Hilvarenbeek

Wij Jan die Witte ende Marten vanden Sande scepenen in Beeck tuygen onder onsen gemeynen zegel dat voer ons ǁ zijn coemen Willem ende Cornelis gebruederen ende Marten Wouter Otten soen als man ende momboir van Laeten zijnre ǁ huysvrouwe wittige kijnderen wilnere Willem Zeelmakers die hij bij Maryen zijnder huysvrouwen wittelijcken vercregen ǁ hadde, ende hebben onder hen een erfdeijlinge ende erfsceydinge gemaect ende gedaen bij raide van hueren ǁ vrienden van allen alzulcken erffelijcken gueden als hen aencoemen ende verstorven zijn van wilnere Willemen hueren ǁ vader ende die hen noch aencoemen ende versterven souden moegen van Marye voers. huerder moeder, daer Marye voers. ǁ haer tochte den selven aff oevergegeven hadde ende oick vanden erffelycken gueden die zij tegen Jannen hueren brueder ǁ met oevergeven erffelycken vercregen hadde, als zij seden. Overmits welcker erfdeylingen ende erfsceijdinge wille ǁ soe sal Marten als man ende momboir van zijnner huysvrouwen voers. hebben ende erffelijcken besitten een huys ende ǁ hoff metten scoppe daer by staende met hueren gronden ende toebehoerten metter erffenisse daer aen liggende ende daer ǁ toebehoerende gelegen inder prochie van Diessen ter plaetsen geheijten aen die brugge tussen die gemeyn Aa aldaer ǁ loepende optie een zijde ende tussen erffen Gijsbrecht Peters optie ander zijde streckende vander vroenten tot eenen ǁ waterlaet toe, dwelcke sal blijven ende toebehoren deser stede ende sal Marten eten vegen ende bewaeren alsoe dat ǁ Cornelis voers. daer aff ombescedicht sal blijven: item noch sal hij hebben ende erffelijcken besitten die helft inde helft ǁ van eenen stuck beempts welck helft des stuck beempts jaerlijcx rudende is tegen die ander helft toebehorende ǁ Gerijden Henrick Aert Snellen zoen den geheelen beempt gelegen int diessenbroeck omtrent den crauwelsgraft tussen erffeniss ǁ Peter Coerts optie een zijde, ende tussen erffenisse Pauwels Cnoeps optie ander zijde in alder groeten als dese erffenissen ǁ aldaer gelegen zijn als zij seden op welcke voers. gedeelte Willem ende Cornelis voers. wittelijcken ende erffelijcken ǁ vertegen hebben tot behoeff van Marten als momboir van zynner huysvrouwe voers. ende op allen scepenen letteren ende vorwaerden ǁ daeraff mentie maeckende ende gewach doende, ende op allen den rechte hen daer inne ennichsins toebehoerende in manieren ǁ als dat gewoenlijcken is geloevende op hen ende op allen hueren gueden hebbende ende vercrijgende dese erffdeylinge ende ǁ erffsceydinge Martenen voers. altijt vast ende stentich te houden sonder ennich wederseggen ende allen commer ende ǁ calaengie van hueren wegen daer inne wesende tenemael aff te doen den selven daer Marten voers. jaerlycx ǁ [***] sal een mudde rogs erfpachts der [***] van onser vrouwe [a]ltaer inder kercken van de [***]och ǁ [***] [r]oggen erfpachts Pauwelse Bartholmeuss. vanden Nuwenhuijsen, noch uuijter stede een halff [***] erfcijns ǁ in tshertoghenchijns noch der helft van veertich stuuvers losrenten Juetkenen dochter Jan Aert Snellen staende te losse ǁ dese veertich stuvers met achtendertich [***] noch anderhalff mudden roggen lyfpachs Maryen zijnre huysvrouwen ǁ moeder zoelange zij leven sal ende nijet langer ende dwelcke hij haer huijden des daeghs hier uuijt geloeft hadde ǁ te gelden allet nae inhoudt van scepenen brieven daer op als zij seden gemaect ende sal oever dese stede wegen een ǁ bocht ende een driesken achter die stede liggende Cornelis toebehoerende voer uuyt ter straten toe ten naesten velde ende ter ǁ naester staden ende hebben dese drye condividenten malcanderen noch geloeft op hen ende op allen huere gueden hebbende ǁ ende vercrygende dat elck zynen commer hem in dese deijlingen toegevuecht wesende van nu voertaen then eewigen daghen ǁ uuijt zijnen helfte alsoe gelden ende betalen sal daerom den anderen van hen op hen oft op hueren gueden nimmermeer ennigen ǁ commer crot oft hijnder daer aff coemende en de sal met vorweerden toegedaen In dien op dit voers. gedeelte ennigen ǁ anderen commer met recht quaem boven den voerg. commer hebben zij geloeft optie verbijntenisse voers. dat zij dien ǁ commer alsoe coemende  malcanderen kijnt kijntsgedeelt gelijck selen helpen gelden ende draegen gegeven int jaer ons ǁ heren duijsent vijfhondert ende dertich seven dage inden aprille

Dorsale aantekening:

Marten Wouter Otten Zoenǁ

1530