Luik

Iohan van Heynsberch biider genaden Go[dts] Byscop van Ludick ende greve van Loen doen kont allen ende einen yegeliken dat voir ons ende vele van onsen leenmannen ons bysdoms hier onder bescreven ǁ in onsen palayse te Ludick hem verschenen hebben in properen personen des selve dage datum des briefs Aernt Dicbier Iannes van Spreuwel Dircx soen Iannes van Gruenendael ende Willem vander Kemenaden alle ǁ leenmannen als sii seyden onss liefs geminde ende getruwe Ians heere van Petershem van Oerscot ende van Beke, om saken wille van siinen lande ende heerlicheit van Beeck die welke leenmanne voirseet toenden aldair ende ǁ opdeden hoe dat een seker gedinghe ende pleyt geweest hedde ende hangende weer voir den voerseeden Ian heere van Petershem off sinen stedehouder van siinen wegen ende voer hen die leenmannen voerseit tusschen Aernt Aernt ǁ Ianssoen wilnere van Cromvoert ter eenre siiden ende Iacop Henricx soen van Ghissen wilner ter andere siiden, als om eens leens wille Eertganck off Dunne gheheiten rurende vanden heer van Petershem voirs. als leen ǁ van siinen lande ende heerlicheyt van Beke, ende dat welke lant ende heerlicheyt van Beke rurende ende men houdende es van ons ende van onser kerken te leen van Ludick, inden welken gedinghe ende pleyt die partiien ǁ alle beyde aenspraeck ende andwoirde calengeringe proeffenisse ende tegenseggen gedaen hadden alsoe verre alst hen genuechde eyn yegeliic om siin rechte ende reeden bii te brengen ende te volvueren ende alle datte in ǁ gescrifften volcomeliic geset was, geliic alst scheen meenre rollen dien die vieve leenmanne bovengenoemt des voerseidens Ians heer van Petershem aldair overgaven ende satden in onse hande, Beho[ud]ende op hoer ǁ manscap dat in die selve rolle gescreven weeren opt alre nauste die hanteringhe ende stucken die die partiien voerseit tot huden op desen dach toe op dat voerscreven gedinge ende pleyt in geleet ende voert-ǁgeset hedden aenspraeck yerstwerf ende naemaels proeffenisse, ende want sii niet wiis geweest en hedden noch en weeren vanden voers. gedinghe ende pleyt te wiisen naden loy van onsen lande ǁ van wyen dat leen voerscreven vanden Eertganc of Dunne daert stoet om es rurende en(de) men houdende weer, soe weeren sii voir ons ende onsen leenmannen comen als voir hen hoet om dair van geleert te wesen ǁ baden dair om dat wii die stucken voers. keeren woulden aen onse leenmannen voers. ende hen bevelen op honne manscap, die vier leenmannen voerseit te leren vanden saken voers., ende van dair alle dat ǁ voerseit es keerden aen onsen lieven getruwen Gieliis van Arremoyden heer van Ynchies ende van Vgies man van wapenen bevelende hem dat hii hem hier van beriede met onsen leenmannen voirs. ǁ ende dat si dair op een leernisse geven den voerseiden leenmannen der heerlicheyt van Beke, na onsen lantrecht, ende alsoe verre alst schynen mocht vanden stoet ende twist voirs. bider hanteringen ǁ dair van die sii die selve leenmannen overgegeven ende in onsen handen geset hadde alst voerseit es, die welke hanteringe ende schaffinghe wii voert den voerseiden Gieliis overgaven ende in siinen handen ǁ satden ende als dat geschiet was die voerseide Gieliis van Arremoyden te rade ginck met onsen voerseiden leenmannen onder bescreven ende oversagen onder hen ende visiteerden alle die hanteringe ende ǁ schaffinge der saken voirs. hen wale ende riipeliike dair op beradene, also lange dat siis wiis waren ende eendrachtich ende quamen doen weder om voer ons, ende dan met vollen ende ghemeynen gevolge ǁ der selve onser leenmannen sonder yemont van hen dair tegen te seggen, Soe wairt van monde Gieliis van Arremoyden voirs. dien wy dair op maenden ende versochten, den voergenoemde leenmannen des lants ǁ ende heerlicheyt van Beke voerseit geleert ende leernis gegeven inder voegen ende manieren als hier na volgen, dats te weten dat biider hanteringe ende proeffenis die op die saken ende gedinghen voirs. gedaen ǁ siin, clairliiken schiint dat Liisbet vanden Cloet diemen te henen plach wilner Liisbet Voss lycht ende hantplichte ende opgehouden hadde bi hoeren tiiden als haere leen ende erve op hoer gevallen ǁ ende verschenen na doede haere drie brueders dat voers. leen vanden Eertganc off Dunne gheheiten dair die stoet om es ende dat in haren leenen alle hair goede beruerliic ende erfeliic gecalengeert worden van enen ǁ hertoge van Brabant als goede die vervoert waeren ende die selve goede voirt vercoft warden van enen gheheyten Henric van Ranst, doen ter tiit scouthet van Shertogen Bosch enden Ianssoen wilner ǁ van Cromvoert des voirs. Aernts van Cromvoerts vader ende dat na doet Liisbetten voers. vanden Cloet anders geheiten Voss Aernt voerseit die selve goede ophielt vanden voerseiden heer van Beke ǁ off van siinen momber doen ter tiit, ende gebruiicde derre die selve Arnt mennich iair lanck ende na siin doet dien ophielde Aernt siin soon voers. als siin leen hem voostheven ende vervallen na doet ǁ siins vaders voerseit, Item en des geliics schiint clairliiken dat die voerseede Liisbet vanden Cloet anders gheheiten Voss doen sii sterf twe wittige kiinder van haer blivende affter liet te weten Liisbet ǁ haer dochter moeder des voerseiden Aernts Aert Ianssoen wilner van Cromvoert ende een soen gheheiten Arnt vanden Cloet die noch huden des dage geliic die hanteringe voers. begripen lenende es ǁ ende siinre sinne wat gemymet ende genenket es die welke Aernt vanden Cloet heeft opdraginge gedaen vanden leen voerseit voor den voergenoemde Ian van Petershem of siinen stedehouder ende siine ǁ leenmannen in name ende tot behoef des voergenoemde Iacobs van Ghissen alst dat schiint met brieven mer niet en schiint biden selven brieven noch oec biider hanteringen van den voergeseden leenmannen ǁ voertbracht ende overgegeven, dat Aernt vanden Cloet voirs. doen hii die voerseide opdraginge dede, in goedinge was ende opheldinge te voeren gedaen hadde vanden leen voirs. nae doet siinre moeder ǁ voerseet, ende dair om soe wairt gewesen ende geleert van onsen leenmannen voerseit, des voergenoemde Ians heer van Petershem leenmannen boven genoemt, dat aengesien dese stucken voir geroert die ǁ voergenenoemde Aernt Aernt Ianssoen van Cromvoert [...]nen sal in siinre besittinge ende hantplichtinghe des leens van Eertganc off Dunne geheite voerseit, also lange ende des der tiit toe die hii dair ǁ met recht uyt sal gewonnen werden ende yemont come die dair meere recht aen sal proeven te hebben, want om dat niet en schiint dat Aernt [va]nden Cloet Liisbetten soen voerseit gedinge hadde ǁ vanden voerseiden leen ende hii dat niet op gehouden en hadde, die opdraginge die hii dair van gedaen heeft in name des voerseiden Iacobs voer niet volcomeliic noch met recht gedaen ǁ gehouden en sal worden, mer genueget Iacoben voirs. op dese sake voirs. den voergenoemden Aernt weder om van nywes aen te spreken off int recht te trecken opt principail om den voer-ǁ seiden Aernt dair uyt te werpen met recht, dat hii dat doen mach also dicke alst hem goet duncken sal, ende als van den cost tot heer toe gesciet ende gedaen om der saken wil voirs. also verre ǁ als die partiien voerscreven hen dair van verbonden hebben dat dat wesen sulx op des genes coste die onrecht hedde, Ende sulle die voers. Aernt Aernt Ianssoen van Cromvoert dair van quiit ende loss ǁ bliven, bii dat welke leernisse also gesciet ende gedaen als voirs. es bii waren met Gieliis van Arremoyden voerseit onse lieve getruwe Henric heer van Grontfelt van Rugberch ende van ǁ Herstal man van wapenen Wouter van Antun onse overste meyer onser stat van Ludick, Vastraet Bareit Surlet Burgermeister inder tiit der selver stat van Ludick, Gieliis van Seraing onse erfelike ǁ Pautier Stassiin Chabot Ian van Bernamont Franchoys van Berchus Iannes van Templons Baudwiin van Niirnvoirt Iakemiin Benaert, ende vele anderen, in teyken der welker dingen ǁ alsoe gedaen te siin als voerscreven es, Wii Ian van Heinsberch bisscop van Ludick ende greve van Loen hebben onsen segel aen desen tegewoirdighen brieve doen hangen, Gegeven int ǁ iair ons heeren dusent vierhondert ende negen ende tweintich elf dage in Meert.

Dorsale aantekening
Vonnisse tot Luyck gewesen ǁ aengaende sekeren leen op ten ǁ Heertganck tot Dun ǁ 11 meert 1429 ǁ Leen te Dun