's-Hertogenbosch

Corstiaen soone wijlen Jans Corstiaenss. van Spaendonck woonende tot Tilborch ǁ heeft wittelick ende erffelick vercocht Zeberden soone Jans Seberts. de Raet, eenen jaerlicken ende erffelicken ǁ chijns van dertien carolusgulden, twee ende eenen halven stuvers, elcken gulden tot twintich stuvers inne ǁ gueden gancbaren gelde gereckent, te betaelen alle jaer erffelick den negentiensten dach der maent ǁ februarij. Ende voir den eersten termijn vanden betaelinge den negentiensten februarij anno sestienhondert ǁ vijerenveertich. Ende binnen s Hertogenbossche vrij van allen beeden exactien subventien tienste ǁ twintichste, honderste, meerdere ende mindere penningen commeren schattingen ende lasten ǁ gewoonelick ongewoonelick ingestelt ende naemaels inne te stellen egeen lasten uutgeschijden ǁ te leveren van ende uuijt huijs, erffve, hoff, boomgart, schuer, ackerlant ende weijlant malǁcanderen aen eenen plack aenliggende groot, int geheel ontrent thien loopensaten, gestaen ǁ ende gelegen binnen der parochie van Tilborch ter plaetssen genoemt aent Laer, tusschen ǁ erffve Aerts Jan Jooris, oost, aen deen sijde, ende tusschen erffve Robbert Jan toten west, aen ǁ dander sijde, streckende vander gemeijnder straeth aldaer, tot op erffve Steven Joost Gelders ǁ ende alnoch van ende uuyt een stuck lants eensdeels saijlant ende ende eensdeels weijlant gelegen ǁ inder parochie ende plaetssen voers, tusschen erffve Jacob Michielen noirden aen deen sijde ende ǁ  tusschen erffenisse Laureijns Huijben, zuijden aen dander sijde streckende van erffve Jan Otto ǁ Goijers, tot opte gemeijn straeth (soo hij verclaerde) van den selven Seberden cooper metten ǁ erffrecht te hebbene ende te besittene. Ende heeft die voirgenoemde vercooperen den voirs. chijns den voirgenoemde ǁ cooperen opgedragen, met helmelinge vertijdenisse inne manieren inne dijen gewoonelick sijnde ǁ geloovende de voirgenoemde vercooper ende met hem Jan Jan Aerden oock woonende tot Tilborch alle ǁ schuldenaren principael onverscheijden ende een vooral op verbant van hennen persoonen ende ǁ allen hennen goederen present ende toecomende, dat sij den voers. coopere van den voirgenoemde chijns ǁ schuldige ende gerechte sullen doen warantscappe, ende dat sij allen anderen commer calangie ǁ ende aentael, inde voirs. onderpanden wesende ofte commen, den voirgenoemde  cooperen aff sullen doen ǁ geheelijck uuijtgenomen seven stuvers chijns aenden heere van Loon. Ende alnoch heuren losschijns ǁ van thien gulden tsiaers aen Jooris Smits jaerlix van te voiren ende van rechtswegen daer uuijt te vergelden ǁ staende ende dat sij in voorgenoemde onderpanden voor de betaelinge des voers. chijns den voirgenoemde copere ǁ jaerlix als voerschreven staet daer uut te vergelden altijt goet genoch ende wel doegende sal maken ende houden ǁ met conditien dat men den selven chijns ten allen tijden sal mogen afflossen, ten eenenmael metter somme ǁ van tweehondert ende vijftich der gelijcke carolusgulden. Ende metten lopenden jaerchijns aende ǁ achter stellen ten tijde van den afflossinge van den voorgenoemde chijns ten achteren staende. gelijck de voirgenoemde ǁ coopere dat opentelijck heeft beleden ende bekent ende als schuldenaer principael op verbant van sijnen persoon ǁ ende allen sijnen goederen present ende toecommen. Den vercoopere wederom gelooft behoudelick datmen den los een halff ǁ jaer te vooren wittelijck sal te kennen geven ende opseggen getuijgen waeren hier over scepenen in s'Hertogenbosch ǁ Gijsbrecht Pieck van Tienhoven ende David vanden Bossch, gegeven den negentiensten dach der maent februarij ǁ int jaer ons heeren duijsent sesshondert ende drije en veertich Littera seberti ǁ J. van der Meulen ǁ

In dorso:

Tilborch ǁ constitutie van g[***] ǁ 1633 ǁ