Dongen

Willem van Dalem here van Dongha doe cont allen luden die dese litteren sullen sien oft horen ǁ lesen dat ic aenghesien hebbe onst ende vrientscap ende menighen trouwen dienst die mi ǁ miin lude ende ondersaten van Donga bewiist hebben, waer om dat ic in vrientscappen ǁ ghegeven hebbe ende gheve voer nu ende voer miin nacomelingen heren van Donga minen luden ǁ ende ondersaten die wonachtich siin binnen miinre heerlicheit van Donga oft haren nacomelingen ǁ oft gheviele dat God verhoeden moet dat enich manne ofte wiif oft hoer kiinder met ongheǁvalle hoer liif versuymden ende aflivich worden het waer in water ofte in vuere dat sii daer ǁ hoer liif noch hoer goet niet aen verboeren en sallen tieghens den here van Donga ende oft ǁ yement van live ter doet quame bi ongeval als voers. steet dat die vrienden vanden doden ǁ die aen verden ende nemen moghen uten water ofte uten vuer sonder enich broeken ofte goet ǁ daer aen te verboeren ende dan ter stont eer si daer yet meer toe doen toten doden dan ǁ sullen si den heer van Donga oft sinen richter daer bi halen om den doden te besiene he[.]ǁ hi van live ter doet comen is weert soe hebbe ic ghegeven ende gheve minen luden ende ondersaten ǁ van Dongha voersc.als vanden coer vanden scapen dat die coer staen sal op eenen o[.]de[***]ǁ soe wie dats niet en hielde ende anders gheen broeken daer aen te verboeren Ende om dat ic Wilǁlem here van Donga voersc. wille dat alle dese voersc.  poynten vast ende gestade ghehouden word[en] ǁ voer mi ende voer miin nacomelingen heren van Donga soe heb ic desen brief besegelt uuthangende ǁ met minen zeghel ende hebbe voert gebeden ende bidde Wouter van Wisschel minen neve ende ǁThomaes Ian Heylens soens soen miin manne van leene dat sii om meere kennessen desen brief ǁ met mi beseghelen willen ende wii Wouter ende Thomaes manne ons liefs heren Willems voers. ǁ om siinre beden wille Soe hebben wii met hem desen brief beseghelt met onsen seghelen ǁ ghegeven int iaer ons dusent vierhondert ende dertich viifthien daghe in octobry