Tilburg

Wij Joncker Adriaen van Malsen, heer der dorpen van Tilborch ende Goerle, hebbe ghegonnen ghegeven ende ǁ verleent ende mits desen mijnen bezegelden brieve, gonne, gheve ende verleene ick meester Henrick Swijsen Lauǁreyns sone dat clerckscap off secretarisscap der dorpen voerseyden met allen dat den clerckscap off secretarisǁscap toebehoert, ende die voergaende clercken oft secretarijsen dat gehadt ende gheuseert hebben, niet daer ǁ inne weghe sceyden, dies soe sal hy meester Henrick voerseyden doen synen behoorlyken eedt soe dien behoert ǁ om dit syn officie te bedienen soe dat van outs ende van rechs wegen behoert, sonder nu int beghinsel van ǁ onderhalven off twee jaren of daer omtrent eenen te mogen stellen in sijn plaetse bequaem daer toe synde, om ǁ dat meester Henrick hier en tusschen dit syn officie mach leeren, hoe hijt van rechswegen sculdich is te ǁ bedienen ende andere dingen die hem van noede syn om te weeten ende te connen. Ende desen tyt vander ǁ verleningen die die heer der dorpen voerseyden meester Henricken voerseyden verleent ende ghegeven heeft, is ende ǁ sal ghedueren den tyt dat die heer ende meester Henrick voerseyden lenen sullen, van welcken verleninghe ende ǁ ghevinge ick joncker Adriaen voerseyden my kenne vernuecht, voldaen ende betaelt te sijn, den iersten penninck ǁ metten lesten ontfangen te hebben ghelovende op my ende op verbijntenissen van mijnen gueden hebbende ǁ ende vercrygende dese verleninge vanden clerckscap of secretarisscap den voerseyden meester Henrick den tyt ǁ soe voerseyt staet vast ende stendich te houden ende in synen naem te doen houden sonder enich weder seggen ǁ Dese conventie ende verleninge is geschiet in presentie van heer Goeswijn Peynenborchs persoen tot Tilborch ǁ ende Laureys Henrick Swijsen Ende in kennissen der waerheit soe heb ick Joncker Adriaen van Malsen heer der ǁ dorpen van Tilborch ende Goerle voerseyden desen brieve bezegelt met mijnen properen eygen zegel Ghegeven int ǁ jaer ons Heeren dusent vyffhondert ende dertich den vierden dach in meye. ǁ