ǁ dat hij allen commer, calaengie, ende aentael daerinne wesende, oft comende, den selven huijsarmen aff sal ǁ doen geheelijcken, Ende dat hij oock de voorscreven onderpanden voor de betaelinge der voorscreven ses gulden jaerlicker ǁ ende erffelicker rente voornoempt, den voorscreven huijsarmen jaerlicx daeruijt als voir te vergelden, altijt goet genoch ǁ ende weldeugende sal maecken, ende houden. Getuijgen waeren hierover schepenen inne sHertogenbossche, Johan ǁ vanden Noort, ende Hans Strick, Gegeven den vijffthienden dach der maendt novembris, int jaer ons Heeren duijsent ǁ seshondert ende vierenveertich.ǁ V.S. van Kessel ǁ

In margine:
pro deo ǁ

In dorso:
deze 2 aeneen gehechte brieven ǁ sijn als volcht ende ǁ sijn al affgelost ǁ inden buijtensen van date 30 april ǁ 1638 wort bij Adam Adriaen Claes ǁ van Spreuwel voor schepenen van ǁ Beeck gelost aen Peter Wouters ǁ Verrijt als momboir en toesiender ǁ ende tot behoeff vanden onmundige ǁ kinderen Jan Peters van Mol 18 gulden ǁ siaers 200 gulden sijn hier van ge[***]ǁ [***] als blijckt in dorso vanden consutatio ǁ brief ǁopdracht van sesse gulden jaerlike ǁ op Adam van Spreuwel tot ǁ Hilvarenbeeck pro pauperis ǁ domesticis, den 16 april verschijnen ǁ