Hilvarenbeek

Wij Jan van Gorp ende Jan van Moll scepen in Beeck tuijgen onder onsen gemeijnen zeghel dat voor ǁ ons zijn coemen Claes ende Dirck gebruederen ende Marije huer suster met haeren momboir haer vanden ǁ heer ghegeven alsoe als recht is withighe kijnderen wilner Jan Thomaess. van Creijtt van Jannen ǁ ende Kaetlijnen zijnre huijsvrouwe dochter wilner Dirck Henrick Aleijten ende Ghijsbrecht Wouterss. ǁ van der Steenvoert als man ende momboir van Anna zijnre huijsvrouwe dochter wilner Jans ende ǁ Kaetlijnen voers. tsamen verwect, ende hebben een erfdeijlinghe ende erfscheijdinghe ghemaect ǁ ende ghedaen bij raede van hueren vrijenden van zekeren erfpachten hen toebehoerende als ǁ zij zeden Overmidts welcker erfdeijlinghe ende erfscheijdinghe welke voers. Soe sal Ghijsbrecht ǁ voers. als man ende momboir van zijnre huijsvrouwe voers. hebben ende erffelijcken besitten een ǁ mudde rogs erfpachts der maeten van Woensel op Gheriden vanden Water. Noch negen loepen ǁ roggen erfpachts der maeten der maeten van Vessem d welck Jan Luijens jaerlijcx geldende is ǁ allet nae inhout van scepenen litteren daer op gemaect, ende hebben Claes, Dirck, ende Marije met ǁ haeren momboir voers. op dit gedeelte wittelijcken ende erffelijcken verteghen tot behoeff van ǁ Ghijsbrechten ende zijnder huijsvrouwe ende op allen scepen litteren ende vorwaerden daer aff mentije ǁ maeckenen ende gewach doenen in manieren als dat ghewoenlick is Gheloevende op hen ende ǁ op allen henne gueden hebbende ende vercrijgende dese erfdeijlinghe Ghijsbrechten altijt vast ǁ ende stentich te houden sonder enich wederseggen Ende allen commer ende calaengije elck van  ǁ zijnre wegen hijer inne wesende aff te doen den selven met vorwaerden toegedaen indijen ǁ ijemant van zijnen erfpacht in heele oft in deele met recht ontwaert worde soe ǁ hebben deijn deijlderen voers. gheloeft op tije verbijntenisse voers. dijen commer malcanderen ǁ kijnt kijntsgedeelte gelijck te helpen gelden ende te dragen sonder argeliste Ghegeven in ǁ jaer ons heeren duijsent vijfhondert ende tweenvijftich twintich daeghen in januario ǁ rescribatur ǁ

In dorso:
Ghijsbrecht van de Steenvoert ǁ