's-Hertogenbosch

Wy Jordaen van Voert Marten van Campen Jan ǁ Monix Franciscus Toelinc Everart van Doirne Claes ǁ van Buchoven ende Aelbrecht van Maren scepenen ǁ in sHertogenbossche doen condt enenyegelicken hoe dat ǁ voir ons, scepenen geswoeren kercmeesteren heilichgeest ǁ meesteren ende die gemeyn nabueren des dorps van ǁ Diessen, ten vervolge vanden gemeynen nabueren der ǁ vryheit van Hildwaerenbeeck bescreven zijn geweest met ǁ zekere missyfbrieven der stadt voirs. daer aff die teneur ǁ van woirde, te woirde hier nae volgt Eerbaere goede ǁ vriende alsoe wij verstaen dat tanderen tijden tussen u ǁ ende den ingeseten van Hildwaerenbeeck zekere uuytspraeck ǁ gedaen is tot Bruessel bij zekere goede mannen ende ǁ arbiters daer toe bij u ter eenre, ende den ingeseten van ǁ Beeck gecoren, ende daer inne gesubmitteert, hoe ende wat ǁ manieren ghij die bede met dien van Beeck aen leggen ǁ ende betalen soudt soe weygert ghij u nu die voirs. ǁ uuytspraeck nae te gaen ende het gebreck der beden nae ǁ uuytwijsen der uuytspraken aen te leggen ende te betalen ǁ in verachtinge der selver uuytspraeken ende ten grooten ǁ ende merkelycken scade der voirs. van Beeck becomende ǁ scrijven alsoe hier omme aen u ende elcken van u ernstelic ǁ begerende dat ghij der voirs. uuytspraecke voldoet ende ǁ naegaet betalende sonder vorder weygeringe te doen het ǁ voirs. gebreck zoe dat inder voirs. uuytspraken verclaert ǁ steet oft coempt ofte schickt des ennige van u alhier voir ǁ ons van nu en vrijdach naestcomende over achtdaigen, omme ǁ u hier aff te verantwoirdende ende te seggende redenen waer ǁ bij ghij des alsoe nyet sculdich en soudt zijn geweest te doen ǁ God zij met u gescreven den XXIX dach der maent van ǁ aprill inden jaere duysent vyfhondert ende zeventhiene ǁ aldus onder gescreven die stadt van sHertogenbossch ende ǁ aldus boven gescreven den eerbaren onsen goeden ǁ
vrienden scepenen geswoeren kerckmeesteren heilichgeest ǁ meesteren ende gemeynen nabueren des dorps van Diessen ǁ tsamen ende elcken van hen ende dat ten daege inden ǁ voirscr. missyfbrieve betekent een geheiten Wouter van ǁ Eygen inden name ende van wegen der voirs. Scepenen ǁ geswoeren kerckmeesteren heilichgeestmeesteren ende der ǁ gemeynre ingesetene van Diessen ter verantwoirdene der ǁ zelver ter eenre ende ennige gedeputeerde vanden voirs. ǁ nabueren der vriheit van Hildwarenbeeck omme den voirs. ǁ missyfbrieve te sustineren ter andere zijden voir ons scepenen ǁ voirs. gecompareert zijn geweest ende aennamen des tegens ǁ van malcanderen enen dach van recht ende thoen die hen ǁ tot hueren versuecke bijden legenscouthet der voirs. stat waert ǁ geset ten welcken gesetten daige voir den selven legen-ǁ scouthet ende ons scepenen voirs. die voirs. Wauter van Eygen ǁ inden name der voirs. gemeynre ingesetenen van Dyessen ǁ zijnen thoen gedaen ende zijn waerheit daer op heeft geleydt ǁ inder manieren hier nae volgende Ende inden iersten ǁ Dirck Heyn Aleitens. woenende tot Westilberze tuyghden ǁ by zijnen eede, dat hem kenlick is dat die ingeseten van ǁ Westelbeerse zijndert der lester herttellinge hueren quote ǁ in ons genedige heeren bede betaelt hebben naeder taxen ǁ zoe die hen uuytgesonden is geweest vanden rentmeester ǁ vanden Bosche metten welcken de zelve ingeseten gestaen ǁ hebben, mer zoe wanneer dien van Beke mit hueren dingbancke ǁ bij desen stadt ennige taxen uuytgesonden zijn geweest ǁ hebben die selve ingeseten gestaen mids hueren quote ǁ daer af betaelt hebbende naeder quantiteyt vanden huysen ǁ ende herttellingen, welcke quoten ende taxen zoe hij wel ǁ eer bedeheffer geweest is hij aen handen des rentmeesters ǁ vanden Bosch ende oic den zess mannen desen stadt betaelt ǁ heeft Item die selve tuyghden noch dat hem kenlick is ǁ dat die van Westelberse voir die leste heerttellinge plegen ǁ te betalen het XVIII^te deel vander beden dien van Beeck ǁ gecomen met hueren dingbancken ende vander sommen alsdan ǁ resterende plegen die van Riel te betalen tXIIIte deel Item ǁ Gerit van Doren woenende tot Westelberse tuygden bij zijnen ǁ eede voir zijn beste conde, dat die van Westelberze zijndert ǁ der lester herttellingen gestaen hebben metter betalingen vanden ǁ beeden naeder quoten van hueren herttellingen zoe hen die ǁ vanden rentmeester vanden Bosch gecomen ende uuytgesonden ǁ is geweest ende nae hoiren seggen is zijn beste meyninge ǁ dat die van Riel oick alsoe gestaen hebben Item die selve ǁ tuygden noch dat die van Westelberse voir die voirs. hert-ǁ tellinge plegen te betalen tXVIII^te deel ende die van Riel ǁ tXIII^te als boven getuycht is Item Jan Wouters woe-ǁnende tot Riel tuychden by zijnen eede dat hij altyt gehoirt ǁ heeft dat voir die leste heerttellinge die van Riel plegen ǁ te betalen tXIII^te deel vander taxen voirs. ende die van ǁ Westelberse tXVIII^te deel Ende en weet anders nyet de ǁ selve van Riel en hebben gestaen mitter betalinge der selver ǁ beeden naeder voirs. heerttellingen zoe hen die vanden ǁ rentmeester vanden Bosch gecomen is Item Arnt Hermans ǁ woenende tot Riel tuychden bij zijnen eede dat hem kenlic ǁ is, want hij wel eer tot Riel bedeheffer geweest is dat ǁ de selve van Riel zijndert der lester heerttellingen gestaen ǁ hebben mids betalende hueren quote zoe hen dien vanden ǁ rentmeester vanden Bosch uuytgesonden is geweest ende ǁ nae zynre bester conden plegen die van Riel voir dese ǁ heerttellingen te geven tXIII^te deel van den taxe dien van ǁ Beke gesonden Item Dirck voirs. tuychden noch bij ǁ zijnen eede dat hij tot verscheyden tijden onder die naebueren ǁ
van Diessen heeft hoeren seggen dat die gheene die de ǁ compositie oft concordie tot Bruessel overgegeven hebben geen ǁ procuratie en hadden van hueren dorpe om dat te doene ǁ dan alleen om int recht tegen die van Beke te treden oft ǁ dier gelycke woirden Item ende nae dien die partyen ǁ voirs. op scutwaerh[***] te leyden hadden gededingt Ende zij ǁ daer toe met vonnisse der scepenen waeren gewesen soe ǁ leyden die voirs. Wouter van Eygen inden name der ǁ voirs. gemeynen ingeseten van Diessen zijn scutwaerh[***] ǁ als hier nae volgt Te wetene inden iersten Barǁtholomeeus Scilder tuyghden bij zijnen eede dat een ǁ geheiten Willem Wouters woenende tot Tielborch voirtijts ǁ tot Diessen gewoent heeft ende zoe die gemeyn same ǁ is, is hij van Diessen vertoghen om dat hij aldaer te ǁ hoege geset waert ende desgelycken is oick van Wouter ǁ Boyen ende Marie Deenen een gemeyn same geweest ǁ dat die mids der selver redene van Diessen onder Beke ǁ getogen zijn geweest Item die selve tuychde noch dat ǁ hij deponent gheen scepenen geweest en is van Beke ten ǁ tijde als hij tot Bruessel geweest is doen tcompromiss daer ǁ aff hij voir die van Beke getuycht heeft gemaict waert ǁ Item Willem Wouters tuychden bij zijnen eede dat hij tot ǁ Diessen gewoent heeft omtrent negen oft thien jaeren, ende ǁ dat hij omtrent vijf jaeren geleden van daer getogen is tot ǁ Tilborch, aldaer hij noch ter tijt woenende is ende dat mids ǁ desen saken want hij tot Diessen mitter beeden grootelick ǁ belast waert, hoe wel zijn gueden aldaer nyet gelegen ǁ en waeren ende hy deponent wordt tot Tielborch vele myn ǁ belast dan hij te voiren tot Diessen belast waert ende hij ǁ deponent vermoeyt in dien hij tot Diessen redelic getrac-ǁteert geweest were nae advenant van zijnen gueden ǁ gelyck zijn gueden tot Zeelst leggende ende hij nu ter tyt ǁ tot Tilborch woenende geset ende getracteert worden hij van ǁ Diessen nyet vertogen en soude hebben Item die selve ǁ tuychden noch dat hem kenlick is, dat Wouter Boyens ǁ ende Marie Deenen tot Diessen gewoent hebben ende ǁ naderhant tot Beeck ende zoe die same ghinck waren zij ǁ vertogen mids der overlastinge vander beeden oft settingen ǁ alsboven Item die selve tuychden noch dat zekere jaeren ǁ geleden nae zijnen onthout VII oft VIII jaeren zekere gebueren ǁ mitten persone van Diessen vergadert zijn geweest ǁ hebbende mit malcanderen communicatien hoe ende in wat ǁ manieren zij den overlast die hen bij dien van Beke mids ǁ der oversettingen vander beden gedaen waert keeren ende ǁ remedieren zouden ende hij deponent mit meer andere ǁ was alsdoen geordineert om te reysen nae te Bruessel ende ǁ provisie daer tegen te verwerven oft anderssyns mit ǁ manieren van justicien dat te keeren mer mids der ǁ oirlogen ende andere groote zwaere lasten die hen overcomen ǁ waeren tselve nyet vervolcht en is geweest, want oick ennige ǁ besorcht waeren mids den selven redene van ennigen volcke ǁ te meer belast te hebben moegen worden Item die selve ǁ tuychden noch dat nae zijnen verduncken die van Beke nae ǁ quantyteyt hueren heerttellingen wel zoe mechtich zijn hueren ǁ taxe ende quote te betalen als die van Diessen ende dat ǁ die vanden heertganck van Spreeuwel onder Beke liggende ǁ ende die van Riele ende Beerse gestaende mit heure herttellingen ǁ wel zoe mechtich ende mechtiger zyn nae advenande ǁ huere herttellingen dan die van Diessen Item Bartholo-ǁmeeus voirs. tuychde bij zijnen eede houdende dat die van ǁBeeke wel zoe mechtich zijn ende mechtiger heure herttel-ǁlinge te betalen als die van Diessen Item Jan vanden ǁ Eynde tuychden bij zijnen eede dat hij tot Diessen woe-ǁnaftich was als die goede mannen, mitten compromiss ǁ van Bruessel gecomen zijn ende die ingeseten aldaer tselve ǁ compromiss ende dinhout van dien gehoirt hebbende, deen ǁ zeyde dat tselve hen nyet mede gegeven en was dandere ǁ seyde tweere beter gedaen dan in grooten process gevallen ǁ ende dier gelycke woirden, ende ennige seyden datse ǁ daer mede nyet te vreden en waeren Item Jan Mijs ǁ tuychden bij zijnen eede dat hem kenlick is dat, nae dien ǁ Goessen Gerit Luytenzoen mitten anderen goede mannen geǁcomen was van Bruessel hij deponent den selven Goessen ǁ opten selven dach dat hij comen was hoirde seggen dat ǁ hij wel wilde om een lief dinck oft om een deel goets dat ǁ hij noemde, dat hij tot Bruessel nyet geweest en weere ǁ want zoe hij seyde hij alleen uuytgesonden was om trecht ǁ tegen die van Beeck aen te nemen ende zoe weer hij overǁdrongen geweest bij die vrouwe van Merode ende andere ǁ dat hij t compromiss alsoe overgegeven hadde, ende hem ǁ is kennelic dat ennige vanden nabueren aldaer van desen ǁ compromiss gehoirt hebbende nyet wel daer mede te vreden ǁ en waeren, ende hedden zijt weten te breken zij soudent ǁ gebroken hebben want zij liever met huere heerttellinge ǁ gestaen hedden Item Jan Mijs tuychden noch bij zijnen ǁ eede dat omtrent VII oft VIII jaeren geleden die persoen van ǁ Diessen met ennige naebueren aldaer vergadert zijn geweest ǁ om provisie te hebbene ende te keren tghene dat die van Beke ǁ hen overlasten ende mids dien die selve nabueren groote resten ǁ van beden te betalen hadden en waert dat nyet vervolcht ǁ want ennige besorcht waeren van meerderen overlast der selve ǁ ruyteren ende knechten ende anderssyns Item die selve ǁ Jan tuychden noch dat inder tijt als ennige uuytgesonden ǁ waeren tot Bruessel om des tractaets wille Bartholomeeus ǁ Scilder gheen scepenen geweest en is ende dat nyemant anders ǁ van dien van Diessen tot Bruessel gesonden en is geweest om ǁ trecht tegen die van Beeck aen te nemen dan Bartholomeeus ǁ voirg. Goessen Gerit Luyten scepenen tot dier tijt ende Henrick ǁ die Loese coster tot Diessen die mede gesont was om hen mit ǁ scrijven ende anderssijns behulpelick te zijn Item Henrick ǁ Peters tuychden bij zijnen eede dat hem kenlick is doen die ǁ gemeyn naebueren van Diessen vernomen hadden vanden ǁ compromisse ende uuytsprake dat zij gemeynlick daer mede ǁ nyet te vreden en waeren want hedden zij raedt geweten ǁ tselve te keeren zij dat gedaen zouden hebben ende waert ǁ oick den handel vanden compromiss een wijle tyts secreet ǁ houden alsoe dat die gemeynte in lange daer nae int zeker ǁ daer aff nyet en wiste ende hij deponent heeft Goessen ǁ Luyten die mede tot Bruessel geweest was selver hoiren ǁ seggen dat hij wel hedde gewilt om een lief dinck dat ǁ hij dit nyet gedaen en hedde want zoe hij seyde hij overǁvallen was geweest tot Bruessel vander vrouwen van ǁ  Merode ende andere om dit over te geven Item die selve ǁ tuychden noch bij zijnen eede omtrent XVII jaeren geleden ǁ ende ten tijde als tvoirs. compromiss gemaict soude zyn Bartolomeeus ǁ Scilder gheen scepenen en is geweest tot Diessen ende dat tot ǁ Bruessel om trecht te vervolgen nyemandt vanden naebueren ǁ aldaer en was geseynt dan Bartholomeeus voirg. Goesen Luyten ǁ ende Henrick die Lose coster aldaer, ende dat de selve gheen ǁ procuratie en hadden om ennige compositie te maken dan ǁ
alleen trecht tegen die van Beke te vervolgen want hij ǁ deponent soe wel procuratie hadde vanden naebueren voirs. ǁ om dit recht te vervolgen als die voirs. persoenen mer hen ǁ en was gheen procuratie gegeven ennige accoert oft ǁ compositie mit dien van Beeke te maken Item die ǁ selve Henrick tuychden noch bij zijnen eede dat omtrent ǁ VII oft VIII jaeren geleden die naebueren van Diessen mitten ǁ persoen aldaer vergadert zijn geweest om te keeren ǁ het onrecht dwelcke die van Beeke hen deden ende ǁ dat zij doen mids groote lasten van oirloge ende menichful-ǁdicheit van scattingen ende beeden die zij geven moestenǁ ende oick uuyt vreesen vanden vianden tselve tot diere ǁ tyt nyet en consten geeynden want zij beduchten voir ǁ teeringe vanden volcke van wapenen oft zij mids dien ǁ meer hedden belast moegen worden dan zij waren ǁ Item ontkent Wouter die dese waerheit leydt die ǁ voirg. uuytsprake bij dien van Diessen gelandeert te zijn ǁ Item begeert oic gemerct te hebben die uuytsprake inhoudende dat zoe wie ǁ die niet nae en ginge vallen soude inden peen van vyftich ǁ Philippus gulden Item en mach oic den selven naebueren ǁ nyet preindiceren oft prescriptie maken dat ennich tyt ǁ der uuytspraken naegaende voldaen mucht zijn taliter ǁ qualiter etcetera want die naegebueren die selve uuytsprake ǁ noeyt gelandeert en hebben Item leggen daer op inne ǁ trecht dat alweert ende die g[hee]ne die duytsprake ǁ verwacht hebben macht hedden gehadt hen te verbynden ǁ des neen zoe en hedden die zelve die naegebueren van ǁDiessen egheen macht gehadt voirder te verbijnden ǁ dan inden peen voirs. Item opt poinct gedragen ǁ aende heren scepenen dat alle uuytspraken op penen ǁ gedaen ende verbonden die partije daer nyet mede ǁ te vreden zijnden betalende den peen mach gestaen ǁ die voirs. heeren scepenen tuyghden daer op blijvende ǁ byder aendrachten Item ende nae dien partyen ǁ voirs. op saluacie te doen gededingt hadden ende zij ǁ daer toe met vonnisse der scepenen waeren gewesen ǁsoe dede ende leyden die voirs. Wouter van Eygen ǁ inden name als voir zyn saluacie als hier nae volgt te ǁ wetene inden iersten Henrick vanden Hove tuychden ǁ bij zijnen eede dat hij langen tyt tot Diessen gewoent heeft ǁ te wetene wel XL jaeren want hij aldaer geboren is ende ǁ mids dien hij tot Diessen mitter beeden zeer belast waert ǁ is hij van daer vertogen tot Hilwarenbeke, aldaer hij ǁ omtrent VIII oft IX jaeren gewoent heeft, ende ghilt aldaer ǁ myn inde selve beede dan hij tot Diessen gegonden hadde ǁ Item die selve Henrick tuychden noch dat Marie Deenen zijn ǁ suster die langen tyt van kijns op oeck tot Diessen gewoent ǁ hadde, oeck van daer vertogen is ende woent tot Beeke ǁ mids dien zij tot Diessen inder beeden zeer belast waert ǁ zoe de selve zijn suster hem deponent gesegt heeft ende ǁhij deponent heeft Wouter Boeyens doen de selve Wouter ǁ tot Diessen woende hoiren seggen dat hij van daer ver-ǁtrecken woude mids der belastingen vander beeden die ǁ welcke Wouter daer nae tot Beke zekeren tyt gewoent ǁ heef Item die selve tuychden noch dat hij over XXX ǁ jaeren beedesetter tot Diessen geweest is, ende oick som-ǁwylen bedeheffer mids den welcken hij deponent houdende ǁ is voir zijn beste conde dat die van Beke wel zoe ryck ǁ ende mechtich zyn naeder heerttellingen hueren taxe inden ǁ beeden te betalen als die van Diessen Item die selve ǁ Henrick tuychden noch dat hij dicwill heeft hoiren seggen ǁ ende is gemeyn same dat die van Riel ende Westelberse inden ǁ beeden van hueren gueden myn gelden dan die van Diessen ǁ Item die selve tuychden noch dat nae dien die gueden ǁ mannen die tot Bruessel geweest hadden om des twyst ǁ wille tusschen die van Beeke ende die van Diessen wesende ǁ tot Diessen wederom gecomen waeren hen gemeynlick ǁ overseegt waert datse meer overgegeven hadden dan hen ǁ bevolen was Item die selve tuychden noch dat hij ǁ over zeker jaeren gemeynlick tot Diessen heeft hoeren seggen ǁ dat zij het onrecht dwelcke die van Beeke hen deden mit ǁ recht gekeert souden hebben en hedde gedaen die oirloge ǁ ende datse besorcht waren van meer belast te hebben moegen ǁ worden Item die selve Henrick tuychden noch dat Willem ǁWouters die voirtyts tot Diessen zeker jaeren gewoent hadde ǁ nu ter tyt woenende is tot Tielborch houdende dat hij zijn bede ǁ ghilt tot Tielborch Item Jan Jacops woenende tot Diessen ǁ tuychden bij zynen eede dat Maria Deenen ende Wouter Boyens ǁ tot dier tyt woenende tot Diessen twystich zijn geweest ǁ tegen ennige aldaer mids dien zij hen beclaechden datse ǁ te hoige geset waeren inder beeden ende zijn alsoe van ǁ daer vertogen mids dien datse te hoige geset worden zoe ǁ zij seyden Item die selve tuychden noch dat hij altyt heeft ǁ hoiren seggen dat die van Beke wel zoe wel scade hadden ǁ huer beede te betalen als die van Diessen Item die selve ǁ
tuychden oick dat naden gemeynen seggen die van Riel ende ǁ Westilbeerse myn gelden dan die van Diessen van even ǁ vele goets Item die selve tuyghden noch dat gemeyn-ǁlick geseegt wordt ende vuer zeker jaeren heeft hoiren ǁ seggen dat den goeden mannen die tot Bruessel geweest ǁ
hadden daer af boven getuycht is gheen voirder bevele ǁ vanden naebueren aldaer gegeven en was dan alleene ǁ trecht tegen die van Beeke te vervolgen Item die ǁ selve tuychden noch dat hy den nabueren onder malcanderen ǁ dicwil heeft hoiren seggen dat zij hen recht tegen die ǁ van Beeke aengaende dese belastinge lange vervolcht souden ǁ hebben mer ennige seyden datse besorcht waeren daer ǁ omme van ennigen ruyteren ende heervaerden te meer ǁ belast te moigen worden ende dat alsoe ennigen verdocht ǁ datmen noch verbeyden zoude, ende ennige allegeerden ǁ andere redenen ende soe eest vast blijven staende Item ǁ die selve Jan Jacops tuychden noch bij zijnen eede dat ǁ Willem Wouters dicwil tegen hem deponent heeft ge-ǁclaecht dat die van Diessen hem te hoege setten seggende ǁ dat hij daer omme van daer vertrecken soude ende daer ǁ
nae is die selve Willem van daer vertogen tot Tielborch ǁ aldaer hij nu ter tijt woenende is ende zekere jaeren gewoent ǁ heeft houdende dat hij zijn bede tot Tielborch geldende is Item ǁ Hubert Rietmeker woenende tot Diessen tuychden bij zijnen ǁ eede dat hij Marie Deenen ende Wouter Boyens dicwil heeft ǁ hoiren seggen datse van Diessen vertrecken wouden mids ǁ den ongelyck dat hen gebuerden inder settinge vander ǁ beeden ende daer nae zijnse van daer vertogen ende hij ǁ deponent heeft den zelven daer nae wel hoiren seggen ǁ dat zij ter plaetsen daerse woenden myn gonden inder ǁ beeden dan zij daden tot Diessen Ende desgelycken heeft ǁ hij Henricken vanden Hove oeck hoiren seggen die tot Diessen ǁ pleech te woenen ende nu tot Beeck woenende is Item die ǁ zelve tuychden noch dat altyt gemeyn same is geweest ǁ dat die van Beke nae advenande vander heerttellingen ǁ wel zoe ryck ende mechtich zijn huer beede te betalen ǁ als die van Diessen Item die selve tuychden desgelycken ǁ dat gemeynlyck geseegt wordt dat die van Riel ende ǁ Westilberse wel zoe lichtelyck passeren inder betalinge ǁ der beeden van even vele goits als die van Diessen Item ǁ die selve tuychden noch dat hij ten tijde als die goede mannen ǁ daer af boven getuycht is te Bruessel reysden anders ǁ nyet en verhoirden dat hen vanden gebueren voirder ǁ bevele gegeven was dan tegen die van Beke int recht ǁ te treden hoe wel nochtans hij die tuycht daer bij was ǁ daer hen den last gegeven was Item die selve tuychden ǁ noch dat zekere jaeren voirleden die van Diessen op ǁ handen hadden mit recht tegen die van Beke desen ǁ overlast te keeren mer mids dien die oirloge hen over quade ǁ ende ennige beducht wairen voir meerderen overlast van ǁ volcke ende anderssijns, ende oick ennige hoepende waeren ǁ een andere heertellinge gemaict te worden is tselve ǁ alsoe bliven staende Item die selve Hubrecht tuychden ǁ noch dat hy Willemen Wouters tot meer stonden als hij ǁ tot Diessen woende heeft hoiren seggen dat hij van daer ǁ vertrecken woude want men hem te hoige settede, die ǁ nu ter tyt woenende is tot Tilborch ende heeft hem hoeren ǁ seggen, dat hij tot Tielborch myn ghilt dan hij tot ǁ Diessen pleech te gelden Iten die voirg. Persoenen ǁ tuychden dat Bartholomeus Schilder Jan Mijs ende Henrick ǁ

Jan Peters sijn ingeseten der prochie van Diessen houdende ǁ de selve voir goede eerbaere rechtverdige mannen Item ǁ die zelve tuychden noch dat Bartholomeeus voirs. tot diverse tyden ǁ scepenen ende heylichgeestmeester Jan Mijs heyligeestmeester ǁ ende geswoeren ende Henrick Peters heiligeestmeester geweest ǁ zijn ende datmen die geene die daer toe geordineert worden ǁ houdende is voir die eerbaerste ende notabelste van dien ǁ dorpe Item Hubrecht voirscreven tuychde bij zijnen eede ǁ houdende dat inder betalinge van ruytergelde ende der ǁ gelycke dagelicsche lasten, die van Diessen gestaen mids dair ǁ inne contribuerende naeder heerttellinge Item Jan voirs. ǁ tuychde bij zijnen eede accorderende van hoiren seggen Item ǁ die voirs. Wouter van Eygen inden name als voir dede inder ǁ recht lesen zyn procuratoren hem ende meer anderen byden ǁ nabueren van Diessen voir notaris ende getuygen gegeven ǁ inhoudende aldus van woirde te woirde Inden jaer ǁ ons heeren duysent vyfhondert ende seventhien opten sesten ǁ dach van meye in presencien van my notaris ende getuygen ǁ ondergescreven sijn gestaen eerbare personen Ghysbrecht ǁ Vervlaest ende Peter z. Batholomeeus Janss. vanden Nuwenhuys ǁ als kerckmeesteren Joseph Henrick Wouterss. als heiligeestmeesteren ǁ inder prochien van Diessen mit eens deels vanden nabueren ǁ der selver prochien van Diessen inden name ende van wegen ǁ der voirs. gebueren ende hebben ge[con]stitueert geset ende ǁ geordineert in hueren procureurs ende facteurs, discrete ǁ personen Henricken Mathys s. van Goerl Wouteren de leenman ǁ scepenen Bartholomeeus Snellen Willemen Gerits s. van Hove geswoeren ǁ Jannen Mijs Peteren Mijs Gysbrecht Peters Philippus Pauwels ǁ Henricus Jan Peters, Dirck die Mesmaker Joirden Scellekens ǁ Batholomeeus Scilder ende Jan Meeus Scellekens allen ingesetenen der ǁ prochien van Diessen zom tegenwoirdich ende zom absent ǁ wesende gesamenderhandt ende elcken van hen bysundere ǁ om hen zaeck oft zaecken die de ingesetenen van Beeck ǁ hen voir scouthet ende scepenen der stat vanden Bosch oft ǁ elders, aengaende der contribucien vanden beeden intenderen ǁ willen, te defenderen te ageren, ende voirts inder voirscr. ǁ saecken te procederen soe nae recht behoeren zal ende guadelick ǁ daer allet in te moegen doen, dat zij selver daer inne ǁ souden moegen doen oft zij voir oigen ende present ǁ weeren gevende den voirs. honnen procururren voirts macht ǁ die zake mit recht oft metter minnen te slyten ende te ǁ eynden Ende voert enen oft meer procureurs te moigen ǁ substitueren gelovende die voirs. constituende vast ende ǁ stendich te houden allet tgeene dat bij hueren procureurs ǁ oft den meesten deel van hen hier inne geprocureert ende ǁ voirtgekeert zal worden ende hen van allen scaden ǁ die hen ter causen van desen aencomen muchte te releveren ǁ hen selven ende allen hen gueden hebbende ende vercrigende ǁ daer voir verbyndende gesciet opten kerchove tot Beeck ǁ inden jaere ende daige voirs. daer tegenwoirdich waeren ǁ besceyden persoenen Willem Scellekens ende Arnt van Tuldel ǁ Willemss. mit meer anderen als getuygen daer toe geroipen ǁ ende gebeden, aldus onder gescreven, Nycolaus Ottonis ǁ quo ad pretact[***] constitucion[***] nor[***] Item die voirs. ǁ
Wouter van Eygen inden name als voir leeghden noch ǁ inne tot sterckenissen zijnre saken enen artikel inder ǁ instructien opt consent vander beeden begrepen inhoudende ǁ datmen elcker stat v[ry]heit ende dorp bynen onsen ǁ lande van Brabant [in]stellen ordineren ende seynden ǁ zynre taxe VI weke voir elcken dach ende termijn van ǁ betalingh nae dbesueck vanden heertsteden nu lestwerven ǁ gedaen Item Wouter voirs. inden name als voir ǁ leeghden noch inne enen anderen artikel vander selver ǁ instructien inhoudende dat elck stat vrijheit ende dorp ǁ zal gestaen mit wel te betalen zyn aengedeelte van desen ǁ toecomende beden tot elcken termijnen nae die taxen voirs. ǁ alsoe dat nyemandt van hen voir des anders gebreck ǁ belast noch becommert zal worden Item Wouter voirs. ǁ inden name als boven ende inden recht lesen diverse ǁ cedullen ende quitantie en van Diessen gegeven vanden ǁ rentmeester der stadt van sHertogenbosch Ende vander ǁ selver stat waer uuyt blyckende is dat sij betaelt hebben ǁ naeden ordinancien voirs. waer toe die van Diessen hen altyt ǁ gerefereert hebben ende noch doen, van welcken cedullen ǁ ende quitantie d'inhouden hier nae volgen Bartholomeeus Snellen ǁ heeft voer die porcie sdorps van Diessen Jannen Kenpart ǁ s. als zesse gecommitteerde der stadt vanden Bossche betaelt ǁ
inde II^M V^C XXV pont, te XL groten vlaems tpont ter begertten ǁ vanden here van Chievers In octobri lestleden als stadthelder ǁ generael, omme daer mede te onderhouden X^C paeyen tegens ǁ die vijanden bijden voirs. stadt ende huere Meyerien geanticipeert ǁ omme, wederomme te corttenen aende lopende bede te Corsmisse ǁ toecomende verschinende die somme van twee ende twintich pont twee ǁ stuvers, drie, denieren, der midte voirs. nae inhouden den consente taxe ǁ ende quote daer af uutgesondert actum XIIII^ta novembris anno sexto ǁ my present, aldus ondertekent Henrick die Bye junior Wij Dirck ǁ Goyarts van Gestel ende Willem Janss. rentmeesteren der stadt ǁ
vanden Bossche hebben ontfangen uuyt handen Arnt Scilders ǁ van wegen des dorps van Diessen III rijnse gulden XIX stuvers III 1/2 oirt ǁ als voir huere portie inde ierste costen uuytgesondert byden voirs. ǁ stadt voir het onderhoudt vanden volck van wapenen tegen ǁ die gelderss etcetera sceldende de selve daer af quyte golovende hen ǁ daer aff goede rekeneninge te houdenen Toirkonden heeft Meester Henrick ǁ die Bye inden name der voirs. rentmeesteren dese quytantie gescreven ǁ ende getekent XI dage in novem[bris] anno XIIII^C seven ende ǁ tnegentich, aldus ondertekent, Henrick die Bye junior, die beede ǁ vanden CL^M gulden beloipt van Sijn[te] Jansse anno XVC XVII, XCIIII ǁ pont III stuvers IX denieren ende die bede vanden IIII^{C M} Philips gulden XVI pond XIX stuvers ǁ II denieren hier aen salmen u cortten VIII pont IX stuvers VII denieren, aldus boven ǁ gescreven, Diessen Ontfangen van Diessen XCIII rijns gulden XVII ǁ stuvers IIII denieren onssen genedige heere den coninck gev[all]en te Corssmisse anno ǁ XV^C XVI van zijne genadige beeden vanden CL ^M gulden ende vanden ǁ IIII^C M Philips gulden actum X^a martij anno XV^C XVI ende aldus onderǁtekent, Balen, lieve ende wel geminde, ghij hebt wel ǁ gehoirt dat die staten van Brabant onssen genedige here geconsenǁteert hebben, hondert ende vijftich duysent gulden drie jaeren ǁ lanck duerende om daer mede te vervallen die groote lasten ǁ die sijne genadige te dragen hebben ierst aen onsen genadige here de ǁ keyserlycke maiesteit ter causen vanden mombaerscap te ǁ betalende hondert duysent gouden gulden, Noch te betalen ǁ het dordendeel van II 1/2^C duysent gouden gulden vanden ǁ huwelick tussen den coninck van Denemercken ende ǁ vrouwe Ysabeau zijnre genadige suster, Met oic die costen ǁ te betalen om huere genaden te vuerende int coninckrycke van ǁ Denemercken Noch om te vervallen die groote costen van ǁ ambassaten die zijnre genaden seynden in diverse conincrycken ǁ oeck om te vervallen die groote tachterheiden die zijne ǁ genaden tachter zijn, omtrent V^C duysent gulden wel belopende ǁ noch om te vervallen die groote costen die zijnen genaden ǁ nu doen zullen om te ontfangen die overlensche landen Ende ǁ tot alle dese groote lasten hebben die voirs. staten van Brabant ǁ geconsenteert gelyck voirs. is hondert vijftich duysent gulden ǁ drie jaer lanck duerende beginnende het ierste jaer nu Sijnt ǁ
Jansse anno XV^C lestleden waer aff die portie vander ǁ stat ende Meyerien beloept XXVII ^M V^C LXXVIII gulden IX stuvers ǁ III ort waer af uwe porcie beloept van nu Sint Jansse ǁ

lestleden Ende Corsmisse toecomende tsamen CLXXXVIII pont ǁ VII 1/2 stuvers, hier aff zuldi nu ter stont betalen die helft Ende ǁ dander helft tot Korsmisse naestcomende in handen Peters ǁ
van Balen rentmeester van[den] beden Item die voirs. staten ǁ van Brabant hebben mi[t] here van Chievers geconsenteert ǁ IIII ^M gulden van die geme[y]ne diensten byden selven den lande ǁ
van Brabant gedaen zekere jaeren als gouverneur ons genedigen ǁ heren etcetera waer af uwe portie beloept van nu Sijnt Jansse ǁ lestleden ende van Corssmisse toecomende V pont X denieren hier aff ǁ zuldi ter stont betalen die helft Ende dander helft te ǁ Korssmisse toecomende in handen alsboven Item noch suldi ǁ betalen uwe portie inde duysent gulden mijnre heere den ǁ cancellier van Brabant eens geconsenteert inde aenǁ coempste vanden cancellierscappe daer aff uwe porcie ǁ beloept te betalen XXV stuvers II denieren ob [..] Item noch beloept uwe ǁ porcie vanden erfrenten vanden dorden jaere verschijnende ǁ te allen heiligen VIII pont XLI stuvers aldus ondertekent Balen ǁ Ende aldus boven gescreven Diessen Geminde vriende ghijǁ zult betalen u bede vanden CL ^M gulden aen Peteren van ǁ Balen ontfanger XCIIII gulden III stuvers IX denieren noch zuldi betalen inde ǁ bede vanden IIII ^C duysent Philippus gulden onss genedige heere ǁ over alle sijne lande geconsenteert bynnen IIII jairen te ǁ betalen XVI pont XIX stuvers II denieren noch zuldi betalen inde IIII^C ǁ Philippus gulden eens te gevene voir den zegel ende addicie ǁ der blider incoempst XIII stuvers IX denieren ende M in alles C XI gulden ǁ XVI stuvers VIII denieren hier aen salmen u cortten gre[***] VIII pont XVI stuvers ǁ ende noch VIII pont IX stuvers VII denieren aldus boven gescr. Diessen Item ǁ Wouter voirs. dede noch inden recht lesen den voirscreven ǁ missyfbrieve boven ins[e]reert ende byde voirs.van Hildwaerenǁbeeck verworven aen de voirs. stadt van sHertogenbosche ǁ inhoudende datter seker uutsprake gedaen soude zijn tot ǁ Bruessel by zekere goede mannen ende arbiters ende daer ǁ inne gesubmitteert van beyden zijden het welck contrarie ǁ blyct wann[eer] mer een en is die die uutsprake gedaen ǁ heeft ende die selver mitter hant gescr. heeft mids den ǁ welcken zij billicken verdoelt souden wesen in hueren ǁ bescriven Item Wouter voirs. begeert alnoch gemerct ǁ te hebbene dat die selve uutsprake nyet besegelt en is ǁ
noch van ghenen notaris ondertekent ende mids dien nyet ǁ auctentyck en is noch niet ontfa[nck]baer inden rechte Item ǁ die voirs. Wouter begeert alnoch gemerct te hebben dat ǁ
die ghene die die uutsprake verwacht soude hebben van ǁ wegen dier van Diessen egheen bevel daer toe gehadt ǁ en hebben als wel bethoent is Item die selve Wouter ǁ begeert oeck gemerct te hebben dat [ar]tikel bij dien van ǁ Beeck ingeleet dwelcke alleenlick sla[..] voir die hoeftsteden ǁ ende nyet voir hen ende oick die uutsprake die tusschen ǁ die voirs. van Beeck ende Diessen gedaen soude wesen ǁ van gheenre werden en is dwelck hij hoept redelicken ǁ wel bethoent te hebben Item die selve Wouter begeert ǁ alnoch gemerct te hebben al eest saecke dat Bartholomeeus ǁ Scilder Henrick Peters ende Jan Mijs die voir die van Diessen ǁ getuycht hebben ende mede procuratie hebben om trecht ǁ te vervolgen tegen die van Beeck dat zij nyet geageert en ǁ hebben tegen hen ende zijn discrete mannen alle scepenen ǁ kerckmeesters heiligeestmeesters tot verscheyden tyden geweest ǁ als wel bethoent is item ende dat wij scepenen ǁ ierst genoempt nae goeden deliberacien ende voirdachte ǁ hier op gehadt ende nae allen solempinteyten van rechte ǁ daer toe behoirende vonnislick hebben gewesen Die ǁ nabueren van Hildwarenbeeck voirs. Verdoelt ǁ in huere impetracien tot desen tyt Ende des ǁ torconden soe hebben wij scepenen voirs. onse zegelen ǁ hier aen doen hangen Gegeven op ten lesten dach der ǁ maent van septembri int jaer ons heeren duysent ǁ vyfhondert ende seventhiene

Dorsale aantekening:

Tusschen Hilwaerenbeeck ende Diessen J anno 1517 laeste september