Hilvarenbeek

Wy Claus van Spreuwel Aiors Vos zoen Wouter Lippen Ian Ian Willems zoen Peter Belleken Reyner vander Bystraeten ende Henrick ǁ die Weent, scepenen in Beke tueghen onder onsen ghemeynen zeghel dat op ledenen tiit quam die scouteth van Oesterwyc Willem ǁ van Broechoven ende dede houden ende vanghen scepenen voers. ende daer toe ander guede knapen dats te weren die zeeckers hadden ǁ gheweest vanden branscat ghelde daer vraeghden die scepenen ende die ander knapen voerghenoemd wat hii hou teghe daer zeyde die voerghenoemde ǁ scouteth dat hem die drossaert van Brabant bevolen hed hoii te houden ter tiit toe dat alzulcken ghelt gheseet weer als Wiitman ǁ Delyen manende waer den dorp van Beke ende hem vanden branscat ghebraeke dat hy met gueder waerheyt bewysen woude ǁ daer baeden die guede knapen voers. om dach te hebben ende haer ghebuer te spreken den dach gaf hon die scouteth voerghenoemd ǁ ende sii spraeken die ghebuer ende alsoe Dats Wiitman voers. bleeft siinre eyssinghe in drye gueden knapen ende die ghe- ǁ meyn crichslude blevens haere bydinghe oec in drye gueden knapen ander lude die welc ses voerghenoemde knapen hebben ǁ haer segghen eendrechtelyc ghezeyt ende is dit haer segghen dat Wiitman voers. hebben zoude viif ende tseventich gulden ǁ ghelds des zoude hem af gaen tyen gulden daer hy voer hebben zoude die samen op Ymelre staende vanden erven daer ǁ weghegeven of dat erve ende vort alzulcken ghelt als vanden branscat gheordineert was ende gheseet was dat hem met ǁ en is betaelt daer uut zoude hy gheven Aiors Vos zoen dertyen gulden die hy inden irsten branscat betaelde den hertoeghe ǁ van Ghelre ende tween anderen knapen acht gulden ende hier mede soe sullen die ghemeyn crichslude van Beke die nu siin ǁ ende naemaels wesen sullen vanden voers Wiitman ende van sinen nacomelinghe berust onghemoyt ende in gueden vreden ende ǁ rasten bliven vanden branscat rurende comende ende oerspronch daer uut hebbende tot euwighen daeghen ende nimmer meer ǁ af ghemaent ghequeelt oft aen ghesproeken te wesen ende heeft Wiitman voers. gheloeft op hem ende op syn goet dat hy heeft ǁ ende namaels vercrighen mach. Want hy der zaken voers. in segghers bleven is aen deen zide ende die ghemeyn crichslude ǁ van Beke in dander zide ende sii haer segghen eendrechteliic ghezeyt hebben ende hem die voers.  summe ghels die nu nae ghezeet ǁ was volcomelyc betaelt is als hy selver ghekeent heeft heeft hy dit voerghenoemde segghen gheloeft op die voers. verbiindenisse ǁ euwelyc vast ende stendich te houden ende in sinen name doen houden ende sonder weder segghen ende wy scepenen boven ghescreven ǁ overmiits begheren vanden ghemeynen crichslude van Beke vanden voerghenoemde segghen te hebben enen brief met haren scepenen zeghel ǁ bezeghelt ende oec overmiits Wiitmans voers. goederen enen brief te hebben bezeghelt den voers. luden ende wy dit voers. segghen ǁ hebben ghehoert ende daer over ghestaen soe hebben wy desen tsieghenwoerdighen brief bezeghelt int iaer ons heren dusent ǁ vierhondert ende vier op ten viertyenden dach in octobri.

Dorsale aantekening

Uuijtsprake tusschen Wijtman ǁ Delien ende die van Beek ǁ van sekeren brantschat ǁ dato 14 october 1404 ǁ M