Hilvarenbeek

Wij Wouter Sledden ende Jacob Jan Huijbrechts schepenen der vrijheijt ende dingbancke van Hilwarenbeeck, tuijghen onder onsen ghemeijnen zegule dat voir ons is comen Andries Michielsen, Ende ǁ heeft openbaerlijcken verclaert ende bekent, dat hij in puerder aelmisse ende caritate tot laeffenis van sijnder sielen ende van sijner vrienden gemaeckt gegeven gelaeten ende beseten heeft, gelijck hij gheeft ǁ laet maeckt ende beseten mits desen tot behoeff vanden schamele huijsarmen inder parochie van Diessen in gerede penningen de somme van hondert gulden bij den eerwaerde heere Henrick vanden Kerckhoff pastoir ǁ der parochie van Diessen overlange ontfangen omme ten behoeve vande selve huijsarmen aen jaerlijcxe rente beleeght te worden, I[t]em noch eene jaerlicke ende erffelicke rente van acht carolus guldens die ǁ welcke Dierck Matheus Ziebben ende Jan sijnen sone gesamenderhant ende elck een voor al als een principael schuldenaer opten veerthienden julij vijffthienhondert vierentseventich voor schepenen inne Beeck jaerlijcken ǁ ende erffelijcken vercocht ende geloeft hebben te gelden ende te betaelen Adrianen Mathijs vanden Nieuwenhuijse uuijt ende van eender huijsinge ende hovinghe metter erffenisse daeraen liggende ǁ ende daertoe behoirende gestaen ende gelegen binnen der parochie van Diessen ter steden geheijten Optie Haeghorst, tusschen effenisse Diercx sone wijlen Diercx de Mesmaecker optie suijden zijde ǁ ende erffenisse Willem Henrick Smolders optie noirdenzijde, streckende vander vroente totter erffenisse Diercx ende Willems voorgenoempt, Item noch uuijt ende van een stuck landts geheten ǁ Het Hamerlant, gelegen ter plaetse voors. tusschen erffenisse Willems voors. optie een zijde ende eenen gemeijnen dijck optie ander zijde, I[t]em noch uuijt ende van een stuck landts geheijten Die ǁ Bocht oijck op Haeghorst voors. gelegen tusschen Willem Henrick Smolders voorgenoempt optie noirdenzijde ende erffenisse vanden Heijligegeest tot Diessen optie suijdenzijde, streckende ǁ vander vroente totter erffenisse Geraerts dochtere wijlen Matheus Zibben, Item noch uuijt ende van eenen stuck erffs liggende tot landt ende groese geheijten Den Goch, gelegen ter plaetsen voorgenoemt ǁ rontsomme aen erffenisse Henrick Henrick Piters, Item noch eene jaerlicke ende erffelicke rente van vijer carolus gulden elcken gulden ten prijse van twintich stuvers ierstmael geloeft bij Henrick ǁ Aert Vingerhoets te gelden ende te betaelen alle jaer op Onser Vrouwen dach Lichtmisse Wouteren van Eijghen tot behoeff van meesteren Godtsch[a]lck sone Joorden Schellekens uuijt ende van sijnder ǁ huijsinge ende hoevinge metter erffenisse daeraen liggende ende daertoe behoirende gelegen tot Baesschot tusschen erffenisse Claes Vervlaest opte een sijde ende tusschen die molen Aa optie ander sijde ǁ Ende tussen die vroente optie dorde sijde, ende welcke rente Remijs Veltacker sone Jan Peter Mijs als gemechticht ende inden naeme van Ae[r]den sone wilner meester Godtschalck van Gorop uuijt crachte ǁ van procuratien naerder inde voors. [b]rieven begrepen, thien daegen in septembri int jaer Onss Heeren duijsent vijfhondert drienvijftich wettelijck ende erffelijck opgedraeghen heeft Anne weduwe ǁ wijlen Evaerts Joorden Schellekens tot behoeff van haer, ende tot behoeff van haeren wittigen kinderen vercregen bij Evaerden voors. ende gelijck hij Andries Michielsen voors. deselve bij ǁ gelijcke opdrachte der schepenen inne Beeck de date den vijfden februarij sesthienhondert ende negen erffelijck vercregen heeft van Jannen [s]one Jans van Dooren, als man ende momboir ǁ van Anna sijnder huijsvrouwe dochtere wijlen Evert Joordens voorgenoempt, Deselve penningen ende erffrenten voors. met eenen verschenen ende den lopenden pacht ǁ ende met affgaen ende verthijen inne manieren als dat gewoonlijck ende recht is tsaemen mette voors. ende alle anderen schepene brieven [d]aeraf mentionerende in puerder gifte wel ende ǁ wettelijck opdraegende ende er[ff]elijck overgegevende den heijlichgeestmeester der parochie van Diessen, nu sijnde ende naermaels commende, Omme het verschijn ende jaerlicxe interesten ǁ der voors. penningen ende erffrenten met kennisse oft ten behete vanden heere pastoir van Diessen ten behoeve vande huijsarmen der [v]oors. parochie van Diessen gedistribueert te worden ǁ nemende altijt respecte opte vrienden des voors. fondateurs ofte gifters deselve in hunnen noot voor andere prefererende, Dus sal die heijlichgeestmeester van Diessen ende den heere pastoir ǁ aldaer ten tijde wesende geh[o]uden sijn te besorghen, datter alle jaer een spijnd op Sinte Andriesdach sal gegeven oft onderhouden worden na[e]rde hoochmisse tsij openbaerlijck oft secretelijck ǁ vanden geheelen innecommen voors. als die vrienden die de fondatie genieten willen, tsij secretelijck oft openbaerelijck ierst ende vooral sullen gehoirt hebben des pastoirs in misse biddende tenǁminsten eenighe geboden voorde saeke des ghifters, Ten waere datter ijet ondertusschen ten behete ende bemisse als voor gedistribueert waere soo sal men altijt het overschot spijnden ǁ Dragende altijt sorghe dat het verloop oft verschijn, ten minsten jaerlijcx eens worde gespijnt ende gedistribueert naer behoiren, Begerende hij fondateur wel expresselijck, dat de rente ǁ die welcke vande voors. gerede penninghen is bekent, nijettegenstaende deselve alrede is bekent (soo hij fondateur verstaet) ten behoeve der voors. tafele, sal geappliceert te worden ǁ ten behoeve der voors. spijnden oft distributie als sijnde geschiet in sijne absentie ende tegen sijne meijninge oft dat die heere pastoir ende heijlichgeestmeester voors. tegen deselve rente andere ǁ penningen der voors. tafele ten behoeve deser distributie in plaetse van dijen sullen laeten appliceren, den selven heere pastoir ende heijlichgeestmeester opt hoochste daermede belastende ǁ dus sal die heijlichgeestmeester voors. ten tijde wesende voor sijnen moijten, van elck hondert gulden capitaels, ten daege vande spijndinge aen sijn selven behouden vijf stuvers, Geloevende ǁ die voors. fondateur, dit transport ende gifte in vuegen ende manieren boven verclaert, altijt vast stendich ende van weerden te houden ende in sijnen naeme te doen houden sonder eenich ǁ wederseggen, Daeronder stellende ende verbindende sijnen persoon ende goederen hebbende ende vercrijgende allet sonder argelist, Gegeven int jaer Ons Heeren sesthienhondert ǁ een ende dertich, den sevensten dach der maent van april ǁ H. Ghijssels secretaris ǁ

In dorso:
Fundatie ǁ voor de huijsarmen van Diessen ǁ beset ǁ door Andries Michiels anno 1631 ǁ den 7e april ǁ